АҚШ Жамал Хашшоги ісін қайта тергейді
Сауд Арабиясы АҚШ-тың журналист Жамал Хашшогиді өлтіру жөніндегі тапсырысты мемлекеттің ханзадасы Мохаммед бин Салман берді деген айыппен келіспейтінін мәлімдеді.
Саудиялық журналист Жамал Хашшоги 2018 жылы Сауд Арабиясының Ыстанбұлдағы консулдығында өлтірілген болатын. Осыған байланысты АҚШ үкіметі журналист Сауд Арабиясының лауазымды тұлғаларының «тапсырысымен» өлтірілді деген пікірін білдірді. Өткен аптада Сауд Арабиясы Сыртқы істер министрі айыпты теріске шығарып, ақпараттың жалған екенін мәлімдеді.
Байден әкімшілігі корольдікті кісі өліміне қатысты жауапкершілікті өзіне алуға шақырады. Бұл оқиғаға басқа мемлекеттер мен бірқатар халықаралық ұйым алаңдаушылық танытқан-ды. Мәселен, Ұлыбритания бұл істің түбегейлі зерттеліп, тергелуі керектігін, оған қоса, осы өлімге қатысты деген күдікке ілінген 20 лауазымды тұлғаға санкция жариялайтынын мәлімдеді.
БҰҰ-ның соттан тыс мәселелер бойынша арнайы өкілі Агнес Калламард әлеуметтік желідегі парақшаларының бірінде АҚШ-тың дайындаған құжаты Сауд Арабиясы үкіметінің бұл оқиғаға қатысы барын жоғары деңгейде дәлелдеді деген пікірімен бөлісті. «Енді АҚШ үкіметі де бұл қылмысқа қатысты жауапкершілік танытып, келешекте халықаралық механизмде осындай қылмыстың алдын алып тиісті жазасын беруде өз орнын табуы тиіс. АҚШ Мохаммад бин Салман ханзадаға санкция жарияласын», дейді өкіл. Бұл мәлімдеме Байденнің саудиялық ханзадаға қатысты таққан айыбынан бір күннен кейін жарияланды.
Ханзада болса, қылмыс әшкереленген күннен бері бұл оқиғаға қатысты жауапкершілікті алатынын, алайда оған «тапсырыс бермегенін» мәлімдеді. Дегенмен, жауапты тұлғалар журналист өліміне қатысты 8 адамды тапқанын хабарлаған-ды. Үкімет олардың кім екенін әлі ашып айтпады.
Доминикан шекарасын шегендейді
Доминикан Республикасы шекарасын шегендегісі келетінін хабарлады. Ел президенті Луис Абинадер Гаитимен шектесетін аймақты нақтылап, екі арада шекара тұрғызғысы келетін ниетін білдірді.
Ресми ақпарат бойынша, аталған жердегі аймақ 380 шақырымды құрайды екен. Президент бұл шешімін арадағы заңсыз көші-қонға нүкте қойып, машина ұрлау мен есірткі тасымалын тоқтату қажеттігімен түсіндірді.
Абинадер шекара шегендеу жұмысы биылдан қалмайтынын мәлімдеді. Екі ел Кариб аралдарын бөлісіп отыр. Ал Гаити – сол аймақтағы ең кедей мемлекет. Екі ел арасындағы қатынас әуелден шиеленіске толы. «Алдағы екі жыл ішінде көршілес елдер арасындағы мәселелерге нүкте қойып, ұрланған заттар, есірткінің тасымалын тоқтатуға күш саламыз. Арадағы проблемалы аймақтарда екі қатарлы шекара салынады. Сонымен қатар ондай жерлерге камера орнатуды жоспарлап отырмыз», деді президент.
Жоба құны әзірге белгісіз. Дегенмен Доминикан үкіметі жобасын дайындап, шекара белгілеу бойынша жұмысқа кірісіп кеткен.
Екі ел арасындағы шиеленістер, негізінен осы көші-қон мәселесіне қатысты туындайды. Доминикан Республикасы халқының саны – 11 миллион. Дегенмен, ондағы заңсыз жүрген Гаити азаматтарының саны миллионға жетіп жығылады. Биыл қаңтарда Доминикан үкіметі Гаити үкіметінен елден жырақта жүрген азаматтарына арнайы құжат беріп, бұл мәселені бақылауына алуды тапсырған еді.
2015 жылы Гаити Доминикан Республикасынан мыңдаған азаматын жоспарлы түрде еліне қайтару бағдарламасын тоқтатуды сұраған болатын. Ал өз Отанына оралуды қаламайтын адамдар екі ел шекарасында лагерьлер құрып, сол жақта өмір сүретін. Бұл мәселенің шешімі табылмай жүргеніне 100 жылға жуық уақыт өтті. Доминикандықтардың ендігі үміті – жаңа жоспарда.
Дайындаған
Светлана ҒАЛЫМЖАНҚЫЗЫ,
«Egemen Qazaqstan»