Көбіне ер азаматтардың пәрмені мен дәурені жүретін бұл салаға келуіне ішкі істер органдарында қызмет еткен әкесі Төлеуғалидің берген тәрбиесі тікелей әсер еткен еді. «Әкеміз үй ішіндегі тәртіпке қатты мән беретін адам еді. Анамыз мектепте бастауыш сыныптардың мұғалімі болып қызмет етті, алғашқы ұстазым да өзі болды. Мұғалімнің баласы деген атқа кір келтірмеу үшін сабақты жақсы оқып, түзу жүру – біздің үйдегі жазылмаған заң еді. Яғни мен тәртіпті бірінші орынға қойған отбасында тәрбиеленіп өстім. Әлбетте, мұның қазіргідей дәрежеге жетуіме ықпалы молынан тиді деп сенімді түрде айта аламын», деп сыр ақтарды Ләззат Төлеуғалиқызы.
Орта мектепті бітіріп, арман қуып Қарағандыға келген жылы оқуға түсе алмады. Қаладағы «Динамо» фабрикасында тігінші болып бір жылдай жұмыс істейді. Содан кейін Жезқазғандағы университеттің тіл-әдебиет факультетіне түскен. Тағдырдың маңдайға жазғаны ғой, оқуын аяқтағаннан кейін мамандығы бойынша жұмыс істемей, Жезқазған қаласындағы өртке қарсы қызметті таңдады. Еңбек жолын осы жерде инспектор болып бастаған. Жұмыс істей жүріп, Е.Бөкетов атындағы ҚарМУ-дың заң факультетін тәмамдады.
Ләззат Төлеуғалиқызы басшылық ететін Жезқазған гарнизонына Жезқазған, Сәтбаев қалалары мен Ұлытау ауданы енеді. «Ұжымның негізгі бөлігі – ер азаматтар. Сол себепті де кейде қызмет бабында әйелге тән нәзіктікті ысырып қойып, еркекше сөйлесуге тура келетін жағдайлар болып тұрады. Жедел шешім қабылдау керек болғанда әскери қатаң тәртіпке негізделген мінез көрсетпесе тағы болмайды, – дейді полковник ханым. – Дегенмен ер адамдармен жұмыс істеудің жақсы жақтары да бар. Мысалы, олар айтқан тапсырманы тап-тұйнақтай қылып орындауға бейілді болып келеді. Жалпы, әйелдерді нәзік жандылар деп жатады ғой. Бұл дене күші тұрғысынан алып қарағанда рас та шығар. Бірақ біз рух күші, ерік-жігер жағынан ерлерден қалыса қоймаймыз».
Жалпы полковник ханым жұмыста қанша қатаң, талапшыл болғанымен, қызметкерлерді жазалау мен жұмыстан шығаруды мақсат еткен емес. Керісінше, олардың жағдайларына қарап, мәселелеріне бойлап, барынша тіл табысуға, керек болған жерінде көмек қолын созуға тырысып жүреді.
Төтенше жағдай қызметінің тірлігі қазандай қайнап жатады. Апаттың айтып келмейтін нешеме түрімен арпалысу айтқанға ғана оңай шаруа... Әлі есте, 2011 жылы Жезқазғанның маңындағы Қостанкелді елді мекенінде алапат тасқын болып, 152 үй су астында қалды. Өкінішке қарай, екі адам апаттың кесірінен көз жұмды. Міне, осындай қысылтаяң кезеңде Ләззат Төлеуғалиқызы уақытпен санаспай, апаттың салдарын жою жұмыстарына тікелей басшылық жасап, қауіптің бетін қайтара білді. Қазір бұл шағын ауданда суағар арықтар салынып, қауіпсіздік шаралары дұрыс жолға қойылған. Сондай-ақ 2015 жылы Ұлытау ауданындағы Жыланды ауылының маңында Сарысу өзені арнасынан асып, 40 үйді су басты. Сол кезде де полковник ханымның ұйымдастырушылық шеберлігінің арқасында тұрғындарды апаттан аман алып қалу, оларды қауіпсіз жерлерге көшіру жұмыстары жүйелі түрде жүргізілген еді.
Республикалық маңызы бар Павлодар – Қызылорда күрежолы бойында көктем және күз айларында қар еріп немесе нөсер жаңбыр болғанда құтқару жұмыстары қызу жүргізіледі. Тек былтырдың өзінде осы жолдың бойындағы проблемалық учаскелерде 700-ге жуық адам құтқарылып, 60-тан астам автокөлік батпақтан шығарылған екен.
Ләззат Төлеуғалиқызы басқаратын ұжым Жезқазған өңірі аумағында құлаған ғарыш зымырандарының қалдығын іздеп тауып, оларды қауіпсіз жерлерге жинастыру жұмыстарымен де айналысады. Мәселен, 2018 жылы «Союз» зымыраны құлағанда, оның қалдықтарын табу кезінде көптеген шаруаны тындырды. Ғарыштан жерге оралған ғарышкерлерді құтқару іс-шараларына да атсалысып тұру – тікелей міндеттерінің бірі. «Біздің негізгі мақсатымыз – адам өмірін құтқару және мемлекетке келер шығынды мейлінше азайту», – дейді полковник ханым.
Ләззат Төлеуғалиқызы – отбасында өзін бақытты санайтын жанның бірі. «Сексеннің бесеуіне келген анам бар, – дейді ол. – Сол кісінің маңдайымнан иіскегені жаныма шуақ құяды, әл береді».
Жалғыз қызы Фаризаның өмірдегі жетістіктері – анасы үшін үлкен қуаныш. Қызы мектепті, одан кейін Алматыдағы жоғары оқу орнын үздік тәмамдады. Қазіргі уақытта беделді бір мекемеде халықаралық деңгейдегі заңгер болып, абыроймен еңбек етіп жүр.
Бүгінде Ләззат Төлеуғалиқызының төтенше жағдай саласында қызмет атқарғанына 27 жыл болыпты. Осы жылдар аралығында өзінің кәсібіне деген адалдықтан айныған емес. Жоғары басшылық тарапынан үнемі алғыс алып, құрмет көріп келеді. Қалтқысыз қызметі лайықты бағаланып, ведомстволық наградалармен марапатталған.
Жұмыстан тыс уақытта Ләззат Төлеуғалиқызын үй шаруасындағы әйел кейпінде елестету қиындау шаруа. Бірақ шыны сол: мундирді шешкен соң, алжапқышты байлап алып, ас үйде тамақ пісіруді ұнатады. Ал қолы қалт еткенде, табиғат аясында демалғанды жақсы көреді. «Сайын даланың аңызақ желі, жусанның иісі маған күш-қуат береді», – дейді сыртқа сұсты көрінгенмен, жаны нәзік және сұлу полковник ханым.
Қарағанды облысы,
Жезқазған қаласы