«Қазгидрометтің» мәліметіне сүйенсек, Қазақстанның басым бөлігінде қар еру үрдісі жалғасып жатыр. Қызылорда, Атырау және Маңғыстау облыстары аумағында және Түркістан, Жамбыл, Алматы облыстарының жазық жерлерінде қар түгелдей еріп кеткен. Алайда республиканың таулы өңірлерінде (Шығыс Қазақстан, Алматы, Жамбыл және Түркістан облыстарында) тасқын қаупі қар еру және жауын-шашын кезінде де сақталады.
«Осы көктемде суық күндердің созылуына байланысты қар әдеттегіден баяу еріді. Осыған байланысты, Қарағанды, Ақмола, Солтүстік Қазақстан, Қостанай, Ақтөбе, сондай-ақ Батыс Қазақстан облыстарында қар әлі де толығымен еріген жоқ. Ауа райы күрт жылынып, нөсерлі жауын жауса, аталған өңірлерді су басуы мүмкін. Сырдария және Іле өзендері мұздан толығымен тазарды. Ертіс өзенінің Шығыс Қазақстан және Павлодар облыстары аумағында мұз еру жалғасып, бұл сең кептелісіне және судың жайылма аумақтарына шығуына соқтыруы мүмкін. Тұтастай алғанда, биыл 2015-2017 жылдар аралығындағы сияқты табиғи апаттар күтіліп отырған жоқ. Бірақ та күн райының күрт құбылуы салдарынан қатты жауын-шашын болса, Қарағанды, Ақмола, Солтүстік Қазақстан, Қостанай, Алматы, Түркістан, Жамбыл және Шығыс Қазақстан облыстарын ішінара су басуы мүмкін», деді С.Қожаниязов.
Сол себепті тасқын судан келетін қауіптің алдын алу мақсатында Су ресурстары комитетінде су тасқынына қарсы комиссия құрылған. Мұндай комиссиялар «Қазсушар» кәсіпорны мен оның филиалдарында да жұмыс істеп жатыр.
«Гидротехникалық нысандарды пайдалану қағидаларына сәйкес кез келген су қоймасында оны толтырып, күтілетін түсімдерге байланысты су тасқынын өткізу кестесі әзірленді. Қауіпті кезең басталғанға дейін тасқын суларды жинақтап, қарқынды су тасқыны кезіндегі маневр үшін су қоймаларында бос сыйымдылықтар қоры қамтамасыз етілді. Бүгінде ірі су қоймаларындағы орташа судың көлемі 70-75%-ды құрап отыр. Бұлар жобалық көлемге дейін толтырылады және үлкен тасқын келген жағдайда транзиттік режімде жұмыс істейтін болады», деді вице-министр.
Министрдің орынбасары айтқандай, су қоймаларының жұмыс режіміне күнделікті мониторинг белгіленіп, республикалық нысандарда тәулік бойы кезекшілік ұйымдастырылған. Қауіпті учаскелерде құрылыс және басқа материалдардың қажетті қорлары, сондай-ақ тиісті техника мен жанар-жағармай материалдарының қоры жеткілікті.
«Коммуналдық және жеке гидротехникалық нысандарда бос сыйымдылықтарды ұлғайту, өзендер арналарын тазалау, инженерлік қорғаныстарды жөндеу және құру бойынша бұрын берілген ұсынымдардың орындалуын бақылау зерттеулері жүргізілуде. Жауған қардың үлкен көлемін ескеріп, қар күрт еріген жағдайда су қоймаларынан ағызылатын су көлемі едәуір артатыны сөзсіз. Осыған байланысты жергілікті атқарушы органдар елді мекендерге жақын орналасқан су қоймаларынан ағызылатын суды бұруға қажет арналардың өткізу қабілетін ұлғайту жөніндегі жұмыстарды жеделдетіп, күшейтуі қажет», деді вице-министр.
С.Қожаниязов су қоймаларының бос сыйымдылықтарын қалыптастырумен қатар, арналар тазаланған жағдайда ғана ықтимал апатты шығынсыз өткеру мүмкін екенін айтты.