Жауапты ведомствоның ақпаратына сүйенсек, былтыр сауда көлемі 9,7%-ға өсіп, 111,8 млн долларға жетті. Б.Сұлтановтың айтуынша, екі елдің сауда-саттық мәселесінде әртараптандыру қажеттілігі туындап отыр. Қазақстан өзара сауданы арттыру мақсатында бірқатар ұсыныс жасап, жалпы сомасы 302 млн доллар болатын 45 өнімнен тұратын әлеуетті тауарлар тізбесін жеткізуге дайын.
Сонымен қатар министр Қазақстанда сұлы, зығыр, күнбағыс және дәрілік шөптер өсіруге бағытталған органикалық өнімдердің 60-тан астам өндірушісі жұмыс істейтінін айтты. Кәсіпорындардың бір бөлігі қазір Еуропалық одақтың уәкілетті органдарында аккредиттеуден өтіп жатыр.
Министрліктің дерегі бойынша еліміз ЕО елдеріне жылына 10 млн еуроға органикалық өнім экспорттайды. Десе де бұл соманы жылына 200 млн еуроға дейін арттыруға отандық экспорттаушылардың әлеуеті зор. Кәрі құрлықта органикалық өнімдерді тұтыну көлемі жылына 20 млрд еуродан асып жығылады.
Келіссөздер барысында тұтынушыларды қазақстандық және мажарстандық өндіріс өнімдерімен таныстыру үшін онлайн форматта сауда миссияларын өткізу мүмкіндігі қарастырылды. Бұдан басқа Б.Сұлтанов Қазақстанның агроөнеркәсіптік кешенінің әлеуеті туралы айтып, мажарлық тарапқа стандарттар мен өнім сапасына қанығу үшін тауарларды ғылыми зерттеуге және сертификаттауға қатысуды ұсынды.
Ведомство басшысы көтерме-тарату орталығы мен трансшекаралық сауда орталықтарын құру аясында ұлттық тауар өткізу жүйесі желісін құру жөніндегі жоспарларымен бөлісті. Мажарстаннан инвестиция тарту үшін «Қорғас» Шекара маңындағы ынтымақтастық халықаралық орталығының әлеуетін пайдаланып, ҚХР-дың нарығына көтерме-бөлшек экспорттауға алаң ретінде пайдалану ұсынылды.
Тараптар өнеркәсіп, су ресурстарын басқару, сондай-ақ геология саласындағы байланысты да арттыруға қарсы емес екендерін жеткізді.
«Екі елдің арасында көлік сервистерінің тиімділігін, шектес нарықтарға шығу үшін логистикалық инфрақұрылымды өзара пайдалану, сондай-ақ бірлескен жобаларды іске асыруды жолға қою қажет. Бұл Мажарстанға Орталық Азия мен Қытайға, ал Қазақстан үшін Шығыс және Орталық Еуропа елдеріне шығуға тиімді», деді Сауда және интеграция министрі.
Бүгінде Қазақстанның транзиттік әлеуетін Мажарстан контейнерлік пойыздар арқылы Қытаймен экспорттық-импорттық өнімді жерүсті көлігімен жедел жеткізу үшін (тұрақты контейнерлік пойыздар Сиань, Шэньси және басқа Қытай қалаларынан, сондай-ақ Қазақстан мен Украина арқылы кері бағытта жүреді) пайдаланып келеді.
Еліміз бен Шығыс Еуропа елдері арасындағы сауданы дамыту үшін еуропалықтарға Қазақстанның сауда өкілдігін құру ұсынылды.
«Мажарстанның Конституциясында тамақ құрамында гендік модификацияланған қоспалар болмауы керек деп жазылған. Сондықтан Мажарстаннан сатып алынған барлық өнімнің қауіпсіз екеніне кепілдік бере аламыз. Сертификаттау жүйесін үйлестіру қажет, онымен келісеміз және Түркі кеңесі елдері қолданатын сертификаттарды өзара қағидат бойынша мойындауға дайынбыз», деді Мажарстанның Сыртқы істер және сыртқы сауда министрі.
Мажарстанның делегациясы өзара сауданың іс-қимылы үшін қаржы базасын қамтамасыз ету қажет екенін және Еуразиялық даму банкіне қабылдауға байланысты қолдау сұрады.
