Қоғамдық келісім кеңестерінің мүшелері ел ішінде беделі бар, сөзі өтімді тұлғалардың арасынан сайланады. Олар қоғамдағы татулық пен тұрақтылықтың сақталуына жергілікті билік өкілдерімен бірлесе қызмет етуде. Бүгінгі күні жергілікті атқарушы билік өкілдерінің Қоғамдық келісім кеңестерімен санасатынын байқап отырмыз. Демек, бұл олардың айтары барын, халық атынан сөйлеуде, салмақты ой айтуда орны бөлек екендігін аңғартады.
Біздің өңірде 1 облыстық, 10 аудандық, 3 қалалық, 154 ауылдық округ пен 13 ірі мекемеде барлығы 181 Қоғамдық келісім кеңесі құрылып, жұмыс жүргізуде. Достық үйінде облыстық Қоғамдық кеңес және ҚХА Қоғамдық келісім кеңесі мен Аналар кеңесі бірлесіп құрған 4 топ «Бірыңғай ашық есік күні» аясында тұрғындардың өзекті мәселелері бойынша қабылдаулар жүргізеді. Атап айтқанда, көп балалы отбасыларды тұрғын үймен қамтамасыз ету, жолдарды жөндеу, газдандыру, көшелерді жарықтандыру, тұрғын үйлер салу үшін жер беру, аялдамалар салу, көп балалы, жағдайы төмен, жас отбасыларға материалдық, әлеуметтік көмек беру, аймақтарды абаттандыру, мектептер үшін кітаптар сатып алу, елді мекендер тұрғындарының қауіпсіздігі, қарияларға көмек көрсету, өрттен зардап шеккендерге үйді жөндеуге қаржылық көмек көрсету және басқа мәселелер шешімін тапты. Сондай-ақ қалада инфрақұрылым мен коммуналдық қызметтердің тарифтік саясатын жүргізу, ауылдардағы емханалар, кәсіпкерлікті қолдау және заңсыз тексерулерден қорғау бойынша және жанжал жағдайларының алдын алу, дауларды медиация қағидаттарын қолдана отырып шешу бойынша түйткілді мәселелер шешімін тапты. Қазіргі уақытта қоғамдағы тұрақтылыққа аса зор назар аударып отырған Қоғамдық келісім кеңестері билік пен тұрғындар арасындағы әмбебап диалог алаңына айналды.
Жасыратыны жоқ, Қордай ауданында орын алған келеңсіз жағдай бәрімізге үлкен сабақ болды. Ендігі міндет – осындай жағдайға жол бермеу. Сондықтан да Қордай оқиғаларынан кейін ауданда бірлескен Қоғамдық келісім кеңесі қайта құрылып, оның құрамына өз ортасында беделді және көпшілікке айтары мол, өмірлік бай тәжірибесі бар қоғамдық пікір жетекшілері енгізілді.
Қазіргі таңда Қордай, Меркі, Шу, Байзақ, Жамбыл, Талас, Сарысу аудандарында 8 бірлескен Қоғамдық келісім кеңесі құрылып, жаңа бағытта жұмыс атқаруды белсенді қолға алды. Бірлескен қоғамдық келісім кеңестерінің құрамына ардагерлер кеңесі, мектеп директорлары, ауыл ақсақалдары, этномәдени бірлестіктер, зиялы қауым өкілдері, мешіт имамдары енгізілді. Бұл жұмыс облыстың басқа аудандарында да жүзеге асырылатын болады.
Жамбыл облысының Сарысу, Талас, Байзақ және Меркі аудандарында ҚХА-ның «Қайырымдылық керуені» аясында облыстық Қоғамдық келісім кеңесінің «Жергілікті атқарушы билік органдары мен Қоғамдық келісім кеңесінің қоғамдық бірлік пен келісімді нығайтудағы өзара іс-қимылы» тақырыбында көшпелі отырыстары өтіп, оларда инфрақұрылымды жақсарту, жайылымдық жер, ұлттық кәсіп – қолөнерді жаңғырту мәселелері бойынша қоғамдық қабылдаулар ұйымдастырылды.
Сонымен бірге «Бейбітшілік пен келісім» жобасы аясында Меркі, Шу, Байзақ, Жамбыл, Талас, Сарысу аудандарында тиісті сала мамандары аудан тұрғындарымен кездесіп, аймақ тұрғындарының мәселелерін нақты шешуді мақсат етіп отыр. Облыс аудандарында халықты толғандыратын мәселелерді анықтауға, өңірдегі этносаралық келісімді нығайтуға бағытталған 55 іс-шара, әлеуметтік сауалдама өткізілді. Нәтижесінде тиісті мемлекеттік органдарға ұсыныстар жіберілді. Кездесу барысында жастар арасындағы жұмыссыздық, спорт және мәдени кешендердің жоқтығы, интернет күшінің төмендігі, азық-түлік бағасының қымбаттауы және этностық белгісі бойынша қысым көрсету сынды мәселелер талқыланды.
Сондай-ақ аудандардағы Қоғамдық келісім кеңестерінің кеңейтілген отырыстары өтіп, ауыл жастарының құқықтық сауатын арттыру, патриоттық сезімдерін ояту, Отан алдындағы әскери борышын өтеуге тарту, діни ұйымдар жұмысын қадағалау, білім алуға әртүрлі этнос балаларының толық қамтылуы, жастардың барлығының мемлекеттік тілді меңгеруі сияқты бірқатар мәселе көтерілді.
Алдағы уақытта да облыс тұрғындары мен жергілікті қоғамдық басқару орындары арасында оң байланысты қамтамасыз етіп, қоғамдағы тұрақтылықты, азаматтық татулықты, бірлік пен келісімді нығайтуда Қоғамдық келісім кеңестерінің рөлі жоғары боларына сеніміміз мол.
Бигелді ТӘЖІБАЕВ,
Қазақстан халқы Жамбыл облыстық ассамблеясының Бірлескен қоғамдық келісім кеңесінің төрағасы