Коллажды жасаған Зәуреш СМАҒҰЛ, «EQ»
Ақша айналымы 900 млрд теңгеге жетті
«Қазпошта» АҚ деректеріне сүйенсек, 2020 жылы электронды сауда нарығындағы ақша айналымы 900 млрд теңгеге жетті. Бұл бөлшек сауданың жалпы көлемінің 9%-ын құраған. 2025 жылға қарай осы көрсеткіш 3,5 трлн теңгеге немесе бөлшек сауданың жалпы көлемінің шамамен 15%-ына жетеді деп болжанып отыр.
Ұлттық банктің дерегі бойынша биыл қаңтар-ақпан аралығында қазақстандық эмитенттердің төлем карталарын пайдаланудың нәтижесінде транзакциялар көлемі 744,6 млн-ға жетіп, 10,4 трлн теңгені құраған еді. Бұл ретте аталған кезеңде қолма-қол ақшасыз транзакциялар саны 2,3 есеге өсіп, яғни 703,1 млн операцияға дейін артты немесе ақшалай сомада 7,7 трлн теңгеге дейін жеткенін айта кеткен орынды. Қолма-қол ақшаны алуға байланысты төлем карта иелері 2 663,7 млрд теңге сомаға 41,5 млн операция жүргізген. Қазақстанда қолма-қол ақшасыз операциялардың негізгі үлесі мобильді интернет банкингке (операциялардың жалпы санының 65,7%-ы мен қолма-қол ақшасыз төлемдер мен ақша аударымдарының жалпы көлемінің 82,0%-ы) және POS терминалдарға (қолма-қол ақшасыз төлемдер мен ақша аударымдарының жалпы саны мен көлемінің
34,2%-ы және 17,5%-ын құрайды) тиесілі.
Қолма-қол ақшаны алуға байланысты операциялар негізінен банкоматтар арқылы (операциялардың жалпы саны мен көлемінің 98,6%-ын және 89,2%-ын құрайды) іске асырылған. Десе де былтырғы ұқсас кезеңмен салыстырғанда бұл бағыттағы операциялар саны 20,7%-ға азайса керек.
Электронды коммерцияның бүгінгі әлеуетін ескерсек, саланы дамыту ерекше сипат алып отырғанын байқау қиын емес.
100 компания «Алтын тасымалдаушы» мәртебесін иеленді
«Қазір QazTrade өз құзыретінің аясында отандық тауар өндірушілерді халықаралық электронды алаңдарға шығаруға байланысты, сол секілді интернет-сауданы жүргізуге қатысты шағын және орта бизнес кәсіпорындарына ақпараттық-талдау жұмыстарын жүргізуді жолға қойды. QazTrade былтырдан бастап, отандық тауар өндірушілерді Alibaba.com сынды халықаралық сауда алаңдарына шығару мәселелерімен айналысатын уәкілетті орган саналады. Мәселен, 2020 жылдың қорытындысына сәйкес, 100 компания аталған платформада «Алтын тасымалдаушы» (Gold Supplier) мәртебесін иеленіп, олардың ішінде 71 компанияның аккаунты жұмыс істеп тұр. Тұтастай алғанда, осы бағыттағы қолдау шарасының нәтижелерін оң бағалаймыз. Бұл арқылы отандық кәсіпорындар 18,1 млн долларға өз өнімдерін сатуға мүмкіндік алды», делінген QazTrade орталығының берген ақпаратында.
Осы тетік қазір кәсіпкерлер арасында үлкен сұранысқа ие. Мысалы, қазақстандық өндірушілер өнімдерін тек 6 мың долларға ғана сатқан күннің өзінде «Алтын тасымалдаушы» аккаунтының пайдалану мерзімін өз есептерінен ұзартып, қолданып жүр. Себебі іскер азаматтар бұл өткізу нарығының әлеуеті қаншалықты маңызды екенін жақсы түсінеді. Бүгінде 4 компания аккаунттарының қолдану мерзімін ұзартып, тұтастай сауда алаңында 4 мыңнан астам қазақстандық тауар ұсынылған.
Экспорттық тасымал 100 млн долларға артады
«Компанияларды іріктеумен қатар, интернет платформада шағын сайттарды құруды қамтитын сервистік қызметті көрсетуден бөлек, отандық өндірушілердің өнімін сыртқы нарықтарда нысаналы түрде ілгерілету бойынша жұмыстар атқарылуда. Осылайша, қазақстандық компаниялар жайлы мәліметті қамтитын бүктемелер әзірленіп, шетелдік ұйымдарға жіберілді. Бұдан басқа, бизнес қауымдастық өкілдерімен тұрақты байланыс орнатып, барлық қажетті әдістемелік және жедел қолдауды көрсетіп келеміз. Қазір 2-кезеңде іріктелген 50 компания «жетілдірілу» сатысында тұр. Ықтимал сатып алушылармен келіссөздер жүргізіліп, өнімнің сынамалы партиялары жіберілетін болады.
Биыл іске асырылатын 3-кезең мен интернет платформаға шығарылатын қосымша 50 компанияны ескерсек, 2022 жылдың ортасына қарай экспорттық тасымалдың жиынтық көлемін 50 млн доллардан 100 млн долларға дейін арттыруға мүмкіндігіміз бар», деді сауда саясатын дамыту орталығының өкілдері.
Аталған орталықтың мәліметіне сәйкес, халықаралық электронды коммерцияның әлеуетті қатысушыларын ақпараттық сүйемелдеу бойынша да проактивті жұмыс жүргізіліп келеді. Айталық, осы жылдың басынан бері Amazon, Rakuten, «ТрейдКи», GlobalSources және ресейлік маркетплейстерді қоса алғанда 6 ірі халықаралық электронды сауда алаңына арнайы шолу дайындалды.
Qaztrade мамандары қазіргі халықаралық платформалар мен жаңа алаңдарға тұрақты түрде мониторинг жүргізілетіндігін айтты. Атап айтқанда, сәуірдің басында Қазақстан мен Ресейдің сауда өкілдіктері бірлесіп, KazanExpress халықаралық сауда алаңына өнімді шығаруға байланысты оқыту вебинарын өткізді. Оған қатысуға шамамен 40-қа жуық кәсіпорын ниет танытыпты. Сөз орайы келгенде айта кетейік, Kazan Express – өнімді бір күнде 34 қалаға тегін жеткізуге қауқарлы 3 мыңнан астам дүкенді қамтитын Ресейдегі жылдам дамып келе жатқан маркетплейс.
Әлбетте, Amazon, Rakuten сынды халықаралық сауда алаңдарына шығуға ниетті отандық бизнес өкілдері жеткілікті. Алайда белгілі бір себептерге байланысты олардың кейбірі мұндай платформаларда сауда-саттықпен айналысуға дайын емес. Қазір бұған қатысты мәселелерді шешуге тұрақты негізде күш салынып келеді.
Бұдан бөлек, Халықаралық сауда орталығы және Еуропалық Одақпен бірлесіп, Орталық Азиядағы өңірлік және халықаралық сауданы қолдауға бағытталған Ready4Trade Central Asia ұзақ мерзімді жобасы іске асырылып жатыр.
«Соған сәйкес, шағын және орта бизнес иелерін онлайн саудаға дағдыландырумен айналысатын 9 ұлттық бизнес-тренер арнайы оқытылып, тоқыма, тігін ісі, қолөнер және агробизнес саласында жұмыс істейтін шағын және орта бизнестің 45 өкілі іріктеліп алынды», деп нақтылады Qaztrade мамандары.
Аталған жобаны іске асыру арқылы кәсібін онлайн ортада белсенді жүргізетін отандық кәсіпорындардың пулы қалыптасады деп күтілуде.
Цифрландыру жаһандық сауданың өсуіне ықпал етті
Осыдан бір ай бұрын халықаралық экспресс тасымалы мен логистика саласындағы әлемдік көшбасшы саналатын DHL Express компаниясы «B2B сегментіндегі электронды коммерцияның толық нұсқаулығы: дәстүрлі тәсілді алмастыратын цифрлы шешімдер» атты жаңа зерттеуін жариялаған еді. Бұл зерттеуде таяу жылдардағы B2B сегментіндегі электронды коммерция нарығының динамикалық даму болжамы ұсынылды. Соған сәйкес, 2025 жылға қарай тасымалдаушылар мен тұтынушылар арасындағы өзара іс-қимылдың 80%-ы цифрлы арналар арқылы жүзеге асырылады деп айтылды.
Цифрландырудың қарқын алуымен бірге сатып алу мәдениетінің өзгеруіне байланысты электронды коммерция B2C сегментінен бөлек, сондай-ақ B2B сегментінде, яғни компаниялар арасында да өсу үстінде. Нақты айтсақ, пандемияға дейін 2019 жылы B2B сайттары мен маркетплейстердегі жаһандық сатылымдар 18,2%-ға өсіп, 12,2 трлн долларға жетті. Демек, B2C сегментінен асып түссе керек. Пандемия мен цифрландырудың қарқынды енгізілуіне байланысты B2B бағытындағы жаһандық сату көлемі 2027 жылға қарай 20,9 трлн долларды құрайды деп бағаланып отыр.
«Пандемия жағдайында өмір сүріп жатқанымызға бір жылдан асты. Осы уақыт ішінде цифрлы эволюцияның он жылға серпіліс жасағанына, сондай-ақ онлайн сауда мен трансшекаралық тасымалдар күнделікті атқарылатын іске айналғанына куә болып отырмыз. Бұл тек B2C бизнесі үшін ғана маңызды емес. Сонымен қатар B2B сегментіндегі электронды коммерция үшін де маңыздылығы өзекті. Алуан түрлі компаниялар онлайн сауда платформасының бизнесті өркендетуде қаншалықты ықпалды екенін жақсы түсінді», деді DHL Express компаниясының Еуропадағы және жаһандық деңгейдегі атқарушы вице-президенті Михель Гривен.
Компанияның қаржылық есебіне сенсек, DHL Express желісіндегі B2C компанияларының онлайн тапсырыстарының көлемі былтыр 2019 жылмен салыстырғанда 40%-ға өскен.