Мақсаты айқын, қалыптасқан, орнықты құрылым

Қазақстан халқы Ассамблеясы бүгінде Парламентте өкілдігі бар жалпыұлттық институт болып қалыптасты. Бұл түсіне білген адамға үлкен дүние. Осы ұйымның қажырлы еңбегінің арқасында бейбітшілік пен ты­ныштық, ынтымақтастық пен сенім қоғамда орныға түсті. Ол азаматтық қоғамға тән құры­лым­ның озық үлгісін көрсете алды. Елбасының осы саладағы саясаты әлем елдері арасында мо­йындалып, БҰҰ-да бұған үнемі жоғары баға беріп келеді.

Тағы бір айта кететін жайт, мемлекеттік тіл – қазақ тілі бар­лық этностар арасында қолдау тауып, біріктіруші рөл атқаратын дәре­жеге жетіп қалды. Бұл да мем­лекет саясатының дұрыс ба­ғыт­та келе жатқандығының бір дәлелі.

Қазақстандағы азаматтардың теңдігі мен этносаралық қаты­нас­тар тұрақтылығына жоғары баға беруге болады. Тәуелсіздік алғаннан бері Елбасы Н.Ә. Назар­баев этносаралық татулық пен келі­сімді сақтауға, дамытуға барынша күш-жігерін салды. Бұл өз кезегінде Қазақстан Президенті Қасым-Жомарт Тоқаевтың сали­қалы саясаты негізінде жалғасын табуда.

Еліміздегі бейбітшілік пен келісім тұрақтылық пен орнық­ты даму кепілі екенін халық терең түсінеді. Қазақстан жал­пы­ адамзаттық дәстүрлерді сақ­тай отырып, сарабдал саясат пен мемлекет дамуының дұрыс, айқын жолын таңдады. Осы орайда Қазақстан халқы Ассам­блеясы да мемлекетіміздегі этнос­аралық қатынастарға байланыс­ты жүргізіліп отырған саясатты жақсы жағынан көрсете білді.

Мәселен, жылдың басында Жамбыл облысындағы Масанчи ауылында Өтеген, Қаракемер, Сортөбе, Қарасай ауы­лының ақсақалдары бас болып, қоғам белсенділерінің ұйым­дастырумен өткен іс-шараларды ерекше атап көрсетуге болады. Олар осы ауылдарда концерттік бағдарламалар, көрмелер мен ұлттық өнер түрлерін көрсетіп, бірлесе жүріп көшеттер отыр­ғызды. Мешіттерде дұға оқылды. Бұл іс-шаралар барысында тұр­ғындарға қоғамдық келісім мен татулықтың, бірліктің қадірін ұғын­дыра түсу негізгі басым бағыт, мақсат болды.

Әрине, мұндай шаралар тек биыл ғана емес, біз көзімізді ашқалы бері өтіп келе жатыр. Бала кезімдегі оқиғалар әлі есімде, ата-анамызбен Күнбатыс деген тау бөктеріндегі ауылда тұратынбыз. Ол кезде осындай іс шаралар іргелес ауылдардың бірлесуімен өте жиі өтетін. Және бұл шаралар бұқаралық ақпарат құралдарында жиі жарық көріп жататын.

Ауыл-ауыл өзара тығыз қаты­­нас орнатып, дос болысып, ара­сында түрлі этностар өз ара­сында қыз алысып, қыз берісіп, құдандалы да болып жата­тын. Бұның өзі береке-бірлік­тің, достықтың көрінісі емес пе? Осындай іс-шараларды қазір де көптеп өткізіп, ақпарат құралда­ры арқылы насихаттауды күшей­те түсу қажет деп ойлаймын. Біздің идеологтар осы жағын жіті қадағаласа дұрыс болар еді.

Бүгінде Ассамблея өкілдері бел­сене қатысатын қоғамдық кеңес­тердің жұмысы қарқын алып отыр.

Жалпы, Қазақстан халқы Ассам­блеясы өз жұмысына әрда­йым жауапкершілікпен қарап келеді. Солай десек те, жаңа көзқа­рас пен жақсы жұмыс істеу әдісі керек. Атап айтсақ, респуб­ликалық Ғылыми-сараптамалық кеңес қоғамға төнетін ықтимал қауіп-қатердің алдын алу үшін алдын-ала іргелі зерттеу, зерделеу жұмыстарын жүргізуі қажет.

Кейде ғалымдар мен сарап­шы­лардың жұмыстарын қоғам­дық-саяси алаңдарда ашық жүр­гізу жағы жетіспей жатады. Сол себептен көпшілік мұнда атқарылып жатқан істерден хабардар бола бермейді.

Ғылыми-сараптамалық ке­ңес құрамында 50-ден астам ға­лым жұмыс істейді. Жоғары оқу орындарында да Қазақстан хал­қы Ассамблеясы кафедралары ашылып, жұмыс істеуде. Осыдан бір-екі жыл бұрын ғана Абай атындағы Қазақ ұлттық педагогикалық университетінде бірінші курс студенттері үшін «Н.Ә.Назарбаевтың этнос­а­­ара­лық келісімінің Қазақ­стандағы үлгісі» пәні енгізіліп, жастар осы төңіректе білім алып жатыр. Сонымен қатар, Мем­лекеттік бас­­қару акаде­мия­сының Орта­лық Азия айма­ғындағы этнос­ара­лық және конфес­­сияара­лық қаты­настарды зерттеу орта­лығы мен Ұлттық эконо­мика министр­­лігінің «Эко­но­­микалық зерт­теулер инсти­туты» АҚ әлеумет­тік-демогра­фиялық дамуды зерт­теу орта­лығы құ­рылған. Осы кеңестер мен орталық­тар­дың атқарып жат­қан істері Ассам­блея­ның жұмы­сын алға ілге­ріле­туде қомақты үлес қосып отыр.

Тағы бір ерекше тоқтала кетер жайт, Қазақстан халқы Ассам­блеясы құрылғаннан бері қайы­рым­дылық істерге мұрын­дық болып келеді. Былтырдан бері аймақтардағы Достық үйлер­інде Қазақстан халқы Ассам­блея­сының еріктілер қозғалысы құрылып, жұмыс істеп жатыр. Бұл игі іс келешекте де жалғасын таба береді.

Алайда «Оң қолың бергенді сол қолың көрмесін» деген қазақ­тың аталы сөзі бар. Өкініш­ке қарай, кейбір азаматтар бір дорба азық-түлік апарса, жетпей отыр­ған сол отбасының бала-ша­­ғасымен суретке түсіп, әлеу­мет­тік желіге жариялайды. Бұл ыңғайсыз дү­ние. «Жақ­сылық қылсаң жасыр, жақ­сылық көр­сең асыр» демей ме?! Негізі жа­риясыз қылған қайы­рымды­лықтың сауабы мол. Кері­сінше, қайырымдылыққа қомақты қаражат бөліп, алайда аты-жөнін еш жерде жарияламауды өтінетін жомарт жандар да бар...

Қалай десек те әлеуметтік жағ­­дайы төмен отбасыларға көмек беру сауапты, игі іс. Бұл бағыт­тағы жұмыстардың игілігін мұқ­таж жандар барынша көріп жатса, ол біздің қоғамымыздың ізгілігін, мейірімділігін көрсе­теді. Әсілінде, қоғамдағы аз қамта­масыз етілген отбасылар не­гізінен Үкіметтің жауапкер­ші­лігінде болуға тиіс деп ойлаймын. Ал аз қамтылған, көмекке зәру азаматтарымыз Үкіметтің қол­да­уынан бөлек, қосымша өз отан­дас­тарынан, жерлестерінен қайы­рымдылық көріп жатса, қанеки.

Қорыта айтқанда, Қазақстан халқы Ассамблеясы қалыптасқан, орнықты институт ретінде қоға­мы­мыздың дамуына, оның бірлі­гінің нығаюына барынша атса­лысып келеді. ҚХА бұл бағыт­тағы жұмыстарын әрі қарай жал­ғастыра бермек.

Ілияс БҰЛАРОВ,

Парламент Мәжілісінің депутаты