Мемлекет кепілдігімен кәсіп ашқан ана

Бірақ кәсіпкерлік те жалына қол, сауырына қамшы тимеген асау секілді ырыққа көне қой­май­тын сала. Мұны өмірлік жары­мен бірге бес бала тәрбиелеп отыр­ған Нұрайна Асылбекқызы жоқ­қ­а шы­ғармайды. Отағасымен ақыл­дасқан ол кәсіпкерлігін ауыл шаруа­шылығы саласында бастауға бел буып, «Ауыл шаруашылығын қар­жы­лай қолдау қоры» АҚ арқылы несие­сін кепілдендіріп отыр.

– Отағасының жалақысын, бес бала үшін берілетін жәрдемақыны місе тұтып, отыра беруге болатын еді. Алайда балалар өсіп келе жатыр. Үлкеніміз – студент, одан ке­йін­гісі колледж бітір­гелі отыр. Ке­йін­гілері мектепте оқи­ды. Оларды еңбек етуге баулу қа­жет. Оның үс­тіне өзім ауылда өс­кен­­діктен, төрт түлік­ті жақсы кө­ре­­мін. Бұл ойым­­ды отағасы да қол­­дады, – дейді Нұ­райна Нұр­хатова. – Бұл кәсіпкер­лігімді ауыл шаруа­шылығы саласында бас­тауы­ма ықпал етті.

Дегенмен қаржының жоқтығы қолбайлау болыпты. Банктің па­йызы жоғары несиесін алуға тәуекел етпеді. Сөйтіп «Қаржыгер» несие серіктігінен 6 млн 945 мың теңге қаржы алды. Алайда бұл қаржыға кепілдік қажеттігі туындады.

– Сол себептен, «Ауыл шаруа­шылығын қаржылай қолдау қоры» АҚ-ның Атырау облыстық фи­лиалына жүгіндім. Қор мамандары 5 млн 970 мың теңгені кепілден­діру туралы құжат рәсімдеді. Бұл – мен алған қаржының 86 пайызы. Алғаш рет кәсіп бастағанға осындай қолдау көрсетілгеніне қуандым. Әйтпесе, банкті айтпағанда, несие серіктестігінің өзінен несие ала алмауым мүмкін еді, – дейді Нұрайна Асылбекқызы.

Ойға алған ісін тезірек бастауды көздеген ол былтырғы қаңтар­да «Нұрайна» жеке кәсіпкерлігін тіркетіп, 9 інген сатып алды. Әрине, төрт түліктің төресіне баланған түйеге де жайылым керек. Сол себептен, 800 гектар жерді 10 жылға алып отыр.

– Мақсатымыз – балаларымызды еңбекке тәрбиелеу. Балаларымызға маңдай термен тапқан нанның дәмі тәтті болатынын ұғындырсақ дейміз. Биыл колледж бітіретін ұлымыз Бек­сұлтан кәсібімізді дамытуға ын­та білдіріп отыр, – дейді ауыл ша­руа­шылығы саласында кәсібін бас­таған көп балалы ана.

Оның іске асыруды көздеген жоспары да көп. Соның бірі – болашақта түйе сүтін өңдейтін шағын цех ашу.

– Қазір түйе сүтінен дайындалатын шұбатқа сұраныс артып келеді. Сондықтан қолға алған ісіміз ілгері басарына сенемін. Бәлкім, біз де сүт өңдеу цехын іске қосуымыз мүмкін. Сол кезде жұмыс орындарын ашатын боламыз, – дейді Н.Нұрхатова.

Нұрайна секілді кәсібін ауыл шаруашылығымен байланыс­тыр­ған жандарға «Еңбек» нәтиже­лі жұмыс­пен қамтуды және жаппай кәсіпкерлікті дамытудың 2017-2021 жылдарға арналған бағдарламасы бойынша қолдау көрсетіледі. Бұған «Ауыл шаруашылығын қаржылай қолдау қоры» акционерлік қоғамы да атсалысып отыр. Мәселен, атал­ған қордың өңірдегі филиалының директоры Гүлзада Шалағұлованың мәліметінше, жыл сайын ауыл шаруашылығы саласында кәсіп ашқандарға несие де беріледі. Кәсіп­керлер несиесінің басым бөлі­гін кепілдендіруге де қолдау көр­сетіліп келеді.

– Қордың ұстанып отырған бір­неше мақсаты бар. Біріншіден, бизнес ашуды және оны кеңейтуді несие­лендіру. Екіншіден, кәсіпкер­лерге несие серіктестіктері мен мик­­роқаржылық ұйымдар, екін­ші деңгейлі банктер арқылы беріл­ген несиелерді кепілдендіру. Үшін­шіден, мал шаруашылығын сақтан­дыруды көздейді. Басты ұстаным – клиенттеріміздің табыс табуымен бірге, ауыл тұрғындарының шағын несиелеу жүйесіне қолжетімділі­гі мен тиімділігін арттыруға мүм­кін­дік жасау. Ауыл шаруашылығы саласындағы кәсіпкерлікті қолдауға берілетін несиенің өзіндік шарттары бар. Мәселен, соңғы үш жылда өңір кәсіпкерлеріне 287,2 млн теңгенің несиесі берілді. Бұдан бөлек 140,2 млн теңгенің несиесі кепілдендірілді, – дейді Г.Шалағұлова.

Оның айтуынша, соңғы үш жыл­да облыста 56 жоба бойынша кепілдендіру рәсімделіпті. Қор та­рапынан жасалып отырған мұн­дай қолдау Атырауда ауыл шаруа­шы­лығы саласында кәсібін ашуға ниеттілер қатарын көбейте түсті. Әсіресе, асыл тұқымды төрт түлікті сатып алып, өнім өңдеуге бет бұру байқалып отыр.

Атырау облысы