Аймақтар • 13 Мамыр, 2021

Браконьерге бұғау болмай ма?

842 рет
көрсетілді
3 мин
оқу үшін

Жайық-Каспий су бассей­нін­дегі табиғи байлық – бекіре тұқымдас бағалы балықтар түріне қырғидай тиетін браконьер­лердің аптығын басатын бұғау табылмай тұр. Әрине, брако­ньерлікке қарсы жыл сайын 1 сәуір – 31 мамыр аралығында Атырау, Маңғыстау және Батыс Қазақстан облыстарында кең ауқымды «Бекіре» балық қорғау акциясы өтеді. Аты дардай болғанмен, бұл акциядан кейін су маржанына суық қолын көтерген браконьерлер қатары азайған жоқ. Неге?

Браконьерге бұғау болмай ма?

Бұл сауал жұртшылықты тол­­ғандырғалы қашан? Алайда, дәл қ­азір оның жауабын дөп ба­сып айтуға ешкімнің дәті бар­май­тын секілді. Әйтпесе, құ­қық қор­ғау органдары брако­ньер­­лерді осы заманғы байла­ныс құрал­дарымен, жүрдек қа­йық­тар­мен қамтушыларды анық­тап, теңіз­дің төрінде бекіре тұ­қым­дас балықтарды баудай түсі­ріп жүрген суық қолдыларды қол­дау­шылардың атын атап, түсін түстер еді. Қандай «құді­­реті» бар екені белгісіз, брако­ньер­лерді қолдайтын астыртын топтар әлі күнге анықталар емес. Сол се­бепті «баяғы жартас, бір жар­тастың» керімен «Бе­кіре» акция­сын өткізушілер тек тәр­кілен­ген бағалы балықтар мен құқық бұзу­шыларға салынған айыппұлды тізбелеумен ғана шек­теледі.

Мәселен, «Бекіре-2020» ак­ция­сының нәтижесінде 759 адам әкім­шілік жауапкершілікке тартылып, 33 қылмыстық іс қозғал­ған. Балық қорғау заңдылығын бұзушыларға 13 млн теңгеден астам сомаға әкімшілік айыппұл салыныпты. Ал заңсыз айналымнан 13,9 тонна балық тәркіленген. Оның ішінде 943,6 кило бекіре тұқымдас балық түрлері, 16,34 кило бекіре тұқымдас балық уылдырығы, 439 аулау, 20 жүзу, 7 көлік құралы бар.

Мұндай дерекке биыл да қа­нық болғалы отырмыз. Өйткені «Бекіре-2021» акциясы бас­тал­ғалы бері Жайық-Каспий об­лыс­­аралық бассейндік балық ша­руа­шылығы инспекциясы­ның инс­пекторлары құқық қорғау, та­­биғат қорғау органдарының және шекара қызметінің қыз­мет­керлерімен бірлесіп, табиғат қорғау заңнамасын бұзудың 730 дерегін анықтап отыр. Соның нәтижесінде 495 адам әкімшілік жауапкершілікке тартылды. Ал 63 іс әкімшілік сот органдарына жолданды. Браконьерлікпен, сирек кездесетін және құрып кету қаупі төнген балық түрлерімен заңсыз айналысу дерегіне байланысты 37 қылмыстық іс қозғалды. Заң талабын бұзушыларға 8,1 млн теңге айыппұл салынды.

Заңсыз айналымнан алын­ған 25,5 тонна су маржанының 4 тонна 305,2 килосы бекіре тұ­қымдас балық түрлеріне жатады. Сондай-ақ 710 балық аулау, 18 автокөлік пен 48 суда жүзу құ­ралы тәркіленіп отыр. Өзен арнасы мен теңіз акваториясын күнделікті сүзудің нәтижесінде су қоймаларынан 2031 заңсыз балық аулау құралы табылыпты.

– Облыстық полиция депар­та­ментінің қызметкерлері Аты­рау қаласына таяу орналасқан Көк­­арна ауылындағы саяжай тұр­ғындарының бірінен 812 кило болатын 247 дана бекіре ба­лы­ғын тәркіледі. Күдіктінің ба­ға­лы балықты үйінде заңсыз сақ­тап келгені анықталды. Ал Иса­тай ауданының 21 жастағы тұр­ғыны үйінде жалпы салмағы 29 кило 800 грамм болатын бекіре тұқымдас балық сақтаған. Бағалы балық қорына заңсыз қол сұққан екі азаматқа қатысты қылмыстық іс қозғалды, – деп хабарлады де­партаменттің баспасөз қызметі.

Міне, «Бекіре-2021» акция­сының алғашқы айында брако­ньерлікке қатысты осындай деректер белгілі болып отыр.

 

Атырау облысы