Өнер • 31 Мамыр, 2021

Модерн махаббат

62 рет көрсетілді

Ләйлі мен Мәжнүн, Зылиха мен Жүсіптің дастанын жата жастана оқимыз. Қапияда қаза болған Төлеген мен арманда кеткен Қыз Жібектің фильмін көріп әлі күнге дейін көзімізге жас аламыз. Бірақ көгілдір экранның сыртындағы бергі өмірді қаншалықты шынайы сүйіп жүрміз? Кіршіксіз сезім, ақ адал махаббат деген аяулы сезімдерді жылтыраған көзалдамшы ұсақ-түйектердің көлеңкесінде қалдырып кетіп жүрген жоқпыз ба? «Заманауи махаббат» (Modern love) сериалының кейіпкерлері сынды шынайы сезімдердің иесі, олар сөзсіз осы әлемде, осы күні, осы сағатта арамызда жүр. Олар деп отырғанымыз бейтаныстар емес, біздің өзіміз.

Ая ӨМІРТАЙ

Егер, осы сериалды көрудің қажеті бар ма деп сұрар болсаңыз, жауап – көруге әбден тұрады. Әр эпизод жеке-жеке оқиғаны арқау ете отырып, ондағы кейіпкерлердің тағдыр талайындағы ой ағымын, көңіл-күй құбылысындағы өзгерістер мен бастан өткерген ішкі шындығы жайында баяндалатын 8 сериядан тұрады. Ал ең соңғы сегізінші бөлім алдыңғы эпизодтардағы оқиғалардың басын біріктіруге тырысады. Бұл Нью-Йорк Таймс журналының «Қазіргі махаббат» бағанындағы кейіпкерлер өмірінен алынған шағын нобайлар.

Фильмде сана мен эмоциялық үндестікке шақыратын серпіліс бар, жамандықты жақсылыққа, зұлымдықты ізгілікке айналдыру өз қолыңда деген өркендеу жолына ұмтылдырып отырады. Бір қарағанда қарапайым адамдардың күнделікті қыңқыл-сыңқылы, күңкіл-шүңкілі сынды маңызды көрінбеуі мүмкін, бірақ өзіміз күрделендіріп алған өміріміздегі құлдырау, қайта тұру, көз жасы, жан қиналысы, көңіл толқынысы сынды белестерді ұқыпты көрсете білген. Мәселен, балалар мен ата-аналардың қарым-қатынасы, ересек ерлі-зайыптылардың қарым-қатынасы, араласудағы қателіктер, махаббат, достық, өзіне деген сенімсіздік сынды алуан түрлі тақырып ғылыми тұжырымдармен өріле отырып, қамтылған.

Фильмнің бір жерінде өзіңізді танып жатсаңыз, кезекті бір тұсында кейіпкерлердің әрекетіне қуанып отырар едіңіз. Кейіпкерлер арасындағы қиындықтарға қарамастан, фильм ауанынан сезіліп тұратын жеңілдік пен әуені жанға жағымдылығымен есте қалады. Ал фильмдегі миллиондарды қымсынбай құшағына алып жатқан зор Нью-Йорктің бас айналдырар ғажайып көріністері бірден көрерменнің көңілін жаулап алады.

Заманауи махаббат – қарапайым адамдардың қатынасы. Оған бола супер қаһарман болудың, ақылды әлденені ойлап табудың еш қажеттілігі жоқ. Бұл кез келгеніміздің басымызға түсуі әбден мүмкін өмір жолақтары. Еңсеңіз түсіп, көңіліңізді торлаған сұр бұлттан арыла алмай жүрген болсаңыз, осы фильмді қарап көріңіз. Өкінбейсіз, ішіңіздегі жан сарайыңыз шайдай ашылады. Бұл – өмір жолымыздың сан алуан қырын жан-жақты ашып беретін, ең бастысы өткен де, ертең де емес, қазіргі уақыт екенін еске салатын фильм. Барлығын өз уағында қадірлеу керек, қастерлеу керек, қамқорлық көрсетіп, жақсы көру керек. Ондай болмаған күнде «ішімдегіні тап» деген үнсіздік нағыз бетпердеге айналады да, құрдымға құлата жаздайды. Есесіне айту, сөзбен ұғынысу байыпты байламға келудің тамаша құралы деген ойды жеткізгісі келеді.

Тым тереңге кеткен коммуникациялық дағды осы күні телефоннан бас көтертпейді. Іс жүзінде жастар «Badoo» мен «Tinder» сияқты қосымшаларда, жарқ-жұрқ еткен инстаграм желілерінде уақыт өткізеді. Айналаңа бір уақ зер салсаң басын салбыратқан қауым үнемі төмен қараған күйінше ешкімді, ештеңені байқамастан кетіп бара жатқаны. Кімнен не жасырғысы келеді, әлде кімнен жасырынғысы келеді, беймәлім. Немқұрайды жүрістің сыртында өмір жылыстап өтіп бара жатқанын ұғынса ғой, басын көтеріп, аспанға бірер сәт көз тоқтатса ғой дейсің. Адам баласына бір рет берілетін өмір көптеген жасырын мүмкіндіктер мен қауіп-қатерлерге толы қиял ма дейсің. Бірі өмірді шексіз ұнатып жатса, бірі жек көреді. Соның арасында модерн махаббаттан мән тапқымыз-ақ келеді. Шексіз-шетсіз өмір ағысында әлдеқалай тоғысқан тағдырлардың ендігі беталысы жұмбақ.

Күннің маңызды және өзекті жаңалықтарын «Егемен Қазақстан» телеграм каналынан оқыңыз