Санитарлық-эпидемиялық саланың мамандары енді осы көрсеткіш тіпті жақсарып, сырқаттардың саны азая беретін болса, онда өңірдегі карантиндік шектеулер шеңберінің кеми түсетінін айтады.
Індет ошақтарына талдау жүргізген сарапшы мамандар ауруды жұқтырудың оқиғалары үй жағдайында көп болатынын анықтап отыр. Мұндағы көрсеткіш 26 пайызды құраған. Қоғамдық көлікте жүріп жұқтырғандардың да үлес салмағы мол. Автобустармен әрі-бері жүріп, жаман індетке ұрынғандардың көрсеткіші 16%-ға жетіпті. Ал ауырғандардың арасында жас шамасына қарай зейнеткерлер топ басында тұр. Олардың үлес салмағы 25%-ды құраса, 21% көрсеткіші бар жұмыс істемейтіндер де егде адамдардан қалысар емес.
Қазіргі таңда өңірде өмірдің тыныс-тірлігі өзінің бұрынғы қалыпты жағдайына қайта келе бастағанын айта кеткен ләзім. Бұған, әсіресе, Ashyq жобасының ықпалы зор болып тұр. Атап айтқанда, аталған мобильді қосымша іске қосылғалы жұмыс істеуге рұқсат етілген кәсіпкерлік нысандар қарасы молайған.
Бүгінде облыста бас санитарлық дәрігердің рұқсат етуімен балалардың ойын-сауық орталықтары, цирк, қонақүйлер жұмыс істей бастады. Әлбетте бұл жерлерде санитарлық талаптар әлі де болса қатаң сақталады. Мәселен, балалар орталықтарында бір мезгілде 30-дан аса жеткіншек болмауы керек. Үлкен орталықтарда 60 адамға дейін ғана болуға рұқсат берілген. Ал енді отельдер мен қонақүйлерге адам саны жағынан шектеулер қойылмайды.
Бұдан бөлек тұрғындарды қуантқан тағы бір жаңалық – демалыс күндері облыс ішінде жүретін жолаушылар таситын автобустардың маршруттары жандана бастады. Қазір облыс орталығынан өңірдегі қалалар мен елді мекендерге еш шектеусіз қатынауға болады.
Қазір – балалардың каникул уақыты. Осыған орай олар баратын жерлердің де жұмысы «тіріле» бастады. Дегенмен 12 жастан асқан жеткіншектер компьютер клубтарына, цирк пен кинотеатрларға Ashyq мобильдік қосымшасынан ерікті түрде өтіп барып кіре алады.
Тағы бір айта кететін жайт, жобаға қатысушы кәсіпкерлік нысандар басқа да платформаларды пайдалана алады. Мысалы egov mobile, Аitu, Kaspi.kz, Halyk Bank, Sberbank.kz сияқты қосымшалар тұрғындарға қызмет етуге әрқашанда дайын.
Айта кету керек, өткен тәулікте Қарағанды облысында 160 адамның коронавирус инфекциясын жұқтырғаны анықталды. Ал кейінгі түскен мәліметке сай, соңғы тәулікте өңірдегі 115 науқас сырқаттан айығып шыққан.
Қарағанды облысы
