Ғазиза Жұбанованың «Мир мой – Музыка» деген шағын екі кітабы бар. Осыдан ширек ғасыр бұрын баспасөз бетін көрмеген күнделіктері, эсселері, жолжазбалары қызы Дина Мәмбетованың ұйымдастыруымен «Асим» компьютер баспа орталығынан орыс тілінде жарық көрді. Ұлттық музыка тарихының мәселелерін қозғайтын бұл кітаптар оқырман үшін үлкен олжа еді. Өкінішке қарай, арзымайтын данамен шықты. Сапасы да сын көтермейді, болмаса әркім де тұшынып оқитын-ақ кітап. Осы кітабында қазақ қыздары арасынан шыққан тұңғыш кәсіби композитор Ғазиза Жұбанова әкесі, ұлт руханияты ұстындарының бірі де бірегейі Ахмет Қуанұлы Жұбановтың қиын тағдырына бір тарау арнаған. Онда бізге әлі күнге беймәлім, айтыла бермейтін көп жайдың сырын ашқан.
Қазақ руханиятына, ғылымына өлшеусіз қызмет еткен Жұбановтар әулетін кім білмейді?! Ахаңның ағасы Құдайберген Жұбанов тіл ғылымының биігі бола тұра, алғаш қазақ күйі жөнінде жойқын мақала жазған адам. Ол кісі «халық жауы» атанған соң Ахмет Жұбанов та көп азап көрді. Тіпті Ахаңды филармонияға есік аузында отыратын вахтердің өзі кіргізбей қойған. «Өзі асырап, күшік еткендер» соңына шам алып түсті.
Ғазиза апамыз ер мінезді, өжет адам еді. Әкеден қалған қасиет қой. Ол да талай мәрте қазақ баласына қамқор болды. Өмірі тұтқында өтіп, тәуелсіздік таңы атқанға дейін тамұқ күй кешкен скрипкашы Әйткеш Толғанбаев Ғазекеңнің ер-азаматтардың қолынан келмейтін жақсылығын айтқанда етегі жасқа толатын. Сол Ғазиза бір күні әкесіне: «Папа, сіз осы неге өзіңіздің өмір бақи ізіңізге түскен адамдарға қамқор болып, жақсылық жасап жүресіз? Тіпті қонаққа шақырасыз, олар жөнінде мақтауын келтіріп, арнайы мақала жазасыз. Шәкірттеріңізге солардың шығармашылығы жөнінде кандидаттық, докторлық диссертация қорғатасыз. Мұны қалай түсінуге болады?» дейді. Сонда Ахаң: «Е, қарағым, кім қателеспейді? Кісіні құтқаратын кекшілдік емес, текшілдік. Олар мені бір рет өлтірсе, мен жазған мақаладан соң күнде өліп жатқан жоқ па?» депті.
Адамға ақылдан гөрі мейірім көбірек керек деген бір тәмсіл бар. Ахаңда сол мейірім-шапағат болмағанда, тартысумен жүргенде қазақтың музыка мәдениеті, тарихы кенжелеп, қаншама мәселе жалғанның жарығына шықпай қалар ма еді деп те ойлайсың. Қазақ музыка тарихына тұңғыш ғылыми негіз салған (А. Сейдімбек) Ахмет Қуанұлының иненің ұшында отырып жазған көл-көсір еңбегін, орнын, бағасын бүгінгі ғалымсымақтардың біле бермеуі өзегіңді өртейді. Болмаса, «қазақ композиторлық мектебінің негізін қалаушы деп Е.Брусиловскийді айтамыз» деп жаза ма? Қазақтың музыка мәдениетінің ауызша, жазбаша дәстүрінің тарихына терең бойламай, шала сауатты адамның өзі иланбайтын мұндай сыңаржақ пікірлерді айта салу кім үшін, не үшін керек? «Қандай музыка жазбасам да, ол қазақ музыкасы болып шыға береді» деп Евгений Григорьевичтің өзі мойындағандай, егер тіріліп келетін болса, осы бір қисынсыз бағаға сөзсіз қатты қапаланған болар еді. Ол музыкадан үлкен түсінігі болған, содан ләззат алып, романтикалық күй кешкен адам. Қазақ музыкасының зор құдіретімен рухтанып, қазақтың өз байлығын өзіне ерінбей, жалықпай қайтарып берген бейнетқор адам.
Жалпы, біз біле бермейтін бір жағдай, сол жылдары ұлт музыкасының байтақ байлығын есепсіз пайдалану, ревизияға, шырғалаңға салу процесі де қатар жүрді. Бұл да зерттеушісі табылса, жүйелі түрде қопара зерттелсе, көп сырды ашатын тақырып. Әрине бұл енді басқа әңгіме.
Сол тұста белгілі тұлғалармен бірге КСРО халық әртісі атағына қатар ұсынылған Ахаңды республика идеологтері «қазақтың ұлттық өнерін зерттеген адамға мұндай атақ беру жарамайды» деп өткізбей де қойған. Қысқасы, бұл төңіректе шындыққа көз жеткізгіңіз келсе, тарих ғылымдарының докторы, профессор Таласбек Омарбеков пен марқұм, өнертану ғылымының докторы Сара Күзембаеваның, академик Серік Қирабаевтың ащы шындықты айтқан мақалаларын қарап шыққан да абзал.
1958 жылы Мәскеуде қазақ әдебиеті мен өнерінің он күндігі өтетін болып, оған шығармашылық жағынан жетекшілік ету Ахмет Жұбановқа жүктеледі. Дайындық қорытындысында комиссия мүшелері Е.Брусиловскийдің «Дудар-ай» операсын әлі де бір қайнауы ішінде екенін айтып, жаратпайды. Қайта жетілдіру керек дегенде ол бас тартады. Бұдан бұрын «Руслан мен Людмила» да осындай күй кешкен. Бұл жөнінде Ғазиза Жұбанова аталған кітабында былайша еске алады.
«Ұлы адамды қорлаудың осы бір ақылға сыймас түрін есіме алған сайын жүрегім сыздайды. Әңгіме осымен бітсе жақсы ғой. Баяғы арызқойлар ескі әуеніне қайта басып, Орталық комитетке менің әкемнің үстінен тағы да «ұлтшыл» деген айып тағып, көлдей хат жазды. Тағы да азапты күндер басталды. Сондағы қойған кінәсі, әкем декада бағдарламасына «Руслан мен Людмила» атты орыс операсын ендірмепті.
Біздің қоғамда қандай жабайы ғадеттер болды десеңізші. Комиссия мүшелері тарапынан қойылымы және орындалуы жағынан әлсіз деп танылып, қатты сынға ұшыраған спектакльге де ақыр соңында «ұлтшыл» Жұбанов кінәлі болып шығады. Сол кездегі Орталық комитеттің бірінші хатшысы болған Беляев деген біреу: «Ол ұлтшылды осылай тұзаққа түсірдік қой» деп масаттаныпты. Сөйтіп екі жыл ғұмырын арнап, бүкіл одақты тамсандырған декада хикаясы әкемнің қайтадан төсек тартуымен аяқталды.
Ол сағаттар бойы үн-түнсіз жататын да қоятын. Біз оның көңілін аулауға тырысатынбыз. Немерелеріне қарап, әлсіз ғана езу тартатын. Бір күні ол күтпеген шешім қабылдады. «Фрунзеге кетемін, онда достарым көп. Өмір сүруге де, жұмыс істеуге де қолайлы» деді. Шошып кеттік. Қайта-қайта жылап-сықтап жүріп, әйтеуір райынан қайтардық. «Отанды ештеңемен айырбастай алмайсың ғой» деуге дейін бардық. Осы бір сөзден кейін, оның көзінен мөлт-мөлт еткен жас көрдік. Сөйтіп бәріміздің көңіліміз босап, бұл тақырыпқа қайта соқпадық».
Осындай жағдайлар Ахаңның жауларын көбейте түседі. Қысқасы бұл декададан жұрттың бәрі алпыншақ-салпыншақ тағынып, күйеуім Мәмбетов екеуміз де бірдеңе алып жатқанда, сол үшін өмірінің жартысын беріп, ауру тапқан әкеме ештеңе бұйырмады, деп жазады Ғазиза. Әрине Ахаңды тұқыртудың басы бұл емес еді. Әсіресе 1948 жылғы космополитизм науқаны басталғанда ұлт зиялыларына екі күннің бірінде «ұлтшыл» деген айып тағылып жатты. Әрине бұл бәлекет Ахаңды да айналып өтпеді. «Қазақ халық композиторларының өмірі мен шығармашылығы» атты кітабында жарияланған Кенесары жөніндегі халық әуенінің нотасын бір сылтау етсе, оркестр құрамындағы Бөкейхановтар үшін де жауығушылар қаптады. Әйтеуір бұл зұлматтан аман қалды дегені болмаса, консерваторияның тұңғыш профессоры, тұңғыш кәсіби музыкант, академик-композитор, дирижер – сан қырлы қазақ тағы да жұмыссыз қаңғып қалды. Содан Мәскеуге кетті. Балалары Ғазиза, Болат, Қайыр үшеуі студент еді. Әкесіне бір бөлме жалдап, төрт адам студент стипендиясымен өмір сүрді. Күнкөріс керек. Ахаң Виноградовтың «Осуждения Паганини» атты романын қазақшалады. «Ғасырлар пернесін» жазды. Ескі облигациялармен күн көрді. Оның өзінде де ұтыс шыға қалса. Тіпті шешеміз барахолкаға барып, ұсақ-түйек те сатқан. Жұбайы бас сақинасына ұшырап, ауру тапты. Осылай екі жылғы сенделістен соң Алматыға қайтып, консерваторияға оралады. Елу жасымен арнайы құттықтаған ешкім болмайды. Бір ғажабы Ахаң қамқорлық жасап, кейін биік тұлғаларға айналған адамдардың ішінде оның бұл келісіне қарсы шықпағаны кемде-кем болды. Тек қана өзі «Оның «Қазақ вальсі» Гагариннен бұрын ғарышқа шығып кеткен» деп биік бағасын берген Латиф Хамиди ғана айыптауын алыстан орағытып, астарлап қана айтса, қалғандары мүлдем ашық кеткен. Бұл жөнінде архив материалдарына, ондағы стенограммаларға сүйеніп, түсін түстеп, атын атап дәлелді дерекпен жазған Т.Омарбековтің «А.Жұбановты қудалау. Қазақ халық музыкасы қалай қудалауға ұшырады?» мақаласынан толық мәлімет алуға әбден болады.
Жарайды, бұл жылдарды ұлт зиялыларының басына қара бұлт үйірілген кезең еді, жаралы жылдардың жаңғырығы дейік. Таяуда мұрағатымды ақтарып отырып, бір брошюраға көзім түсіп, таңғалдым. «Құрманғазы атындағы оркестр» атты бұл шағын суретті кітаптың авторы В.Мессман деген кісі. Қазақ ССР-і мен Қазақстан компартиясының 50 жылдығына арнап шығарылған. Осы кітапта бас кейіпкер болуға тиісті Ахаң туралы қалың сөздің арасында тығылып тұрған бір-екі сараң сөйлем ғана бар. Оркестрдің өмірге келуі, алғашқы ұйымдастырушылары, қалыптасуы туралы мәтінмен қоса, белгілі тұлғалардың суреттері де берілген. Осы істің бастауында тұрған Ахаң жоқ. Таңғаларлығы кітапша бертінде 1970 жылы шыққан. Біздіңше оның себебі өзі де, көзі де жоқ Ахаңның бұрынғы «жанашырларының» әлі де қауқары қайтпаған болса керек. Оның үстіне осы кезде Ғазизаға арагідік көз алартушылар байқалып жүрді. Қайран қаласың, бұл не қылған тарқамайтын кек?
Ахмет Қуанұлына Совет аудандық партия комитетінің бюросында партиядан шығарып, сөз бергенде «дұрыс, бәрі дұрыс, шынында солай» деп мойындауы да керемет қой. Қандай ақылды адам болған десеңізші. Егер мойындамаса сол күйінде итжеккеннен бір-ақ шығып, алда Алаш үшін атқарылар атпал шаруаға ие табылмай қалған болар ма еді. Ұлы Ахаң басы бәйгеге түсіп тұрғанда осыны ойлағаны хақ. Енді құрылған Құрманғазы оркестрі бесігінде тұншығар ма еді? Консерватория, ондағы музыкалық фольклор зертханасы, Ұлттық Ғылым академиясынан өнер бөлімі ашылар ма еді? Ал енді, ұлы Нұрғиса болар ма еді, болмас па еді?
1945 жылы соғыстың бітуіне екі ай қалғанда демалысқа келген Нұрғисаны Ахаң республика партия ұйымының хатшысы Жұмабай Шаяхметовке жетектеп барып, «Жұмеке, бұйыртса жеңістің де төбесі көрініп тұр. Бізге домбырашы жетіспейді. Нұрғисаны алып қалу керек» деп өтініш айтады. Хатшы өтінішті орындайды. Ахаңның бұл жақсылығын Нұрағаң ешқашан есінен шығарған емес. «Мына мен өмірімде Ахаңсыз сөйлеп көрген емеспін, Ахаңсыз дирижерлік етпеймін, Ахаңсыз өмір сүріп көргенім жоқ. Мынау Ахаңның маған 1937 жылы сыйлаған домбырасы. Міне, 60 жыл болды. Ахаң болмаса, анау Қаршыға, мынау Бек бола ма, анау Құрманғазы оркестрі, «Отырар сазы» бола ма? Міне, сол Ахаң менің бесікте жатқаннан, жалпы өмірде бағынатын пайғамбарым» деп бір мерейтойында ма екен, ағынан жарылып, көңілі босап сөйлеп еді.
«Махамбеттей» сұрапыл симфония жазған адам осылай айтса керек. Нұрағаң ағашыл емес, алашшыл, рушыл емес, рухшыл еді ғой. Шынында қайран Ахаң бала Нұрғисаның бойындағы бұлқынып жатқан өнерді көріп, 14 жасында Құрманғазы оркестріне қабылдағаны қалай жадынан шықсын.
Қазір мемлекеттік тіл – қазақ тілінің тағдыры туралы қоғамда әлі күнге шешімін таппаған мәселе шаш етектен. Ал Кеңес өкіметінің тұсында туған тіліміздің жағдайы қалай болғаны айтпаса да түсінікті. Ахмет Қуанұлы соған қарамастан кандидаттық, докторлық диссертацияның басым көпшілігін қазақ тілінде жаздырып, қорғатып, ғылым тіліне айналуына зор ықпал жасады. Осы үшін де ғылыми кеңестерде талай мәрте айтылатын «ұлтшыл» деген айыпқа да еті үйреніп кетті. Ахаң туралы кейбір естеліктерде ұлт музыкасы, жалпы тарихы туралы айтқанда оның бойында ешқандай қорқыныш сезімі болмайтыны, ойындағысын айтып та, жазып та кеткені айрықша аталып көрсетіледі. Оның осы қасиеті сырттан келіп, ұлт элитасының белгілі бір шоғырына қарсы арандатушылық әрекеттермен айналысып, арнайы тапсырма алатындарға зұлым жоспарын жүзеге асыру үшін дайын тұздық еді. Бірақ тумысынан тектілік пен даланың даналығын бойына жиған дегдар Ахаң соның біріне де қыңбады. Халқы үшін ақылдың азабын кешуді зор бақыт көрді.
Ел әлі күнге шырқап айтатын әндерін былай қойғанда, ол қазақ музыкасының балеттен басқа бар жанрында жанкешті жұмыс жасады. 1944 жылдың 26 желтоқсанында қазақтың тұңғыш операсы «Абайды» жазды. Бұл ұлт мәдениетіндегі ерекше құбылыс болды. Сол қиын күндерге қарамастан, жұрт театрға ағылды. Осы орайда Ғазизаның күнделігіндегі мына бір жолдар еріксіз назар аудартады: «Ол өте еңбекқор, айтқанын істемей қоймайтын (бұл қасиет маған да қонған секілді) табанды кісі еді. Қазақ музыкасындағы тұңғыш туындылардың, ғажайыптардың көбісі әкемнің атымен байланысты. 1944 жылдың 26 желтоқсанында қазақтың тұңғыш операсы «Абайдың» дүниеге келуі шын мәніндегі ұлттық мерекеге айналды. Әр қойылым сайын көрермен театрға сыймай жататын. Авторларды қайта-қайта сахнаға шақырған көрермендер қазіргідей екі премьерадан соң сап тыйылмай, театрға үздіксіз ағылумен болатын. Мына бір жай есімнен кетпейді. Бірде кешкісін бір кісі үйге ентігіп жүгіріп келді. Әкем жұмыс істеп отырған. «Сізді көрермендер шақырып жатыр. Тез жүріңіз, әйтпесе кететін түрі жоқ» дейді. Оның әр премьерасы осылай өтетін. Әлі күнге дейін театрдың жаңа маусымының «Абаймен» ашылатынын мақтан етемін».
Ұлы адамның арманы соншалықты көп еді. Бірде ол Ғазизаға «шіркін енді 5 жыл өмір берсе, Құрманғазы жөнінде бір опера жазсам, ол өмір бақи менің жанымның жартысы болды ғой» дейді. «Құрманғазыны» Ғазиза жазды. Қазақ операсының алтын қорында қалды. Кейіннен Ахаңның өзі лиризміне табынып өткен Дәулеткерейдің «Жігерінің» негізінде симфония арнап, әкенің тағы бір арманын да орындады. Ұлттық Ғылым академиясына қарайтын өнертану институтын ашсам деп еді. Т.Жүргенов атындағы ұлттық көркем өнер академиясы ашылып, ол арманы да жүзеге асты. Арманы көп Ахаң «Ахметтердің арманы орындала бермейтін тәрізді ғой» деген екен бірде. Ахаңдар кім еді? ХХ ғасыр қазақ руханиятына үш Ахаңды берді. Олар – Ахмет Байтұрсынұлы, Ахмет Жұбанов және Ақселеу Сейдімбек. Бүгінде сол Ахаңдардың арманы біртіндеп жүзеге асып келе жатқанына азат елдің толағай тірлігі куә.
Тұлға туралы аз-кем ізденіс барысында бір жайға көзім жетті. Әдебиетте абайтанушы, әуезовтанушы, бауыржантанушы бар, арнайы курстар оқытылады. Олардың тұлғалардың тағылымын зерттеуде еңбегі зор, жұрт қолына жетіп те жатыр. Ал біздің музыка тарихы арнайы оқытылғанымен, ахметтанушылар жоқ. Бұған дейін Ахаңды арнайы зерттеген мамандар болды. Алайда бүгінде араға көп үзіліс түсіп, сол үрдіс үзіліп қалған тәрізді. Бұл – енді Ахаңның емес, біздің арманымыз.
Өмірден көрген көп қасіреттер Ахаңның астарлы, әзіл-әңгімелерімен де жұрт жадында қалған. Әсіресе оның айтқыштығының өзі бір төбе. Қазіргі ортада да көбірек айтылады. Бірде-бір белгілі кісі Ахаңмен шипажайда бірге демалады. Ваннаға қатар түсіп жатқанда әлгі кісі Ахаңа «қайратыңыз қайта бастаған ба, қалай?» деп тұқыртқан болады. Бұл күндерде Ахаңа түрлі айыптаулармен қатар, жігітшілік жөнінде де дәлелсіз әңгімелер жабысып жүреді. Соған жауап болсын деді ме, Ахаң әлгі кісіге «қайдан білейін, мен туралы ЦК-ның пікірі жаман емес қой» депті. Тағы бір лепес. Бірде Ахаң Жазушылар одағына келеді. Белгілі ақын Жұмағали Сайын бірінші қабатта отырады. Жаздың күні терезе ашық тұрады ғой. Сірә, қалжыңдары жарасқан әрі қатарластығы бар Ахаңның келе жатқанын көріп, Жұмекең «жігіттер көз жаққа барыспайық» дейді. Оны Ахаң естиді. Сөйтеді де Жұмағалиға келіп: «Осы сен жаңа не дедің, Жұмағали? Қазақ көз жаққа емес, бас жаққа барыспайық деуші еді. Сен қазақтың тілін білетін ақын емессің бе?» деп Жұмағалидің бас жағын меңзеп айтқан екен. Мұндай айтқыштық Ахаңда аткөпір.
Жердің астымен жүрген күндердегі мына бір айтқыштығы сірә да ұмытылмас. Қайсыбір жылы Әзербайжанның ұлы тұлғасы Гаджибеков өмірден озып, оның қазасына Қазақстаннан Бакуге Ахмет Жұбанов барады. Ахаң сондағы сөйлеген сөзін «өлген адам тірілердің көзін ашып кетеді» деп аяқтапты. Осы сөзді Әзербайжанның көне көз зиялылары «Апыр-ай, не деген ақылды адам еді» деп әлі күнге дейін еске алып отыратын көрінеді.
Ұлт тарихын түгендеу, ұлттың төлтума болмысын бүтіндеу жолында ақылдың азабын тартқан арыстарымыз аз емес, әрине. Сол ақылдың азабын бір емес, бірнеше кісідей көрген Ахмет Қуанұлы болмағанда ұлт музыкасының тайқазаны бүгінде қалай тасып, қалай қайнар еді деп ойлаудың өзі де азап.
Апыр-ай, дейсің! Ұлтқа көл-көсір, өлшеусіз қызмет еткен телегей теңіз ақылдан азап шегу ойлаңызшы, ақылға сыя ма?!.
Қали СӘРСЕНБАЙ