Қалдыбай Жайлауұлы 1941 жылы 29 маусымда Оңтүстік Қазақстан облысы, Сайрам ауданы, Қарабұлақ ауылында дүниеге келген.
1965 жылы С.М.Киров атындағы Қазақ мемлекеттік университетінің химия факультетін үздік бітірді. Органикалық химия саласында жаңашылдық жасауға барынша күш салып, 1970 жылы кандидаттық диссертация, ал 1991 жылы докторлық диссертация қорғап, 1992 жылы профессор атағын алды. 2004 жылдан Қазақстан Республикасы Ұлттық Ғылым академиясының академигі атанды және бас директордың орынбасары болды.
Талантты және химияға бейімі барын байқаған профессор Д.В.Соколов кандидаттық диссертацияны қорғағаннан кейін жас ғалымды КСРО ҒКНТ-ның жоғары тиімді анальгетиктерді-синтетикалық морфинді алмастырғыштарды іздеу жөніндегі ауқымды тақырыбының жауапты орындаушысы етіп тағайындады. Бұл Қалдыбай Жайлауұлының Қазақстанда және ТМД елдерінде, сонымен қатар шет мемлекеттерде де танымал көрнекті органик-химик, ғылымды ұйымдастырушы, қоғам қайраткері ретінде қалыптасуының бастамасы болды.
Академик Қ.Ж.Пірәлиев мектебінің соңғы кездердегі үлкен жетістіктері есірткі емес күшті анальгетиктік әсерлерге ие және апиынға антагонистік белсенділік көрсететін заттар алынуы.
Қалдыбай Жайлауұлы өмірден тоқығаны мол, кең ойлап, қамқор қолын ұсынып жүретін аяулы жан, озық ойлайтын, жаны жомарт, қамқор да талапшыл басшы, ұлағатты ұстаз ретінде белгілі. Іскер басшылық, адамгершілік қарым-қатынас, талмай ізденулер мен жаңалыққа деген құштарлық өз нәтижесін беріп, ол алыс-жақын шетелдерге кеңінен белгілі, танымал ғалым атанды. ҰҒА академигі Қ.Ж.Пірәлиевтің ТМД елдерінің медициналық практикасына жаңа тиімділігі жоғары және бірегей дәрілік заттарды енгізуге бағытталған белсенді инновациялық қызметін ерекше атап өткен жөн. Антидепрессант ЦЕФЕДРИН және ең аз наркогендік потенциалы бар морфинді алмастырушы орталық анальгетик – ПРОСИДОЛ алынып, медициналық практикаға енгізілді, олардың өнеркәсіптік өндірісі игерілді. Сондай-ақ Мәскеудің жетекші клиникаларында клиникалық сынақтардың бірінші кезеңінен сәтті өткен жергілікті анестетик және антиаритмиялық КАЗКАИН ерекше қызығушылық тудырды.
Қ.Ж.Пірәлиев әрқашан химия ғылымдары институтында ғана емес, бүкіл елдің қоғамдық және ғылыми-ұйымдастырушылық қызметінің ортасында жүр. Көптеген жылдар бойы ол «Ә.Б. Бектұров атындағы химия ғылымдары институты» АҚ ғылыми кеңесінің төраға орынбасары, Институттың диссертациялық кеңесінің төрағасы және орынбасары, ҰҒА химия – технологиялық ғылымдар бөлімшесі Бюросының мүшесі, түрлі ҒТК және түрлі ғылыми журналдардың редакциялық алқасының мүшесі, республикалық іргелі зерттеулер кеңесінің мүшесі, қазіргі уақытта Қ.Ж.Пірәлиев – БҒМ Білім және ғылым саласындағы бақылау комитеті президиумының және ҰҒА Президиумының мүшесі.
ҚР ҰҒА академигі Қ.Ж.Пірәлиев басшылығымен 8 доктор, 34 ғылым кандидаты және 3 химия ғылымдары бойынша философия PhD докторы дайындалды.
Академик Қ.Ж.Пірәлиев 1986 жылы ҚазКСР Министрлер кеңесінің сыйлығына, 2002 жылы академик Қ.И.Сәтбаев атындағы, 2003 жылы ҚР Мемлекеттік сыйлықтарының лауреаты атанды. Қалдыбай Жайлауұлына 2001 жылы «Қазақстан Республикасының тәуелсіздігіне 10 жыл» медалі, 2002 жылы Қазақстан Республикасының ғылымының дамуына қосқан үлесі үшін» төсбелгісі, 2016 жылы «Қазақстан Республикасының еңбек сіңірген өнертапқышы» атағы және 2021 жылы «Еңбек ардагері» төсбелгісі берілді.
Жүйрік уақыттың ұшқыр қанаты ҰҒА академигі Қ.Ж.Пірәлиевті мағыналы ғұмырдың биік бір белесі – 80 жасқа алып жетті. Осы кемелдікке жігер, жарқын көңілмен келіп отыр.
Мерейтой – жүріп өткен жолды бағалауға мүмкіндік беретін тамаша шың!
«Ә.Б.Бектұров атындағы химия ғылымдары институты» АҚ-ның бас директоры, химия ғылымдарының кандидаты Дәметкен Фишер және ұжымы ҰҒА академигі Қ.Ж.Пірәлиевті 80 жас мерейтойымен шын жүректен құттықтай отырып, зор денсаулық және Қазақстанның химия ғылымының игілігі үшін жаңа шығармашылық табыстар тілейді.