Елорда • 30 Маусым, 2021

LRT құрылысын аяқтауға тағы қанша қаржы керек?

543 рет
көрсетілді
1 мин
оқу үшін

Елорда әкімі Алтай Көлгінов LRT құрылысының қайта басталғаны жөнінде мәлімдеді, деп хабарлайды Egemen.kz.

LRT құрылысын аяқтауға тағы қанша қаржы керек?

Қала әкімінің айтуынша, құрылыстың қарқынды жұмысы қаражаттың түсуіне қарай жалғасатын болады.

«Иә, қазір LRT-дегі жұмыстар қайта жанданды. Келісімшарттарда көрсетілген бұрынғы шарттар әлі де өз күшінде. Шарттық міндеттемелерге сәйкес жұмыс жүргізілуде. Бірақ құрылыс жұмыстары белсенді деп айта алмаймын. Белсенді жұмыс қаражаттың түсуіне қарай жалғасатын болады»,  деді Көлгінов.

Әкімнің айтуынша, қазіргі жұмыс қолда бар ақшаға басталып отыр. Ал LRT-ны толығымен аяқтау үшін қосымша 1 миллиард доллар қажет.

«Бас кезінде 2,6 миллиард доллар болған. Біз ол соманы 800 миллионға азайттық, былайша, ақшаны үнемдедік. Енді, вагон мен рельстер, жалпы, барлық инфрақұрылымды аяқтау үшін шамамен 1 миллиард доллар керек болып тұр», дейді Көлгінов.

Айта кетсек, елордада LRT жеңіл рельсті көлігін құру туралы шешім 2005 жылы қабылданған. Құрылыстың басталуына орай алғашқы капсуланы Елбасы Нұрсұлтан Назарбаев 2011 жылы салған болатын.

Жобаның барлық шығындарына қарамастан, әкімдік құрылысты аяқтауды жоспарлап отырғанын бұған дейін де мәлімдеген.

Жуырда бағандардың жанында құрылыс жұмыстарының жандана бастағаны байқалды. City Transportation Systems (CTS) өкілдерінің айтуынша, мердігер ұйым - қытайлық CRAIG консорциумы қазіргі уақытта дайындық жұмыстарын жүргізуде.

Ботагөз АМАЛБЕК