Облыстағы алпауыт компания – «Олжа Агро» холдингі жобаға қатысушылардың әрқайсының алдына 100 бас ірі қарадан салып беріп отыр. Агрохолдинг мұның сыртында, отбасылық шағын фермаларға жылы қора-жай, жайлы жайылым беріп, ветеринарлық көмек көрсетеді. «Олжа Агро» әр отбасы қысқы мал азығын даярлап алу үшін жалға техника беру, оларды кәсіпке оқыту, шаруашылыққа, құқықтық салаға қатысты тұрақты түрде кеңес беріп отыру сияқты міндеттерді де өз мойнына алған.
– Шынтуайтына келгенде, біз өз кәсібіміздің бір бөлшегін аутсорсингке беріп отырмыз. Бұл бәрімізге де тиімді. Жаңа жоба өңірдегі кәсіпкерлік пен мал шаруашылығын дамытуға күшті серпін беретініне сенімдімін. Оның үстіне жалпы өңірлік өнімнің көлемі өседі, жергілікті бюджеттерге салық түсімі еселенеді, жаңа жұмыс орындары пайда болады, экспорт әлеуеті артады, ауылдың инфрақұрылымы дамиды. Келісімшартқа отырған кәсіпкерлер бізбен жыл сайын алған төлінің бір бөлігі есебінен 7 жыл ішінде есеп айырысады. Жеті жыл өткен соң шаруашылықтағы бүкіл қора-жай мен мал басы кәсіпкердің өз иелігіне өтеді. Тараптардың табысына қатысты барлық цифрларды есептеп, пысықтап қойдық. Бұл жерде ешкім ұтылмайды, – деді агрохолдинг басшысы Айдарбек Қожаназаров.
Қанатқақты жобаға Буденов ауылында тұратын Сергей Штома да қатысып жатыр. Бүгінде «Буденовское» деп аталатын жеке шаруа қожалығын ашып, әйелі мен бала-шағасын бір ферманың айналасына ұйыстырған фермер аталмыш жобаның ауыл тұрғындарына берері мол екенін айтады.
– Бұл – ауылды дамытуға пайдасы тиетін, керек жоба. Осының арқасында ауыл тұрғындары арасындағы жұмыссыздықты азайтып, жалпы облыстағы ет және сүт өнімінің көлемін ұлғайтуға мүмкіндік туады. Ең бастысы ауылды тастап кетіп жатқандардың легі толастайды. Екіншіден, ауыл тұрғындары аз табыс табады деген таптаурын түсініктің жойылуына ықпал етеді. Бізге қойылып отырған талап онша қиын емес. Ең алдымен, малды қырып алмай, дұрыстап бағу керек. Келесі жылдан бастап төлді өткізе бастаймыз, – деді С.Штома.
Отбасылық фермалар өсірген төлді лайықты бағамен холдингтің өзі сатып алып отырады. Яғни фермерлер өнімді қайда, кімге сатамыз деген мәселеге бас қатырып жатпайды. Жобаның басты шарттарының бірі – әр отбасы өздеріне берілген 100 бас сиырдан мейлінше көп төл алып отыруы тиіс. Бұл мақсатқа жету үшін серіктестік шағын фермаларға барлық жағдайды жасап беріп отыр. Тек қана тер төгіп, адал еңбектену керек. Мұның сыртында агрохолдинг әр фермерге 7 жыл бойы 350 мың теңге көлемінде айлық төлеп отырады.
Молодежный ауылының тұрғыны Жанболат Жұманазаров та жұбайы Гүлім екеуі осы жобаға қатысып, жақында ғана отбасылық фермасын ашқан. Жастайынан еңбекке араласып, мал шаруашылығы саласында мол тәжірибе жинақтаған фермер: «Бұған дейін жеке бизнесім болған жоқ. Енді мал басын көбейтіп кәсіпкерлікпен айналысуға мүмкіндік туып отыр. Біз осы ауылдағы екі отбасыға ортақ бір ферма аштық. Бізге мал өсіруге арналған үлкен қора берілген. Оны екі отбасы бөліп алдық. Қазір қораның іші сыртын сылау, ақтау жұмыстарын жүргізіп жатырмыз», деді.
Жанболаттың отбасына берілген үлкен қораның екінші жағын Кәрімовтер отбасы иелік етіпті. Ерлі-зайыпты Төкеш пен Жаңагүлдің үйіндегі үлкен ұл алдағы күзде отан алдындағы әскери борышын өтеп, ауылға оралмақ. Әке-шешесінің жүз шақты ірі қара алып, ферма ашқанын естіген Бекарыс әскерден оралған соң ауылда қалып, осы фермадағы мал басын көбейтуді жоспарлап қойыпты.
– Біз агрохолдинг мамандарымен ақылдаса отырып, қазақтың ақ бас сиырларын алдық. Бұл асыл тұқымды ірі қара мол ет береді. Біздің жақтағы қақаған қыстың қытымыр аязына да мыңқ етпейді, ыстық-суыққа бірдей төзімді болып келеді, – деді Т.Кәрімов.
Жалпы аумағы 180 мың гектар алқапты игеріп отырған алпауыт компания – «Олжа-Агроның» меншігіндегі малдың ұзын саны бүгінде 15 мыңның үстіне шыққан. Агрохолдинг жобаға қатысатын отбасылардың әрқайсына 100 сиыр, 4 өгіз, оған қоса осыншама малды бағып-қағып, көбейтуге қолайлы қора-жай береді.
«1000 отбасылық ферма» жобасына биылша холдингке қарасты шаруашылықтарда жұмыс істеп жүрген отбасылар ғана қатыстырылып отыр. Жобаға алдағы жылдан бастап «Олжа Агроның» шаруашылық құрылымдары орналасқан 3 ауданда тұратын әрі мал бағудың қыр-сырын жақсы білетін кез келген отбасы қатыса алатын болады.
Қостанай облысы
