Аймақтар • 01 Тамыз, 2021

Екпе мен шектеу «тажалды» тұсайды

33 рет көрсетілді

Арқа төсінде эпидемиялық жағдайдың ушыққаны сондай, 2 тамыздан бастап облыстағы барлық кәсіпорын мен ұйым меншік нысанына қарамастан Ashyq бағдарламасы бойынша жұмыс істеуге міндетті болады. Өңірлік коммуникациялар қызметі алаңында өткен брифингте осындай мәлімдеме жасаған облыстың бас санитарлық дәрігері Юрий Залыгин, сонымен қатар алдағы уақытта қарағандылықтарды тағы қандай карантин шараларының күтіп тұрғанын егжей-тегжейлі айтып берді.

Бүгінде Қарағанды облысындағы эпидемиялық жағдай мың құбылып тұр. Өңірдегі қалалар мен аудандарда «жаман тұмаудың» жоғары көрсеткіші байқалады. Мәселен, облыс бойынша коронавирус инфек­циясының зертханалық негізде рас­талған 55 мыңнан аса жағдайы тір­келген. Міне, жағдайдың осылай болып қалыптасуына байланысты, бас санитарлық дәрігердің шешімімен Ashyq бағдарламасына қатыспайтын барлық кәсіпорындар мен ұйымдардың қызметі тоқтатылатын болды.

Айта кету керек, бұл тізімге орта­лық мемлекеттік органдар, әкім­дік­­тер, құқық қорғау органдары, ден­саулық сақтау ұйымдары, БАҚ, азық-түлік дүкендері, дәріханалар және тір­шілікті қамтамасыз ету ұйым­дары ен­бейді. Бұдан бөлек құры­лыс жұ­мыстарын жүргізу үшін, өнер­кәсіптік кә­сіпорындар, жекелеген қыз­мет түр­лері бар бизнес-орталықтар үшін Ashyq қосымшасынсыз қызмет ету­ге рұқ­сат берілген. Бұл ретте Ashyq қосым­­шасының көшбасшылары жұ­мыс режімін 22.00-ге дейін соза алады.

Ashyq режімін бұзған ұйымдарға қолданылатын шаралардың да қатаң болатынын айта кету керек. Мәселен, ондай жағдайда олардың қызметі ескер­тусіз бір ай мерзімге шектеледі. Ал Ashyq бағдарламасы бойынша қалған кәсіпорындар демалыс күн­дерін қоспағанда, сағат 10.00-ден 20.00-ге дейін жұмыс істей алады. Бұл санатқа моншалар, сауналар, СПА-орталықтар, бассейндер, фитнес-клубтар, фитнес-орталықтар, соның ішінде йога-орталықтар, театрлар, концерт залдары, филармониялар, кинотеатр­лар жатады.

Сонымен қатар дәріханалардың, супермаркеттер мен азық-түлік па­ви­льондарының ішінде орналасқанда­рын қоспағанда, сауда орталықтары, сауда үйлері, азық-түлікке жатпайтын тауарларды өткізетін сауда желілері, көтерме-тарату орталықтары, сауда-фермер орталықтары, ауданы 1 мың­нан 2 мың шаршы метрге дейінгі азық-түлік емес дүкендер де ортақ тәртіпке бағынады.

Сондай-ақ Ashyq бағдарламасы бойынша демалыс күндерін қоспа­ғанда, жабық және ашық базарлар (азық-түлік және өнім емес) сағат 09:00-ден 17:00-ге дейін жұмыс істей­тін болады. Демалыс күндері қала ішіндегі тұрақты маршруттық автобустар мен шағын автобустардың қоз­ғалысы тоқтатылады.

Облыстың бас санитарлық дәрі­гері Юрий Залыгин бұл шектеу ша­раларының карантиндік ре­жім­ді уақытша қамтамасыз ету және ха­лықтың қауіпсіздігі үшін енгізілгенін айтады. Бүйтпесе, коронавирус инфек­циясы бойынша жағдайды тұрақ­тандыру мүмкін болмайтын түрі бар.

– Эпидемиялық ахуал жақсарған жағдайда ғана бұл шектеулер қай­та қаралатын болады. Барлық каран­тин шараларын қатаң сақтауға, вак­циналаудың толық курсынан өтуге және өзін өзі емдемеуге шақырамын, – деді Ю.Залыгин.

Вакцина демекші, облыста 30 шіл­дедегі жағдай бойынша коронавирус инфекциясына қарсы екпенің бірінші компонентін 380 793 адам алған екен. Ал екі компонентті толы­ғымен алған­дардың саны 255 934 адамға жеткен. Бүгінде өңірде тұр­ғындарды вакциналау жұмыстары белсенді түрде жүр­гізілуде.

Қазіргі уақытта облыстың қала­лары мен аудандарында өткізу қабі­леті тәулігіне 8 мыңнан аса адамды құ­райтын 115 екпе кабинеті жұмыс істеп тұр. Мобильді медициналық бригадалар кәсіпорындар мен ұйымдарға барады. Облыстық денсаулық сақтау басқармасының басшысы Гамаль Тоқ­самбаев өңірде вакцинаның үш түрі – Спутник V, QazVac және CoronaVac препараттарының жеткілікті екенін айтады.

Ал денсаулық сақтау басқармасы басшысының орынбасары Бибігүл Төлегенова екпе алу бойынша көш басында күштік құрылымдардың тұр­ғанын мәлім етті. Бұл саладағы қыз­мет­керлер түгелге дерлік вакци­на­лан­ған екен. Одан кейінгі орындарда ме­ди­цина саласының, өнеркәсіптік кәсіп­орындардың қызметкерлері ке­леді.

Осы орайда Бибігүл Төлегенова вак­цина алған адамдар арасында да ауырып жатқандардың бар екенін айтты. Мәселен, бүгінде екпе салдырған 206 адам сырқатқа шалдыққан. Бұл жерде олардың 73%-ның тек бірінші компонентті алғанын атап өту керек. Ал қалғаны екінші компонентті ал­­ғаннан кейін екі аптаға жетпей ауыр­ған. Яғни олардың ағзаларында тиіс­ті иммунитет қалыптасып үлгер­меген болса керек.

Қазіргі таңда облыста «жаман ­тұ­маумен» ауырған науқастарға ар­нал­­­ған 5 679 төсектік орын бар екен. Жал­­пы ал­ғанда жүктеме 52,3%-ды құ­рай­ды.

Облыстың бас дәрігері өңірде ме­ди­циналық ұйымдардың мате­риал­­дық-техникалық базасының ны­­ғай­тылғанын айтады. Бүгінде 26 ком­пьютерлік томограф жұмыс істеп тұр, оның ішінде 22-сі КВИ бар па­­циенттердің өкпе жүйесінің за­қым­дануын диагностикалауға қаты­сады. Сонымен қатар 40 сандық рент­ген-қондырғы, 364 ӨЖЖ аппараты бар. 25 ауруханада медициналық газ таратудың орталықтандырылған жүйесі жұмыс істейді. Тәулігіне 15,6 мың сынаманың тәуліктік қуаты бар 10 ПТР-зертхананың жұмысы қам­тамасыз етілген. Қорда қосымша 140 мың тест бар екен.

Бұдан бөлек пациенттерге үйде қызмет көрсету үшін санитарлық авто­көлікпен қамтамасыз етілген 329 емханалық мобильді бригада жұмыс істейді. Жедел медициналық көмекті 105 бригада көрсетеді. Эпидемиялық жағдай нашарлаған жағдайда, мар­шрутқа тағы 20 қосымша бригада шы­ғарылады. Медициналық ұйымдарда дәрі-дәр­мектер мен жеке қорғану құ­рал­дарының үш айға жететін қоры бар.

 

Қарағанды облысы

 

Соңғы жаңалықтар

Чилидің Шолпан жұлдызы

Әдебиет • 20 Қыркүйек, 2021

Паспорт

Руханият • 20 Қыркүйек, 2021

Өмірге іңкәр, өнерге құштар

Қоғам • 20 Қыркүйек, 2021

Жеке пьеса жазуға лайық

Руханият • 20 Қыркүйек, 2021

Қарабатанға пропан жеткізбек

Экономика • 20 Қыркүйек, 2021

Ана мейірімі

Қоғам • 20 Қыркүйек, 2021

СҚО-да тұқым өндіретін зауыт салынуда

Аймақтар • 20 Қыркүйек, 2021

Ақтөбеде жол апатынан сәби көз жұмды

Аймақтар • 20 Қыркүйек, 2021

Алматыда қанша адам үй кезегінде тұр?

Аймақтар • 20 Қыркүйек, 2021

Ертең Үкімет отырысы өтеді

Үкімет • 20 Қыркүйек, 2021

Доллар арзандады

Қаржы • 20 Қыркүйек, 2021

Ұқсас жаңалықтар