Министрдің міндетін атқарушы мал азығымен қамтамасыз ету мәселелерін шешуді жылдам үйлестіру үшін Ауыл шаруашылығы министрлігі жанынан Республикалық жедел штаб құрылғанын айта келіп, министрліктің бастамасымен Үкімет деңгейінде іске асырылатын шараларды атады.
«Біріншіден, Үкімет резервінен Қызылорда облысындағы құрғақшылықтан зардап шеккен шаруалардың қыстағына жеткізілетін мал азығының құнын арзандату үшін өткен аптада 1,7 млрд теңге бөлінді. Қазір осы қаражатты барлық шаруа қожалықтарына тамыз айының ішінде жеткізу қажет. Екіншіден, Азық-түлік келісімшарт корпорациясы 490 тонна арпаны нарықтағыдан төмен бағамен сатты. Жалпы биыл жемдік астық қорын 370 мың тоннаға жеткізу жоспарымызда бар. Үшіншіден, фермерлердің жемшөп дайындауына қосымша арзандатылған жанар-жағармай бөлінетін болды. Қазір энергетика министрлігімен барлық мәселе пысықталды. Тамыз айынан бастап облыстарға сұратылған лимиттері бойынша жеткізіледі. Қызылорда облысына 3,8 мың тонна лимит бөлінді», деді Е.Қарашөкеев.
Ведомство басшысының айтуынша, Экология министрлігімен табиғи резерват жерлеріне мал жаю және шөп шабу жөнінде келісім жасалды. Осыған байланысты қорықтар жерінен шөп шабу және мал жаю мәселесі шешілді. Сонымен қатар қазіргі жағдайға байланысты фермерлерге қолдау көрсету үшін мал шаруашылығын дамытуға алған несие төлемдерін кейінге шегеру жөнінде шаралар қабылданады.
«Бұған қоса министрлік тарапынан жақында мал шаруашылығын субсидиялау ережесіне енгізілген өзгерістерге сәйкес облыс бойынша былтыр мал азығына субсидия ала алмай қалған шаруа қожалықтарының резервтегі өтінімдері қанағаттандырылатын болды. Бұл мақсатқа облыс бюджетінен 390 млн теңге қаражат та бөлінген. Осы мәселе бойынша ауыл шаруашылығы басқармасы тез арада шешім қабылдауы қажет. Содан кейін басқа өңірлерден мал азығын тасымалдауға темір жол тарифіне арнайы жеңілдіктер беру бойынша Қазақстан темір жолы компаниясының шешімі шықты», деді министрдің міндетін атқарушы.
Тағы бір айта кететін жайт, Ауыл шаруашылығы министрлігі мен «Бәйтерек» холдингі бірлесіп қосымша мал азығын дайындайтын техника сатып алуды қаржыландыру және суармалы жерді игеруге қажет құрылғыларды сатып алуға несие беру мәселесін де қарастырады.
Е.Қарашөкеевтің айтуынша, жалпы Қызылорда облысы бойынша мал азығымен қамтамасыз ету үшін ішкі мүмкіндікті толық пайдаланып жағдайды шешуге болады. «Аудандар бойынша, елді мекендерде шөп шабу бригадаларын құру қажет. Осы екі күн ішінде барлық ауданның жағдаймен танысып жедел шешуді қажет ететін мәселелерді саралаймыз», деді ол.
Сондай-ақ ведомство басшысы Жалағаш, Сырдария, Шиелі және Жаңақорған аудандарын аралап, ауыл шаруашылығы тауарын өндірушілермен кездесіп, бүгінгі тыныс-тіршілігімен танысып, өтініш-тілектерін де тыңдайды.
