Олимпиаданы қорытындылады

 Бас хатшы Олимпия ойында­рындағы нәтижелерге қарамастан, әрбір спортшымыздың жетістігін мақтан тұтатынын жеткізді. Сон­дай-ақ А.Крюков Токио Олим­­пиадасындағы Қазақстан құра­масының сәтсіздігіне 10 қыр­күйекке дейін талдау жасалатынын айтты.

– Алдағы апталарда Ұлт­тық Олимпиада комитеті рес­пуб­ли­калық федерациялармен әрі Мә­дениет және спорт министр­лігімен бірлесіп Олимпия ойын­дарындағы ұлттық құрама ко­мандаларының нәтижесі мен дайын­дығына қатысты талдау жұмысын жүргізеді. 10 қыр­күйекке дейін спорт федерациялары Олимпиада бойынша нақты есепті ұсынады. Онда спортшылардың сәтті немесе нәтижесіз өнер көрсетуі мәсе­лесіне қатысты талдау болады. Қыркүйектің соңына қарай біз соңғы қорытындыны шығарамыз. Осыдан кейін қателіктерді түзету мен келесі олимпиадалық циклге дайындық жұмыстары басталады, – деді Ұлттық Олимпиада комитетінің бас хатшысы.

Ал жиынға қатысқан Мәдениет және спорт вице-министрі Ерлан Қожағапанов елімізде спорт түрлерін қаржыландыру тетігіне кеңінен тоқталды. Ол спорт түрлерінен бюджет қаражатының ашықтығы мен теңгерімді бөлуді қамтамасыз ету мақсатында 2017 жылы заңнамаға спорт түрлерін саралау түсінігі енгізілгенін, сол ережеге сәйкес жүргізілген саралау рәсімдері нәтижесі бойынша алдағы екі жылға басымдық берілетін спорт түрлерінің тізбесі бекітілетінін жеткізді.

– Саралау көрсеткіштерін ай­қын­даудың негізгі критерийлеріне жарыстарда тиісті спорт түрі бойынша спортшылардың жетістіктері, материалдық-тех­ни­калық базаның болуы, өңір­дің климаттық жағдайына сай спорт түрлері ерекшеліктері жатады. Осының нәтижесінде спорт түрлері негізгі үш топқа бөлі­неді. Біріншісі – дамыған спорт түрлері, екіншісі – жоғары әлеует­ке ие спорт түрлері, үшін­шісі – дамудың төмен әлеуе­тіне ие спорт түрлері. Осы арқы­лы қазіргі кезде спортты қаржы­ландырудың моделі әзір­ленді. Бұл өз кезегінде рес­публикалық деңгейде қаражатты объективті бөлуге кепілдік береді, – деді вице-министр.

Қазақстан бокс федера­ция­сының бапкерлік мәселелер жөніндегі вице-президенті Бақтияр Артаев боксшылардың Токио төрінде көрсеткен нә­ти­жесін сәтсіздікке балап, алдағы уақытта бокстан ұлттық құра­маның құрамы 80 пайызға дейін жаңаратынын айтты.

– Токио Олимпиадасында біз Риодағы нәтижені қайталай алмадық. Бразилияда боксшыларымыз бір алтын, екі күміс, бір қола медаль жеңіп алған болса, биыл бұйырғаны екі қола ғана болды. Осыған байланысты алдағы уақытта сараптама жүргіземіз. Қазанның соңында Сербияның бас шаһары – Белградта әлем чемпионаты өтеді. Сол әлем біріншілігіне мүлдем жаңарған құрам баруы мүмкін. Сонымен қатар құрамаға қазіргі таңда кәсіпқой бокста тәуір өнер көрсетіп жүрген жігіт­тер де келуге дайын екенін жеткізді. Енді кімдер бірінші оқу-жаттығу жиынына келіп дайын­дыққа кіріседі, сол боксшы­лар әлем чемпионатында жұды­рық­тасуға мүмкіндік алады, – деді Б.Артаев.

Сонымен қатар Қазақстан грек-рим, еркін және әйелдер күресі федерациясының вице-пре­зиденті Гю­зель Манюрова қазақстандық спорт­шылардың Олимпиададағы өне­ріне қатысты пікір білдірді.

Г.Манюрованың айтуынша, әйелдер күресі нәтижесін болжау мүмкін емес және статис­тика шығару оңай болмайды. «Сон­дықтан әйелдер күресіне қа­тысты нақты болжам жасау қиын, яғни жүлделі орыннан көрі­нуі тиіс спортшылар сенімді ақта­мады. Бұл ретте сәтсіздік, өз күшін дұрыс бағаламау, 5 жыл бойы спортшыларға түскен психо­логиялық қысым бізге теріс нәтиже берді», деді Г. Манюрова.