Бұл жобаға қатысу үшін еліміздің азаматтарына кәсіпкерлерге арналған Ismet.kz платформасына тіркеліп, өтініш беру қажет. «Қазақтелеком» АҚ қоғаммен байланыс қызметінің мәліметіне сүйенсек, цифрлы теңсіздікті болдырмау үшін компания 2018-2020 жылдар аралығында мемлекет-жекешелік әріптестігі арқылы ауылдық жерлерде 14 514 шақырым жерге талшықты-оптикалық байланыс желісін (ТОБЖ) тартып, шалғайдағы елді мекендер сапалы байланыс қызметіне қосылды. Нақты айтқанда, оптикалық байланыс желісіне 2,5 мыңнан астам мемлекеттік құрылым мен бюджеттік ұйым қосылды. Оның ішіне әкімдіктер, мектептер мен ауруханалар сынды әлеуметтік маңызы бар нысандар кіреді.
Талшықты-оптикалық байланыс желісінің қосылу орындарында ұялы байланыс операторлары өздерінің базалық стансаларын орналастырып, оның көмегімен интернет радиохабар арқылы әр үйге таралады. Алайда бұл барлық елді мекенді қамти бермейтіндіктен, байланыс операторы әр өңірде осы бағытта әріптестік орнатуға ниетті. Аталған жобаның аясында шағын, орта және ірі бизнес өкілдеріне талшықты-оптикалық байланыс желісі мен Wi-Fi радионүктелері сынды технологияларды пайдалануға рұқсат беріліп, ауылдағы халықты қажетті инфрақұрылыммен қамту арқылы табыстарын арттыруға мүмкіндік туады.
«Шартты түрде айтсақ, серіктесімізге ауылға қажетті құрылғыларды орнатып, оларды қолданыстағы ТОБЖ-ға қосу арқылы әр абонентке интернет жүргізу қажет. Бұл ретте кәсіпкер орнатылатын құрылғыны өз қаражаты есебінен тартатынын, сондай-ақ бұл шығын абоненттердің ай сайынғы төлемдерінен өтелетінін айта кеткен орынды. Нәтижесінде, кәсіпкер қысқа уақытта жергілікті желінің құрылысына салынған инвестициясын қайтарып қана қоймай, табыс әкелетін пайдалы бизнестің иесі атанады. Өйткені интернет тұрғындарға үнемі қажет болады», деді «Қазақтелеком» АҚ корпоративтік бизнес дивизионының бас директоры Алмат Қараманов.
Жобаның авторлары айтқандай, «цифрлы серіктестер» абоненттік базаны қосу арқылы ай сайынғы төлемнің 50%-ын иеленіп отырады. Осы орайда аталған кәсіпкерлер цифрлы коммуникацияны жеке және заңды тұлғаларға жүргізуге құқылы. Ұлттық компания аталған жоба ауылдық жерлердегі халықтың қажеттілігін өтеп, әл-ауқатын арттыруға септігін тигізеді деген сенімде. Қазір қанатқақты жоба Түркі-
стан облысының 176 ауылдық елді мекенінде сынақтан өткізіліп жатыр.