Мәдениет және спорт министрі Ақтоты Райымқұлова, Түркістан облысы әкімдігінің өкілдері, еліміздің белді қоғам, мәдениет және ғылым қайраткерлері қатысқан дөңгелек үстел барысында Өзбекәлі Жәнібековтің қазақ өркениетіне, археологиясына, этнографиясына, мұражай ісі мен тарихына арналған еңбектері баяндалды. Министр жиынды ашу сөзінде биыл Түркітілдес мемлекеттердің ынтымақтастық кеңесінің бейресми саммитінің қорытындысы бойынша Түркістан қаласы – Түркі әлемінің рухани астанасы болып жарияланғанын еске сала келе, елімізде рухани қазынамызды сақтап, ұрпаққа жеткізуді көздейтін мемлекеттік деңгейдегі түрлі бастамалар тұрақты түрде қабылданып келе жатқандығын жеткізді. «Бүгінде түркі әлемінің әдебиеті, өнері, ғылымы мен мәдениетінің дамуына үлкен үлес қосқан аса көрнекті ақындар, ойшылдар мен мемлекет қайраткерлерінің есімі ұлықталуда. Солардың бірі – мемлекет және қоғам қайраткері Өзбекәлі Жәнібековтің туғанына биыл 90 жыл толып отыр. Осыған орай «Ұлт рухын ұлықтаған – Өзбекәлі Жәнібеков» атты дөңгелек үстеліміздің Түркі әлемінің рухани астанасында ұйымдастырылуы да тегін емес. Өздеріңізге белгілі, Өзбекәлі ағамыз XX ғасырдың 70-ші жылдары Кеңес өкіметінің дәуірлеп тұрған уақытында Қожа Ахмет Ясауи кесенесініӊ қайта қалпына келтірілуіне ұйытқы болды. Әулие кесенесі негізінде «Әзірет Сұлтан» қорық-музейінің құрылуына орасан зор еңбек етті. Төрткүл дүниеге аты мәлім, түркі жұртына ортақ Тайқазанның Санкт-Петербургтің Эрмитаж музейіндегі көрмеден елге оралуына сіңірген еңбегі ерекше. Өзбекәлі Жәнібеков қазақ халқыныӊ ұлттық мәдениетініӊ, ана тілініӊ, дәстүрі мен әдет-ғұрпыныӊ жаӊарып, дамуына өлшеусіз үлес қосқан біртуар тұлға, ғалым-этнограф. Ол отандық музей ісінің дамуында өзіндік қолтаңбасын қалдырып, еліміздің көптеген өңірінде этнографиялық музейлердің ашылуына бастамашылық жасады. Қазақстанныӊ тарихи және мәдени ескерткіштерін сақтау мен қалпына келтіру мақсатын көздеген «Арқас» қоғамыныӊ құрылуына, «Шертер», «Адырна», «Алтынай» және тағы басқа да көптеген фольклорлық өнер ансамбльдерін ұйымдастыруға ұйытқы болды. «Қазақтыӊ ұлттық қол өнері», «Қазақ киімі», «Ежелгі Отырар», «Тағдыр тағылымы» секілді кітаптардыӊ авторы, тарих ғылымдарының кандидаты. Ендігі жерде ұлтымыздың тарихын, мәдени мұрасын, өнерін, өткен әдебиетін зерттеуге өлшеусіз үлес қосқан ғалымның еңбегін насихаттау сіз бен біздің басты мақсатымыз. Бүгінде Түркістан облысында Отырар мемлекеттік археологиялық музей-қорығына қарасты Арыстан баб кесенесінің іргесінде Ясауи ілімін жалғастырушы Құрбан Жаманбайұлы мен Өзбекәлі Жәнібековтің кесенесі орналасқан. Бұл кесенелер Отырар музей-қорығының аумағында болуына байланысты Мәдениет және спорт министрлігі Мәдениет комитетіне аталған музей-қорығының қарамағына алу бойынша жұмыс жүргізуді тапсырамын», деді А.Райымқұлова.
Иә, кесененің музей-қорық қарамағына алынуы мемлекет және қоғам қайраткерін ұлықтау мен құрметтің бірі дер едік. Өйткені жуырда Алматыда өткен республикалық ғылыми-практикалық конференцияда Сенат депутаты Алтынбек Нұхұлы Арыстан баб қорық музейі маңындағы жабылып қалған Өзбекәлі Жәнібеков музейін тарихи-этнологиялық сипатта қатарға қайта қосу, Түркістан қаласында кең көшеге есімін беріп, ескерткішін орнату, 5 томдық шығармалар жинағын толықтырып жарыққа шығару және өмірінен деректі кино туындылар жасау, өзі оқыған Абай атындағы Қазақ ұлттық педагогикалық университетінде Өзбекәлі Жәнібеков атындағы аудиторияны ашу, сондай-ақ халықаралық ғылыми-практикалық конференция өткізу туралы ұсыныстарын жеткізген болатын. Түркістанға оралсақ, іс-шара барысында жұртшылық назарына профессор Құлбек Сәрсенұлының «Ұлттың ұйытқысы» атты кітабы ұсынылды. Қонақтар мен қатысушылар үшін Қожа Ахмет Ясауи мұражайына экскурсия ұйымдастырылды және «Тұран» этно-ансамблінің концерті өтті.
Айта кетейік, бұған дейін Отырар мемлекеттік археологиялық қорық-музейі қайраткердің туған жерінде «Ұлт рухын ұлықтаған – Өзбекәлі Жәнібеков» атты мәдени іс-шара ұйымдастырған болатын. Жазушы, тарихшы, этнограф, өнертанушы Өзбекәлі Жәнібековтің еңбегін дәріптеу мақсатында өткізілген бұл іс-шараға мемлекет және қоғам қайраткерлері, зиялы қауым мен қоғам өкілдері қатысты.
Түркістан облысы