Бүгін азық-түлік тиелген жүк көлігі Байзақ ауданына жетіп, жергілікті әкімдік тарапынан ұйымдастырылған орталық қоймаға орналастырылды. Аталған көмек төтенше жағдайдан зардап шеккен тұрғындарға үлестірілетін болады. Жергілікті жауапты басшылар келген көмектің есебін алып, қиын сәтте қол ұшын созған мақтааралдықтарға алғыстарын білдірді.
«Өткен жылы Мақтаарал ауданында су тасқыны орын алған кезде ең алғаш болып Жамбыл облысынан көмек келген болатын. Сонымен қатар барша ел-жұртымыз біздің ауданға тоқтаусыз көмектерін жіберіп отырды. Сондықтан Жамбыл облысы Байзақ ауданында орын алған жағдай бойынша үй-күйсіз қалған отандастарымыздың тағдыры бізді алаңдатып, гуманитарлық көмекті алғашқылардың бірі болып алып келуге себепші болды», деді «Жастар ресурстық орталығы» КММ директоры Сүндет Кенжебаев.
Жүк көлігіне негізінен, макарон өнімдері, май, күріш, қант, қарақұмық, жеңіл дайындалатын тамақ өнімдері, тәттілер және минералды сусындар тиелді.
Айта кетейік, гуманитарлық көмекті ұйымдастыруда өткен жылы су тасқынынан зардап шеккен Өргебас, Фердауси ауылының тұрғындары және ауданның кәсіпкерлері белсенділік танытты.
