Маңғыстау облысында 20 этномәдени бірлестік бар. Жақында Қазақстан халқы Ассамблеясы құрамында үнемі белсенділік танытып, түрлі шаралардың басы-қасында жүретін олар, яғни өзге ұлт өкілдері бас қосып, Жолдауға бірауыздан қолдау білдіретіндігін жеткізді.
Маңғыстау облысында 20 этномәдени бірлестік бар. Жақында Қазақстан халқы Ассамблеясы құрамында үнемі белсенділік танытып, түрлі шаралардың басы-қасында жүретін олар, яғни өзге ұлт өкілдері бас қосып, Жолдауға бірауыздан қолдау білдіретіндігін жеткізді.
Бұл басқосуды Маңғыстау облыстық Қазақстан халқы Ассамблеясы хатшылығының басшысы Г.Есмурзина ашып, Мемлекет басшысы Н.Назарбаевтың қазақстандықтарға жолданған кезекті Жолдауы жайлы айтып өтті.
– Елбасының әрбір жылғы жолдаулары бәрімізге жақсы таныс. Сіздердің әр уақытта жолдауларды тыңдап, қолдау білдіріп келе жатқандарыңыз бізге түрлі деңгейдегі бұқаралық ақпарат құралдарынан белгілі. Он сегізінші болып жолданған биылғы «Қазақстан жолы – 2050: бір мақсат, бір мүдде, бір болашақ» атты Жолдаудың арқалап тұрған жүгі барынша ауыр және маңызды. Саяси маңыздылығы, мемлекеттік дамудың тетіктерін тиянақтауы тұрғысынан алдыңғы жолдауларды мағыналық жағынан толықтыра түсті. Бұл Елбасы Нұрсұлтан Назарбаев жүргізіп отырған саясаттың біртұтастығының, алып межелерді кезең-кезеңімен жүзеге асыру арқылы тәуелсіз елімізді дамыған 30 елдің қатарына қосу мақсатының көрінісі, – деген Гүлжан Мақсұтқызы жаңа Жолдауға тоқталды.
Шағын және орта кәсіпкерлікті дамыту, экономика мен энергетика, әлеуметтік және ауыл шаруашылығы салалары, көлік, транзиттік тегеурінділікті нықтау, геология саласын дамытуды қолға алу, отансүйгіштікті дамыту бағытында айтылған тапсырмаларға жеке-жеке тоқталды. Этномәдени бірлестік өкілдері шәкіртақының, жалақының өсуіне ықылас танытумен бірге, Ақтау теңіз портының жаңғыртылуының, «Бейнеу – Жезқазған» теміржол желісі құрылысының салынуына байланысты батыс пен шығыс арасындағы «алтын көпірге» айналудың аймақ үшін маңыздылығын жоғары бағалады.
Өзге деп өзекке теппей, бабасынан бастап бауырына басқан Қазақ еліне риза этномәдени бірлестіктер өкілдерінің сөзін ұсынуды жөн санадық.
Гиви СВАНИДЗЕ, «Сакартвело» грузин этномәдени бірлестігінің төрағасы:
– Мемлекет басшысының жыл сайынғы жолдауларынан ұлттық мұраттың лебі есіп тұрады. Биылғы Жолдау да өміршең идеяларға толы. Біз мұнда айтылған алып бастамаларды, тың тапсырмаларды тек бірліктің арқасында жүзеге асыра аламыз. Біз Елбасына осылай қолдау көрсетуіміз керек. Мен Нұрсұлтан Назарбаевтың саясаты Қазақстанды алға шығарады деп ойлаймын және Жолдауды толық қолдаймын.
Юсуп ШАХШАЕВ, «Дағыстан» этномәдени бірлестігінің төрағасы:
– Жолдауда айтылған Ақтау порты – Қазақстанның экономикасы үшін қаншалықты маңызды екені баршаға белгілі. Ал оның дамуы, тасымалданатын жүк көлемінің артуы Маңғыстау өңірі үшін өте-мөте тиімді. Оған Бейнеуден орталық Қазақстанға қарай салынып жатқан теміржол құрылысын қосыңыз. Мұның бәрі аймақтың өсіп-өркендеуіне бастайтын болады. Жаңа Жолдауды да қашанғы дәстүріне, сипатына сай өн бойына Қазақстанның болашақ дамуының бағыт-бағдарын жинап, тұтастырған құжат болды деп санаймын.
Гүлайым ШЫНТЕМІРҚЫЗЫ,
«Егемен Қазақстан».
Маңғыстау облысы.
