Өнер • 14 Қазан, 2021

Жұмекен жырын жаттағандар

287 рет көрсетілді

Қошалақ аталатын құйқалы топырақта кіндік қаны тамып, қазақ поэзиясына өзіндік үнімен танылған қаламгердің әр өлеңінен туған еліне, ұлтына деген керімсал сағынышы байқалушы еді. Жақында жырларымен ел жадында жатталған Әнұран авторларының бірі, белгілі ақын Жұмекен Нәжімеденов атындағы көркемсөз оқушылардың республикалық байқауы өтті. Байқау ел Тәуелсіздігінің 30 жылдығына арналды.

– Атырау облысында бұл байқау 2016 жылдан бері ұйымдастырылып келеді. Байқауды өткізудегі басты мақсат – Жұмекен Нәжімеденовтің әдеби мұрасын халық, әсіресе, жастар арасында насихаттау, ақынның шы­ғарма­шылығы арқылы жас ұр­пақ­ты адамгершілікке, ұлттық рухқа, отан­сүй­гіштікке тәрбиелеу. Биылғы байқау «Тәуелсіз еліме – 30 жыл» деп аталды, – дейді облыс әкімінің орынбасары Бақытгүл Хаменова.

Белгілі жазушы Мереке Құлкенов төрағалық еткен қазылар алқасы елі­міздің әр өңірінен қатысқан жас көр­кемсөз оқушылардың шеберлігін сарапқа салды. Әсіресе, көркем мәтін­ді таңдау талғамы, оқу шеберлігі, дауыс мәнері мен тіл тазалығына, сахнада өзін ұстауына баса мән берілді. Іс-ша­раға ақынның үлкен қызы Айкен Нәжі­ме­денова да қатысып, бірегей қалам­гердің жырын жаттағандарға сәттілік тіледі.

Қазылар алқасының ұйғаруымен Әйгерім Сағатова (Қызылорда облысы), Нұрмұхамед Серікбаев (Қос­танай облысы) пен Хұсни Ғаб­саттар (Ақтөбе облысы) ынталандыру жүлдесіне ие болды. Үшінші жүлденің 100 мың тең­гелік сертификаты алматылық Меруерт Аңсат пен жамбылдық Бақ­тияр Бекназаровқа берілді. Екінші жүлдені (200 мың теңге) атыраулық Бұлан Нұрғалиев иеленді. Ал 300 мың теңгесі бар бірінші жүлдеге Павлодар облысынан қатысқан Расул Темеш лайық деп танылды.

Байқаудың бас жүлдесі – 400 мың теңгені Орал қаласындағы №42 «Ақ ниет» мектеп-гимназиясында қазақ тілі мен әдебиеті пәнінен дәріс беретін мұғалім Абылайхан Қуанышев жеңіп алды.

Соңғы жаңалықтар

Доллар бағасы арзандады

Қаржы • Бүгін, 15:47

Ұқсас жаңалықтар