Медицина • 26 Қазан, 2021

Он бірінші палата

33 рет көрсетілді

Тобыл қаласындағы инфекциялық ауруханада 10 күн жатып, емдеу мекемесінде болып жатқан жағдайдың бәрін өз көзімен көріп шыққан Герхард Уманский бұрын өзі сезінбей жүрген көп нәрсеге көз жеткізгенін айтады. Әсіресе, оны дәрігер мамандардың жанкештілігі қайран қалдырыпты.

«Бірінен кейін бірі толассыз түсіп жатқан адамдардың көп­ті­гіне қарамастан, медици­на қыз­меткерлері бірде-бір нау­қасты назардан тыс қал­дыр­май, өбектеп жүріп өлім аузынан алып қалып жатыр. Өз атымнан ғана емес, індет тырнағына ілініп, госпитальда емделіп, айы­ғып, аман-есен үйіне оралған бар­ша науқастардың атынан дәрі­герлерге алғыс айтамын! Гос­питальда болып жатқан өлім мен өмірдің арасындағы ар­палысты дәрігерлер мен науқастар ғана біледі. Өз басым өкпем 25% зақымданып 11-палатада жаттым. Мені қойшы, өзгелермен салыстырғанда, жарам жеңіл болды. Қасымдағы Евгений есімді жас жігіт қызуы көтеріліп, көпке дейін дірілдеп жатты. Дәрігерлер қанша тырысқанымен дене қызуын түсіре алмады. Медбике науқас көршімнің қасынан таң атқанша кетпеді. Дәрі көмектеспеген соң, Женя­ның денесін әлсін-әлсін спиртпен сүртіп отырды. Кейде қалғып кетіп, көзімді ашып қалам да, мед­бикенің әлі отырғанын көрем. Шынтуайтына келгенде, оның міндеті – дәрі салу ғана ғой, ал мен көрген медбике дәріден қайран болмаған соң, өз әжесінен үйренген халық емін қолданып, науқастың денесін таңға дейін спиртпен сүртіп отырды. Оған қарап отырып, егер дәрігердің бойында адамгершілік, жана­шыр­лық, жауапкершілік сынды адами қасиеттер болмаса, науқасты ешбір емдеу хаттамасы құтқарып қала алмайтынына көзім жетті», деді дертінен айы­ғып шыққан науқас.

Г.Уманский науқастардың көптігінен медбикелердің тәулі­гі­не 24 сағат бойы тізе бүкпей жанталасып жүретінін жеткізді.

«Мұндай мамандарға тірісін­де ескерткіш қойса, артық болмайды. Бәрі – жап-жас қыздар. Біз түнге қарай ұйқыға кетеміз, ал олар әлі зыр жүгіріп жүреді. Таңертең оянсақ, шаршаған, бірақ әлі ем-дом жасап жүр­ген медбикелерді көреміз. Пала­та­ның тазалығын сақтау да сол кісілердің мойнында. Мен 10 күн ішінде 10 келі салмақ жоғалттым. Короновирус дегенің – жай нәрсе емес, нағыз тажалдың дәл өзі. «Басы ауырмағанның бал­тыры сыздамайды» демекші, ауырмаған адам палатада болып жатқан сұмдықты білмейді, біл­мей-ақ та қойсын», дейді Г.Уманский.

Герхард – Германияның аза­маты, алайда Қазақстанда тұру­ға да заңды рұқсат қағазы бар. Қазір Қостанай қаласында тұ­ра­ды. Айтуынша, қостанайлық дәрігерлер Еуропа дәрігерлерінен еш кем түспейді. Адамгершілік ұл­т­қа қарамайды. Оған біздің дәрігерлердің жанкешті еңбегі дәлел бола алады.

 

Қостанай облысы

Соңғы жаңалықтар

Тарихымызды тану – ұлы іс

Қазақстан • Кеше

Отыз жылдыққа ой қорытқан

Қазақстан • Кеше

Ұқсас жаңалықтар