Жастарға берілген үлкен мүмкіндік
Атап айтқанда, Astana Hub, «Транстелеком» АҚ және Plug and Play IT экожүйені дамыту, инвестиция тарту, акселерация бағдарламаларын құрып іске асыру, сондай-ақ дарынды жастарды оқытып, қарым-қатынасты нығайтуға ниетті.
«Бүгінгі қоғам экономикалық дамудың факторы ретінде стартап экожүйесін дамытудың маңыздылығын мойындайды. Компанияларымыз бен қоғамдастықтың мүддесі үшін ұзақ мерзімді және тиімді ынтымақтастықтың қажет екеніне сенімдіміз. Бұл Қазақстандағы стартап экожүйесін дамытуға септігін тигізеді деген үміттеміз», деді Plug and Play компаниясының өкілі Санжар Тароми.
Осы ынтымақтастық арқылы Astana Hub және «Транстелеком» АҚ Plug and Play компаниясының еліміздегі өкілдігінің қолдауымен корпоративтік акселераторды іске қосуға мүмкіндік алды. Осылайша, 20 IT стартапшы Кремний алқабының сарапшыларынан тәлім алып, инвестиция тартуға, сондай-ақ ірі корпорациямен қанатқақты жобаны іске қосу арқылы Playbook Plug and Play платформасында орналасуына жол ашылады. Бұл акселераторға әлемнің өзге елдерінен IT командалар қатысатынын ескерсек, қазақстандық компанияларға олармен де өзара жұмыс істеуге тура келеді.
«Кез келген стартаптың негізгі мақсаттарының бірі – нарықта қалып, өнімге деген сұранысты арттыру. Өзгелердің көлеңкесінде қалмай Google, PayPal немесе Dropbox сияқты аңызға айналудың жолы қандай? Бұл сұраққа осы компаниялардың сәтті шығуына ықпал еткен Plug and Play-дан басқа ешкім жауап бере алмайды. Цифрлық даму, инновациялар және аэроғарыш өнеркәсібі министрлігінің қолдауымен «Транстелеком» АҚ және Plug and Play Kazakhstan-ның ынтымақтастығы арқылы жас IT компаниялардың әлеуетін арттыруды жалғастырамыз», деді Astana Hub-тың бас директоры Мағжан Мәдиев.
Сөз орайы келгенде айта кетейік, Plug and Play Tech Center – штаб-пәтері Кремний алқабында орналасқан әлемдегі ең ірі акселератор және инвестор. Олардың платформасы 40 мыңнан артық стартапты, 500-ден аса әлемдегі жетекші корпорацияны, оның ішінде университеттер мен мемлекеттік мекемелерді, сол секілді 300-ден астам венчурлық қорды, біріктіреді. Жыл сайын Plug and Play әлем бойынша стартаптарға 25 мың доллардан 500 мың долларға дейін инвестиция бөледі.
Электронды үкімет рейтингінде үздіктер қатарында
Цифрлық даму, инновациялар және аэроғарыш өнеркәсібі министрі Бағдат Мусиннің айтуынша, еліміздің электронды үкіметті дамытуда және цифрлы қызметтерді ұсынуда айтарлықтай нәтижелері бар. Әйтсе де бұл бағытта атқарылуы тиіс шаруа әлі шаш етектен, деді ведомство басшысы.
«Еліміздегі IT-индустрия мен цифрландыру жұмысы мемлекет пен IT-қоғамдастықтың қарқынды байланысы есебінен жолға қойылды. Бүгінде халықаралық рейтингтерде жеткен жетістігіміз аз емес. Мысалы, БҰҰ-ның Электронды үкіметті дамытуға байланысты көрсеткішінде 9-орында келеміз. Осы рейтингтің қосалқы рейтингінде «Онлайн қызметтер» субиндексі жағынан әлемде 11-сатыда тұрмыз. Бірақ осымен тоқтап қалуға болмайтынын жақсы түсінеміз.
Таяуда Президентке автотіркеуден 5 минут ішінде өтуге болатынын көрсеткен едік. Менің ойымша, әлемдегі кейбір мемлекеттерде мұндай қызмет әлі күнге дейін жоқ. Неге десеңіз, банк қосымшасынан шықпай-ақ сатушы мен сатып алушы 4-5 түймені басу арқылы көлікті қайта рәсімдеп, сату мәмілесін жасай алады. Бұл айтарлықтай көрсеткіш. Былтырғы қыркүйек айымен салыстырғанда биыл сатып алушылардың 35%-дан астамы автокөлікті сатып алу рәсімін онлайн-форматта іске асырды. Демек бұл клиентке бағдарланған халықтық қызмет түрін жасай алғанымызды аңғартады. Осы жұмысты адамдардың аталған қызметті саналы түрде таңдайтындай етіп атқардық», деді Б.Мусин.
IT қызметінің экспорты ұлғаюда
Astana Hub-тың бас директоры Мағжан Мәдиев айтқандай, бүгінде аталған технопаркте 558 IT компания тіркелген. Олардың 3 жыл ішіндегі жиынтық кірісі 166 млрд теңгені құрады. Жыл соңына дейін технопарк қатысушыларының экспортын 50 млрд теңгеге дейін жеткізу жоспарланған. Десе де бұл парктің қатысушысына айналу оңай емес, дейді М.Мәдиев.
«Біріншіден, компанияның қызметі IT нарығына бағытталған болуы тиіс. Демек табысының 100%-ы осы саладан түсуі қажет. Екіншіден, компанияның филиалдық желісі болмауы керек. Яғни ірі фирма емес, стартап болғаны абзал. Үшіншіден, технопарктің қатысушысы кірісінің 1%-ын Astana Hub-тың пайдасына салуға міндеттеледі. Бұл қаражатты экожүйенің дамуына жұмсап, қайта инвестициялауға жіберіледі», деді Astana Hub-тың бас директоры.
Қазір Seed Money бағдарламасы аясында технопарк 35 стартапты іріктеп, оларға 5-20 млн теңгеге дейінгі көлемде қаржылық көмек көрсетілетін болады.
Digital Bridge форумында Astana Hub ұйымдастырған байқауда топ жарғандар анықталды. Мәселен, Parqour, Kids Security, SipSim, FlowSell.me және Oqylyq.kz стартаптарына бизнесті дамытуға 20 млн теңгеден берілді.
