Фильм қазақтың көрнекті ағартушы-ғалымы, қоғам қайраткері Ахмет Байтұрсыновтың 150 жылдық мерейтойына арналған. Картинаның сюжеті Ахмет Байтұрсынов өмірінің барлық кезеңін қамтиды.
Түсірілім тобын Ерлан Нұрмұхамбетов пен Ерген Тоқмурзин басқарады. Е.Нұрмұхамбетов «Жаңғақ ағашы» фильмі үшін Пусан халықаралық кинофестивалі (Оңтүстік Корея) «Жаңа ағымдар» секциясының Гран-приін иеленген. Режиссердің «Уақыт жолдары» атты соңғы картинасы да осы жылы Францияда прокатқа шықты. Оның серіктесі Ерген Тоқмурзин көптеген деректі фильмнің қоюшы режиссері болған.
Басты рөлде – Қазақстанның еңбек сіңірген қайраткері Азамат Сатыбалды. Бұрынғы тергеу изоляторының ғимаратында жайғасқан түсірілім алаңында белгілі актер болашақ фильм туралы аз-кем ойын білдірді. «Бұл – ұлт ұстазы Ахмет Байтұрсынов туралы фильм. Оның өмірі, қоғамдағы істері және ең бастысы, оның күресі туралы. Бұл мемлекеттің арнайы тапсырысымен түсіріліп жатқан үлкен жоба. Байтұрсынов – біздің мақтанышымыз. Менің ойымша, біздің жас ұрпақтың бойындағы отаншылдық сезімді ұштау үшін осындай мазмұндағы фильмдерді көп түсіргеніміз дұрыс. Өйткені Ахмет Байтұрсыновтың аласапыран уақытқа қарамай ұлт үшін атқарған еңбегі, Алаш Орда қайраткерлерінің ерлігі – бүгінгі күні кездеспейтін батылдық. Сондықтан сол кездегі оқиғаларды бүгінгі көрерменге көрсетудің, олардың өнегелі істерін бүгінгі ұрпаққа үлгі етудің барлық мүмкіндігі қарастырылуы керек», – дейді актер.
Сондай-ақ картинада Назгүл Қарабалина, Александр Багрянцев және Ерлан Кәрібаев секілді белгілі актерлер бой көрсетеді.
Фильм негізінен Алматы қаласы мен Шығыс Қазақстан облысында түсіріледі. Қоюшы оператор – Марс Омаров. Бас продюсер – Дастан Атығаев. Сценарий авторы – Ғалым Доскен. Жыл соңына дейін авторлар 14 ауысымды түсіруді жоспарлап отыр. Фильмнің негізгі бөлігі келесі жылы түсіріледі. Картинаны Folklore media ЖШС шығарады.
АЛМАТЫ
