Аймақтар • 19 Қараша, 2021

Қыран құстар сайысы

64 рет көрсетілді

Бұқар жырау ауданында құсбегілердің облыстық чемпионаты осымен бесінші рет ұйымдастырылды. Бұл сайыста Қарағанды мен Теміртау қала­ларынан, сонымен бірге облыстың бес ауданынан 15 құсбегі бақ сынады.

«Сарыарқа-2021» сайысының өтуіне жауапты маманның бірі Бұқар жырау аудандық дене шынықтыру және спорт бөлімінің басшысы Олег Цыганков ауданда ұлттық спорт түрлерінен жарыс жиі ұйымдастырылып тұратынын атап өтті.

– Жарыстар күзде де, қыста да өтеді. Бұл спорт түрінің жанкүйерлері негізінен ауылдық жер­­лерден келеді. Дегенмен қазір қалалықтар да қы­зығушылық таныта бастады. Мысалы, осы жолы Қара­ғанды мен Теміртаудың өкілдері де сынға түсті. Көшбасшылар қатарында Қарқаралы және Жаңаарқа аудандарының спортшылары болды, – дейді О.Цыганков.

Бұл жолғы жарыста қыран құстар қоянға түсіп, түлкінің тұлыбын іліп, сондай-ақ арнайы жатты­ғуларды орындады.

Аса тартысты өткен чемпионат қоры­тын­ды­сында Бұқар жырау ауданындағы Доскей ауы­лының тұрғыны Темірғали Төлегенұлы бүркіт­пен аң аулау сынында жеңімпаз атанды. Қара­ғандылық Аслан Егінбай екінші жүлдеге ие болса, үшінші орынды Бұқар жырау ауданындағы Тоғыз­құдық ауылы атынан сынға түскен Метай Есен­келді місе тұтты.

Ал қаршығалар сынға түскен сайыста қарағанды­лық Заңғар Досанның құсы топ жарды. Жаңаарқалық Карифулла Амангелді мен Шәкәрім Әбдірахман, сәйкесінше екінші және үшінші жүлделерді ием­денді.

Ақтоғай ауданының намысын қорғаған Таңат Ос­панқұловтың құсы сұңқарлар сынында үздік шықты. Шет ауданынан қатысқан Асан Әбдіразақовқа екінші жүлде бұйырды. Ал қола медаль қарағандылық Күнтуған Әділханның еншісіне тиді.

Жоғары деңгейде өткен бесінші чемпионатта топ жарған құсбегілер алдымыздағы ақпан айында өтетін республикалық чемпионаттың жолдамасына ие болды.

 

Қарағанды облысы,

Бұқар жырау ауданы

Соңғы жаңалықтар

Айбергенов күнделігі

Әдебиет • Кеше

Кофе және әдебиет - 6

Әдебиет • Кеше

Жасанды интеллект дәуірі

Технология • Кеше

Ұқсас жаңалықтар