Қоғам • 08 Желтоқсан, 2021

Қазақстанда несиелерге рақымшылық жасала ма?

1320 рет
көрсетілді
2 мин
оқу үшін

Қазақстанда кешелі бері әлеуметтік желілерде ипотекалық тұрғын үй қарыздары бойынша «несиелік рақымшылық» жарияланды деген ақпарат тарады. Қаржы нарығын реттеу және дамыту агенттігі бұл  ақпараттың негізсіз екенін айтты, деп жазады Egemen.kz.

Қазақстанда несиелерге рақымшылық жасала ма?

Қазіргі уақытта 2007-2008 жылдардағы әлемдік қаржы дағдарысынан, сондай-ақ ұлттық валюта бағамының әлсіреуінен барынша зардап шеккен ипотекалық қарыз алушылардың жеке санатына көмек көрсетіліп жатыр. Агенттік 2015 жылдан Ипотекалық қарыздарды қайта қаржыландыру бағдарламасын іске асырып келеді. Осыған орай, бағдарлама талаптары бойынша қаржылық қолдау 2004-2009 жылдар аралығындағы кезеңде ипотекалық қарыз алған, сондай-ақ 2016 жылғы 1 қаңтарға дейін валюталық ипотекалық қарыз алған борышкерлерге көрсетіледі.

Бағдарламада белгіленген қаржылай көмек шаралары жалғыз баспанасы бар қарыз алушылар және халықтың әлеуметтік осал топтары (ХӘОТ) санатындағы борышкерлер үшін пайыздық мөлшерлемені 3%-ға дейін төмендетуді көздейді. Қалған валюталық ипотекалық қарыз алушылар үшін пайыздық мөлшерлеме 12%-дан аспайды. Бұдан басқа, бағдарлама шеңберінде сыйақы, айыпақы (өсімпұл, айыппұлдар) және комиссиялар бойынша мерзімі өткен берешек есептен шығарылды.

Валюталық ипотекалық қарыздарға қатысты берешекті Ұлттық банктің 2015 жылғы 18 тамыздағы бағамы бойынша (1 АҚШ доллары үшін 188,35 теңге) теңгеге конвертациялау жүргізілді.

«2020 жылғы қаңтардан бастап бағдарламаға қатысатын ХӘОТ санатындағы ипотекалық қарыз алушылар үшін қосымша көмек шаралары іске асырылуда. Мұндай қарыз алушыларға қолдауды банктер олардың қаржылық және әлеуметтік жағдайын жан-жақты талдау негізінде жеке тәртіппен көрсетуде, талдау нәтижелерінен кейін банктер қарыз бойынша берешекті төмендету және 20 000 теңге мөлшеріндегі ай сайынғы төлеммен жеңілдік берілген кестелер белгілеу туралы шешім қабылдайды. Қарыз алушылардың бұл санатына қолдау көрсету 2021 жылдың соңына дейін аяқталады.

Азаматтар дәйексіз мәліметтерге сенбеуді және ресми әрі тексерілген дереккөздерінен ғана алынған ақпаратты басшылыққа алуды сұраймыз», делінген Қаржы нарығын реттеу және дамыту агенттігі таратқан хабарламада.