Ертеңін ойлаған ел озады

Егемендіктің елең-алаңынан бүгінге дейінгі айтулы оқиғалар жай факті ғана емес, оның арғы жағында Ұлт көшбас­шысына халық сенімін ақтауға жүктелген зор жауапкершілік, аянбай жұмсалған күш-жігер, жүрек тебірентерлік тарихи сәттер жатыр. Сондықтан біз мұны отыз жыл­дық торқалы той қарсаңында Тұңғыш Пре­зи­денттің туған халқымен ой бөлісуі, Тәуелсіздік тағылымы деп қабылдадық.

Мақалада қиындық атаулыға қасқая қарсы тұрып, үздіксіз алға жылжыған қазақ хал­қы­ның қилы тағдыры, күресі мен жасам­паз­­д­ығы ерекше баяндалады. Әсіресе, ашар­шылықтың екі бірдей толқыны – 1921-1922 мен 1930-1933 жылдардағы сұр­қия саясат салдарынан орна­ған зұлмат кезінде ұлттың тең жар­тысы қырылғаны, одан кейін есін енді жия бастағанда ста­лин­­дік қанды репрессия сүт беті­не шығар қаймақтарымызды жалмап кетуі жүрекке қанша салмақ түсірсе де, Тәуелсіздік жолын­дағы құрбандықтың мәні мен мәртебесін айқындайды.

«Мен бұл оқиғалардың бәрін көзіммен көрмесем де, әкем мен анамның өзегін мұң мен зар өртеп, жанарын жасқа шылап отырып айтқан сөздерінен, азаттық жолында шейіт болған аруақтарға арнап, күбірлеп оқыған дұғаларынан естіп-біліп, көкірегіме түйіп өстім», дейді Елбасы. Содан кейін Екінші дүниежүзілік соғысты еске түсіре келіп, қаршадай күнінен өгізге жегілген соқамен жер жыртып, масақ теріп, еңбекпен көзін ашқан қатарластарын жадында жаңғыртады. Біз бұдан сұм соғыста ұрланған талайлардың балалық шағын ғана емес, адамды қандай қиындықтан да аман алып шығатын құдірет еңбек екенін аңғара түсеміз.

Тұңғыш Президент кешегі Кеңес Одағы құрамындағы жетпіс жылдықтың да нәтижесі еліміздің пайдасына шешілме­генін айта келіп, ХХ ғасыр басындағы Алаш қайраткерлерінің сөзінен мысал келтіреді. Мұның бәрі азат елдің жастарына тәуелсіздікке барар жолдың қандай азапты болғанын және өткен тарихты қастерлеп, одан сабақ алудың қажет екенін ұғындырады. Елбасының «Тәуелсіздік – бабалар қанымен келген киелі құндылық» дейтіні сондықтан болса керек.

Қазіргі таңда еліміз дамудың жаңа тарихи кезеңіне аяқ басты. Себебі осы күнге дейін қол жет­кізген жетістіктер Қазақ­стан­ның болашағын жаңаша меже­леуге мүмкіндік беріп отыр. Келесі кезеңде, яғни 2030 жыл­ға дейін экономикалық сая­сат не­гізіне инновациялық экономи­ка алынады. Осылайша, халқымыз­дың өмір сүру сапасы орташа еуро­палық деңгейге сәйкес болмақ.

«Тәуелсіздік тағылымы» ел үшін, әсіресе, жаңа буын үшін пара­сат пен ең­бек­тің, тәуекел мен жа­сампаздықтың, талғам мен тал­дау­дың маңызын жан-жақ­ты б­а­йып­татады. Өткен жол – тағы­лым, жаңа жол – үміт. Елдің бере­ке-бір­лігі артса, екеуінің де қадірі есе­ленеді. Ертеңін ойлаған ел озады!

Ерлан СЫДЫҚОВ,

Л.Н.Гумилев атындағы  Еуразия ұлттық университетінің басқарма төрағаcы-ректоры,

ҰҒА академигі