Бүгінде облыстағы жағдай полиция қызметкерлерінің толық бақылауында. Қоғамдық тәртіпті қамтамасыз ету мақсатында төтенше жағдай режімі аяқталғанша облыс аумағында 10 блок-бекет орналастырылды. Қазір Ақтөбе қаласында 3 блок-бекет, ал аудандарда 7 блок-бекет бар. Осы орындарда полиция қызметкерлері мен Қорғаныс министрлігінің әскерилері қызмет атқаруда, олар облыс және аудан орталықтарынан кіріп-шығып жатқан автокөліктерді тексереді.
Ақтөбе облысында коменданттық сағат мерзімі жергілікті уақытпен түнгі сағат 23.00-ден таңғы 07.00-ге дейін ұзартылды. Елдегі шектеулерге қарамастан түнгі мезгілдегі жүрістерін тыймаған тұрғындар да кездесіп қалады. Тек 10 қаңтар түні ғана коменданттық сағатты бұзғаны үшін полиция бөлімдеріне 115 азамат жеткізілсе, 83 әкімшілік адам жауапкершілікке тартылды. Коменданттық сағат режімін өрескел түрде бұзып, құжатсыз жүрген, жүрістері күдікті 30 ақтөбелік қамауға алынса, 9 адамға айыппұл салынып, 20 тұрғынға ескерту берілді.
10 қаңтарда Ақтөбе қаласының іргесіндегі бір блок-бекетте «Ваз-2140» автокөлігін тексеру кезінде жүргізушінің жанында отырған жолаушыдан 12 калибрлі тегіс ұңғылы екі мылтық табылды. Қазір 40 жастағы көлік жүргізушісі мен оның қасындағы жолаушының үстінен әкімшілік іс қозғалды. Мылтықтың қайдан шыққаны, құжаттары тексеріліп жатыр.
Ақтөбе облысы
