Баға тұрақтылығына бақылау қажет
Соңғы уақытта әлеуметтік маңызы бар бес тауар түрінің бағасы шекті көрсеткіштен жоғары болған. Халық көп тұтынатын қырыққабат, қарақұмық, картоп сияқты азық-түлік түрлерінің бағасы қымбат. Облыстық ауыл шаруашылығы басқармасының басшысы Ербол Жиенқұлов бұл жағдай шекарадағы мәселелермен байланысты болып отырғанын айтты. Себебі қырыққабат өнімі көрші Қырғыз елінен әкелінсе, қарақұмық Ресейден және Шығыс Қазақстан облысынан тасымалдануда.
Жалпы, жергілікті тұрғындар Тараз қаласындағы бірқатар әлеуметтік дүкендегі қызмет пен азық-түлік бағасының талапқа сай емес екенін айтады. Осы күнге дейін Әулиеата өңірінде талай әлеуметтік дүкендер ашылғанымен, баға байлауға көнбей тұр. Әу баста жұртшылықтың жағдайына оңтайлы нысан ретінде ашылған дүкендер бұл күнде бағытынан жаңылған. Әкім баға тұрақтылығын қадағалау керегін айтып, тиісті басшыларға тапсырма бергенімен, баға тұрақтылығы мәселе күйінде қалуда. Мәселен, №13 шағын аудандағы әлеуметтік дүкенде тауық және сиыр еті жоқ. Ал жаңа салынған №15 шағын аудандағы әлеуметтік дүкенде сәбіз бағасы 120 теңгеден 180 теңгеге және тұз бағасы 50 теңгеден 80 теңгеге дейін өскен. Қант, картоп туралы да осылай айтуға болады. Сонымен қатар облыс орталығындағы Абай даңғылы мен №5 шағын аудандағы әлеуметтік дүкендерде айран, сүт және макарон өнімдерінің тапшылығы байқалуда. Бұл мәселе бойынша облыстық кәсіпкерлік және индустриалды дамыту басқармасының басшысы Аспандияр Сейсебаев қаладағы дүкен иелерімен жиын өткізілгенін, негізгі тауар түрлерінің көпшілікке барынша қолайлы бағада сатылуы керектігі туралы келісім жүргенін жеткізді. Бірақ басшылар солай дегенімен, тауар бағасын түсіріп жатқан кәсіпкер жоқ.
Ал басшылардың айтуынша, бүгінде өңірдегі бөлшек сауда орындарында азық-түліктің 15 күнге жеткілікті қоры қалыптасқан. Аймақтағы ірі көтерме сауда субъектілерінде бір-екі айға дейін жеткілікті тауарлар көлемі жинақталған.
«Көкөністердің маусымаралық, яғни қаңтар-наурыз айларына арналған кезеңге жинақталған 201 мың тонна қоры бар. Оның ішінде пияз және сәбіз ішкі сұранысты толық қамтуға жеткілікті. Бұл ретте картоп және қырыққабат қорының тапшылығы байқалады», деді Е.Жиенқұлов.
Сондай-ақ өңірде қазіргі кезде қолданыста 236 қойма болса, онда 256 мың тоннаға дейін түрлі өнімдерді сақтауға болады. Қазір аталған қоймаларда 201 мың тонна өнім сақталуда. Оның ішінде 9,5 мың тонна картоп, 7 мың тонна сәбіз, 173 мың тонна пияз және 11,5 мың тонна өзге де өнім түрлері бар.
Су тапшылығын болдырмау маңызды
Биылғы ауа райының қолайсыздығы Жамбыл өңірінде ауыл шаруашылығы саласының жұмыстарына кедергі келтіруі мүмкін. Бұл ретте әуелі су мәселесі өзекті. Өңір су жөнінен көрші Қырғыз еліне тәуелді болғандықтан, мұнда да түрлі мәселелер туындап жатады. Жалпы, көктемгі егіске қажетті судың жағдайы мен су қоймаларына сақталған судың көлемі аса маңызды. Сол сияқты енді жерасты суларын тиімді пайдалану да болашақта жүзеге асуы тиіс жобаның бірі. Дегенмен биыл да су мәселесі жамбылдық жұртшылық үшін ауқымды мәселенің бірі болатын сияқты. Мәселен, «Қазсушар» республикалық мекемесі облыстық филиалының директоры Қазыбек Бедебаев қазіргі кезде Шу өзенінен 370 млн, Талас өзенінен 500 млн текше метр су өтіп жатқанын, бұл өткен жылғыдан едәуір төмен көрсеткіш екенін айтты. Ал «Тасөткел» су қоймасында 332 млн текше метр ғана су жиналған. Яғни облысқа қажетті су қоры жиналмаған деген сөз. Сондай-ақ биыл қардың қалың түспеуінің салдары тағы бар. Сонымен қатар өңірде облыс әкімі тарапынан аудан әкімдері мен суға жауапты мамандарға берілген тапсырмалардың орындалуы өте нашар болып тұр. Бердібек Сапарбаев тиісті басшыларды талай сын тезіне алғанымен, әлі де нәтиже болмай келеді. Айталық, облыста 700-ден астам канал-тоғандар болса, қазір оларды тазалау жұмыстары да көңіл көншітпейді. Жамбыл ауданында былтыр салынып бітуі тиіс көпір уақтылы аяқталмаған. Басшылар ең басты деген мәселенің өзіне енжар қарап отыр.
Аймақ басшылығының алдында «Тасөткел» су қоймасына 500, ал «Ақкөл» су қоймасына 100 млн текше метр су жинап алу міндеті тұр. Сондай-ақ жерасты суларын тиімді пайдалану, ұңғымалар қазу жұмыстары да бар. Сондықтан да су қоймаларына қажетті ылғал қорын қазірден бастап жинау мәселесі өзекті. Биыл да жауын-шашын мен қар аз түскендіктен, өңірде су тапшылығы ерекше сезілетін түрі бар. Яғни жауапты мамандар осы бастан су мәселесіне салғырт қарамай, мәселелерді шешуге күш салғаны дұрыс.
Жамбыл облысы
