![Жаңа Қазақстанның басты принципі әділеттілік болуға тиіс](/media/2022/02/06/g6g4bffwhk6qxwrmz-1.jpg)
– Бірінші сауалымызды «Жаңа Қазақстан қандай болуы керек?» деген жалпылама сұрақтан бастасақ.
Лаура Қарабасова:
– Білім саласына қатысты айтатын болсам, біріншіден, академиялық адалдық қағидаттары басты құндылыққа айналуы керек. Профессор Дүйшөн Шаматов «академиялық адалдық дегеніміз ешкім қарап, бақылап тұрмаса да, дұрыс істер жасау», деген еді. Сондықтан жаңа Қазақстанда әр басшы, әр маман, әр адам өз ісіне адал болуы керек. Сонымен бірге кез келген салада Президент айтқан меритократия принциптері, яғни әділдік қағидаттары сақталғаны өте маңызды. Екіншіден, шешім қабылдау және қоғамдық пікір қалыптастыру процестерінде ғалымдар мен сарапшылар пікірі, ғылыми зерттеу нәтижелері көбірек қолданылса деймін. Ол үшін ғылыми әлеуетті көтеру және сарапшыларымызға конструктивті пікір білдіру платформаларын ұсыну маңызды.
Азаматтарымыздың сыни ойлау қабілетін қалыптастыру мәселесін ерекше атап өту керек. Себебі төтенше жағдай кезінде жалған ақпарат көбейіп, инфодемия орын алса, қоғамда алауыздық пайда болып, ахуал қиындайды. Сол себепті мектеп қабырғасынан бастап сыни тұрғыдан ойлау, талдау және бірнеше ақпарат көзінен алынған мәліметтерді қорытып, практикалық қажеттілікке қолдану дағдыларын дамыту қажет. Батыс елдерінде оқушылар ақпаратты, мәтінді түсініп, талдауға ертеден машықтанады.
Серік Бейсембаев:
– Жаңа Қазақстанда авторитарлық саяси жүйе емес, демократиялық саяси жүйе басымдық алуы қажет. Мен үшін бұл – жаңа Қазақстандағы ең маңызды көрсеткіш һәм фактор. Тарқатып айтсақ, билік уақтылы ауысып, әділ сайлау өткізілуге тиіс. Бұл біріншіден. Екіншіден, заң үстемдігі шын мәнісінде орнауы қажет. Яғни адамның дәрежесіне, лауазымына қарамастан, заң талаптары бәріне бірдей болуы керек.
Елдегі сөз бостандығы мен митинг өткізу еркіндігі де маңызды. Сондай-ақ қоғамдық ұйымдардың жұмысына шектеудің азайғаны жөн. Жалпы, мемлекеттік емес ұйымдардан бөлек, жалпы қоғамдық бірлестіктерге қатысты заңды түрде шектеулер өте көп. Солар қайта қаралып, азаматтық қоғамның дамуына мүмкіндіктің берілуі де өзекті фактор. Саяси партияларға да қатысты түрлі шектеуді алып тастауымыз керек. Меніңше, жаңа Қазақстанның ең басты алғышарттары осылар.
Жасұлан Кушебаев:
– Жаңа Қазақстанға жаңа экономикалық саясат қажет. Оның ішінде өндіруге, өнеркәсіпке басымдық берген жөн. Бірінші кезекте күнделікті тұтынатын тауарлар өндіруді қолға алу керек. Статистикаға сүйенсек, халықтың табысының 70 пайызы күнделікті тұтынатын тауарларға жұмсалады. Өкінішке қарай, Қазақстанда осындай өнімдердің басым бөлігі импорттық тауарлар. Сәйкесінше, табысымыздың қомақты бөлігі шетелге кетіп жатыр. Осылайша, елдегі экономикада ақша айналымы азаяды. Мұндай тығырықтан шығатын жалғыз жол – өндіруге басымдық беру. Азық-түлікке, ауыл шаруашылығына, жеңіл өнеркәсіп, киім өнеркәсібіне көңіл бөлу керек. Егер күнделікті тұтынатын тауарларымыздың бәрін өзіміз шығарсақ, қаржыны елде сақтап қаламыз. Тиісінше, халықтың тұрмысы да жақсарады, мемлекеттік қазына да ортаймайды.
Исатай Минуаров:
– Кедейлікпен, әлеуметтік теңсіздікпен күрес және басқа да өте маңызды мәселелерден бөлек, Қазақстан білім саласына да үлкен назар аударуы керек. Білім саласына құйылған инвестиция қоғамды әлеуметтік апаттардан сақтап, дамуға жетелейді. Инвестицияны тиімді пайдалану да өте маңызды. Әрине, білім беру саласында Қазақстан өзге елдер қызыға қарайтындай табыстарға жетті. «Болашақ» бағдарламасы – ерекше айтуға тұрарлық үлкен жоба.
Жалпы, білім беру саласы бюджеттік шығыстардың ең басты басымдығы болуы қажет. Мемлекеттік бюджеттің білім саласына жұмсалатын үлесі елдегі ішкі жалпы өнімнің 4,5 пайызын құрайды. Бұл көрсеткіш Экономикалық ынтымақтастық және даму ұйымына кіретін елдердің көрсеткішімен теңесіп қалды. 2025 жылға қарай білім саласын қаржыландыру ішкі жалпы өнімнің 7 пайызын құрамақ. Бұл – дұрыс қадам.
Қаржыландыруды көбейту «көп ақша бере салу» қағидасымен жүзеге аспауға тиіс. Қаржы үш ауысымда оқитын және апаттық жағдайдағы мектептер проблемасын, материалдық жабдықтау мәселесін шешіп, мұғалім мамандығының беделін арттыруға жұмсалуы қажет. Білім сапасы тек материалдық инфрақұрылымға және мұғалімдердің жалақысына ғана байланысты емес. Сонымен қатар білім беру сапасы оқыту процесін ұйымдастыру мен технологиясына және педагогтердің біліктілік деңгейіне де қатысты.
Оқушыларға жүктелген салмақты азайту, оны неғұрлым кәсіпке негізделген пәндерді енгізу, кәсіби бағдарлау курстарын ашу – осы бастамалардың алғышарты. Керек емес пәндерді алып тастау да маңызды. Мектепте оқушыларға өздерінің әлеуетін анықтауға және оны дамытуға бағытталған бағдарлама әзірленуі қажет. Әрине, білім саласы орта біліммен шектеліп қалмайды. Қазақстандық білім жүйесіне қағаз жүзінде емес, іс жүзінде реформа жасалса, алдағы уақытта бәсекеге қабілетті азаматтар саны одан әрі көбейе түсетіні сөзсіз.
– Президент 11 қаңтарда Мәжілісте сөйлеген сөзінде реформа жасау қажеттігін айтты. Осы орайда біздегі білім жүйесін қалай өзгерткен дұрыс?
Лаура Қарабасова:
– Білім саласында соңғы үш жылда жүйелі өзгерістер жүзеге асырылып келеді. Университеттерге академиялық және қаржылық автономияның берілуін, корпоративтік басқару жүйесінің енгізілуін, шешім қабылдау процестерінің алқалық принциптерге бағытталуын, ғылымды қаржыландыру тетіктерінің жетілдірілуін, жас ғалымдарға арналған бағдарламаларды және оқытушылар жалақысының көтерілуін атап өтер едім. Әрине, білім саласындағы трансформациялар уақытты және мол ресурстарды талап етеді. Ең бастысы, өзгерістер тұрақты және жүйелі болуы керек. Одан бөлек, кез келген реформаның нәтижесі оны жүзеге асыратын кадрлардың біліктілігіне тәуелді. Сол себепті егер басшылар мен оқытушылардың жиі тағылымдамадан өтіп, кәсіби біліктілігін арттыруына мүмкіндік берілсе, оң өзгерістерге мүдделілер қатары көбейер еді.
Жылдан-жылға ғалым-профессорлардың мәртебесі өсіп, жағдайы жақсаруы керек деп есептеймін. Мемлекет басшысы жоғары білімнің қолжетімділігін және түлектердің еңбек нарығындағы мүмкіндіктерін арттыру жөнінде өте орынды айтты. Сондықтан алдымызда жоғары оқу орындарына әлеуметтік қорғалмаған санаттағы жастарға көбірек жеңілдіктер мен гранттар қарастыру және білім беру бағдарламаларының мазмұнын жаңарту арқылы еңбек нарығымен байланысты күшейту міндеттері тұр.
– Мемлекет басшысы Үкіметке техникалық мамандықтарға басымдық беруді тапсырды. «Болашақ» стипендиясының да бағытын өзгертуді ұсынды. Сіздіңше, қай елдің білім саласына қарап бет түзеген дұрыс? Нақты қандай мамандар елімізде жетіспейді?
Лаура Қарабасова:
– Жалпы, ғылыми-техникалық жетістіктері бар, индустриямен байланысы мықты және әлемдік инновациялық дамуға жол ашып, серпіліс жасап отырған университеттерде техникалық бағытта сапалы білім алуға еліміз жағдай жасап отыр. Жастар осы мүмкіндіктерді ұтымды пайдаланғаны жөн. Бұл ретте «Болашақ» бағдарламасы бойынша жаңа оқу орындарының тізімге қосылуы мүмкіндіктерді кеңейтеді. Ал сапа талаптары жоғары шетелдік университет филиалдарын ашу, түрлі серіктестік модельдерін енгізу – ішкі әлеуетімізді дамытуда аса маңызды әрі ұзақ мерзімде тиімділігін көрсететін қадам.
Мамандардың жетіспеуін анықтау үшін нақты зерттеу-сараптау жұмыстары жүзеге асырылуы керек. Кәсіпорындар жаңа форматтағы мамандарды қабылдауға және олардың интеллектуалдық және материалдық сұраныстарын қанағаттандыруға қаншалықты дайын? Мамандарды даярлаумен қатар, қазақстандық еңбек нарығы да әлемдік стандарттарға сай бой түзеп, жоғары оқу орындарына нақты тапсырыс беріп, қолдап отырса, бұл бәсекеге қабілетті маманды ғана даярлап қана қоймай, бәсекеге қабілетті жаңа Қазақстанды құрудың басты алғышарттарының пайда болуына жол ашады.
– Президент өз сөзінде алдағы қыркүйекте саяси реформалар пакетін жариялайтынын айтты. Осы орайда, елімізде саяси реформа бағыты қандай болу қажет деп есептейсіз?
Серік Бейсембаев:
– Саяси реформалар пакетін қыркүйекке ысырып қоймай, қазірден бастап оны жүзеге асыруға кірісу керек. Себебі күзге дейін жарты жыл уақыт бар. Осы аралықта экономикалық, әлеуметтік дағдарыс одан әрі ушығып кетуі мүмкін. Қаңтар оқиғасының шындығы толыққанды айтылмауына байланысты, тағы бір қоғамдық дүрбелең орын алып, қайғылы жағдай қайталануы мүмкін.
Осы орайда, саяси реформалар пакетін жасақтау қалай жүреді деген сауал туады. Бұл процесс қаншалықты ашық болады? Мұның бәрі басы ашық мәселе. Бұған дейін елімізде бүкіл шешім бір адамның еркі, соның түсінігі бойынша қабылданып, сол бойынша жүргізілді. Келешекте бұл жағдай қайталанбауға тиіс. Мемлекетке қатысты маңызды мәселелер президенттің шешімі негізінде емес, кең қоғамдық талқылау, қоғамдық ұйымдардың араласуы арқылы жүзеге асуы қажет. Сондықтан балама көзқарасты ескеріп, оларды пікірталасқа қатыстыру арқылы саяси реформалар пакеті жасақталуы керек.
Бұған дейін сөз бостандығына, бейбіт шерулерге қатысты заңдарды өзгерткенімен, жағдай түзеліп кеткені шамалы. Жергілікті билік әлі күнге дейін саяси митинг өткізуге рұқсат бермей келеді. Алдағы уақытта бейбіт шерулер туралы заңды тағы да қайта қарап, оған халықаралық ұйымдар, құқық қорғау саласындағы мамандардың ұсыныстары негізінде түзету енгізу керек.
Саяси реформалар пакетінің ішіндегі ең маңызды тармақ сайлау туралы болуы тиіс. Соның ішінде ірі қалалардың әкімдерін сайлауды бастау керек. Мәселен, Алматы қаласының әкімі ауысуына қатысты қоғамда қызу пікірталас жүруде. Тұрғындар әкімді электораттардың сайлауына мүмкіндік беруді сұрап отыр. Негізі бұл 10-15 жыл бұрын жүзеге асуы керек еді. Қазір бұл уақыты жеткен, пісіп тұрған мәселе. Оны қабылдамай кері шегере берсек, саяси тұрақсыздықтың факторына айналады.
– Қазір қоғамдағы ара-жіктің, яғни табыстың әділ бөлінбеуі жиі айтылады. Мысалы, ел байлығының жартысы 162 адамның қолында екен. Жаңа Қазақстанда экономикалық әділеттілікті қалай орнатамыз?
Жасұлан Кушебаев:
– Ең бірінші, экономикалық индикаторларды есептеу механизмін өзгерту керек. Мәселен, орташа жалақыны есептеуді алайық. Қазіргі таңда алынатын орташа жалақы мөлшері шынайы емес. Есептеу механизмі әділетсіз, арифметикалық үлгіде есептеледі. Бұл біздегі әлеуметтік жағдайды нақты көрсетпейді. Яғни осыған салсақ, біреу миллион теңге, екінші біреу жүз мың теңге алса, орташа жалақы 550 мың теңге болып шығады. Ал әлемде, әсіресе дамыған елдерде медиандық әдісті қолданады. Экономикалық зерттеулер мұның шартараптың түкпір-түкпірінде жалпы халықтың орташа жалақысын нақты көрсететін инструмент ретінде мойындайды.
Қазақстанда дұрыс есептелмей жатқан, елдің әлеуметтік жағдайына теріс әсер ететін тағы бір мәселе – ең төменгі күнкөріс деңгейі. Бұл өте маңызды индикаторлардың бірі. Осы арқылы еліміздегі кедейшілік көлемін анықтауға болады. Стипендияларды, зейнетақыны, неше түрлі әлеуметтік төлемдердің бағасын нақты белгілейміз. Ең төменгі күнкөріс деңгейін есептеу тұтыну себетін есептеумен тікелей байланысты. Бір адамның бір айда өмір сүруіне қажетті азық-түлік тізімі тұтыну себетінде көрсетіледі. Қазақстанның тұтыну себетінде 43 түрлі азық-түлік өнімі тіркелген. Бұл азық-түлік өнімдерінің бағасы – ең төменгі күнкөріс деңгейінің 55 пайызы, ал қалған 45 пайызына азық-түлік емес өнімдер мен қызметтер кіреді. Жалпы, еліміздің тұтыну себеті мамандар тарапынан үлкен сынға ұшырап келеді. Өйткені онда көрсетілген азық-түлік өнімінің мөлшері бір адамның бір айлық өміріне жетпейтіні талай мәрте айтылды. Дамыған мемлекеттердің тұтыну себеттерін талдайтын болсақ, ол елдердің себетінде көрсетілген өнімдер саны 300-ден асып кетеді. Мысалы, Ұлыбританияның тұтыну себетінде 350 өнім болса, АҚШ-та ол көрсеткіш 300 өнім. Бұл факті еліміздің тұтыну себеті Батыс елдердің себеттерінен әлдеқайда жұтаң екенін көрсетеді. Жалпы, әлемдік тәжірибе көрсеткендей, ең тиімді нұсқа тұтыну себетін – медиандық жалақымен байлау. Соған сәйкес ең төменгі күнкөріс деңгейі медиандық жалақының жартысына теңестіріледі.
Егер жаңа Қазақстанда экономикалық индикаторларды осылай өзгертсек, елдегі шынайы картина айқындалады. Қанша кедей адам бар? Халықтың нақты табысы қандай? Осы сұрақтарға нақты жауап алғанда ғана экономиканы жандандыратын, тұрғындардың әл-ауқатын арттыратын реформалар жасауға мүмкіндік туады.
– Қаңтардағы шерулер кезіндегі тәртіпсіздік оңтүстік өңірлерде, әсіресе Алматы қаласында өрбуінің себебі неде?
Исатай Минуаров:
– Тәртіпсіздіктердің Алматы қаласында болуы нені көрсетеді? Қазақстанның ең ірі қаласы және қаржы хабы болғанымен, Алматы – әлеуметтік теңсіздік өршіген, бай мен кедейдің алшақтығы тым ұлғайып кеткен қала. Шеруге қатысқан азаматтардың демографиялық портреті мынандай. Қозғаушы күш – 20-40 жастағы ер кісілер, қазақтар. Сонымен қатар олар жастар және елдің саяси өміріне қатысқысы келетін белсенді әлеуметтік топтар, яғни азаматтар. Олар елдегі процестерге қатысқысы келеді және едәуір бөлігі елдегі жағдайға қанағаттанбаған. Өңірлер бойынша қарайтын болсақ, наразылық толқыны 2019 жылы «протестік дауыстар жинаған» өңірлерде өршіген. Одан кейінгі екі жылда наразылық толқыны басылған жоқ. Олардың қатарында белсенділердің, көпбалалы аналардың, кәсіби қауымдастықтардың, мұнайшылардың наразылық акциялары бар. Әлеуметтік-экономикалық жағдайдың әсерімен және билікке көңіл толмаудың салдарынан наразылық толқыны күшейіп, 2022 жылы ол өзінің апогейіне жетті.
Жұмыссыздық мәселесінің күшеюі және өршуі елдің әлеуметтік және саяси тұрақтылығына қаншалықты әсер ететіні бәріне белгілі. Жұмыссыз азаматтардың басым бөлігі әлеуметтік қолдау бағдарламаларына қатыспайды және мемлекетпен «байланысын үзген». 2017 жылы, әлеуметтік медициналық сақтандыру енгізілмей жатып, Еңбек және әлеуметтік қорғау министрлігі жергілікті әкімдіктермен бірге арнайы талдау жүргізген еді. Талдау нәтижесінде 1,2 млн адамның бейресми түрде жұмыспен қамтылғаны және 1,5 млн адамның өзін өзі жұмыспен қамтып отырғаны және жұмыссыз екені анықталған. Осы санаттағы азаматтарды жұмыспен қамту жоспарланды. Ол мақсатта «Еңбек» мемлекеттік бағдарламасы қабылданған еді. Жыл сайын бұл бағдарламаны жүзеге асыру үшін 73 млрд теңге қаражат жұмсалады. Алайда оның тетіктері мен ауқымы бос жүрген тұрғындарды жұмыспен қамтуға шамасы жетпегенін көріп отырмыз. Жалпақ тілмен айтсақ, жастарға қатысты бағдарламалардың қажеттігіне, оның пайдалы екендігіне күмән келтіруге болмайды. Бірақ оларды жүзеге асыру күткен нәтижені көрсете алмай жүр.
– Қаңтардағы қаралы оқиғадан кейін әлеуметтік желілерде NEET жастар туралы жиі айтыла бастады. Осындай жастардың әлеуметтік белсенділігін арттыру үшін қандай шаралар атқарған жөн?
Исатай Минуаров:
– Елдегі NEET үлесінің жоғары болуының қаупі қандай? Жастардың үздіксіз түрде тұрақты жұмыс іздеуі оларды кедейлікке және әл-ауқатының едәуір төмендеуіне әкелуі мүмкін. Сәйкесінше, өмір сапасы нашарлайды. Сонымен қатар қылмысқа бейім болуы мүмкін. Қоғамның бұл сегментінің әдетте елдің қоғамдық-саяси институттарына және Үкіметке сенімі өте төмен келеді.
NEET санатындағы жастардың үлесінің өсуі ұзақмерзімді әлеуметтік проблемаға айналуы мүмкін. Халықаралық Еңбек ұйымының мәліметіне сәйкес NEET санатына кіретін жастардың үлесі ең төмен елдер қатарында Жапония (3,0%), Нидерланд (3,1%), Сингапур (4,5%), Германия (5,4%), Швейцария (6,0%) бар. Ең жоғарғы көрсеткіш Йеменде (44,8%), Иракта (44,6%) және Ауғанстанда (41,8%) тіркелген.
Қазақстанда NEET санатына кіретін жастардың диапазоны 15-28 жас аралығын қамтиды. 2019 жылы олардың үлесі 7,4 пайызды немесе 250 мыңнан астам адамды құраған. Әлемдік тәжірибе көрсеткендей, NEET санатына кіретін жастардың саны аз елдер екі негізгі бағытқа басымдық береді. Бірінші, мектепке дейінгі білім беру саласына инвестиция құяды. Екінші, жастар арасындағы әлеуметтік-экономикалық проблемаларды шешуге бағытталған және ғылыми әдіске негізделген бағдарламалар жасайды. Сондықтан Қазақстан да аталған санатқа енетін жастар санын азайту үшін осы әдіске жүгінуі маңызды. Себебі бірінші бағыт превентивті тетік, яғни алдын алу, профилактика үшін жасалынатын шара. Оның тиімділігі бірден білінбесе де, ұзақмерзімді перспективада әсері байқалады. Мектепке дейінгі білім беру саласына инвестиция құюдың оң әсері бірқатар ғылыми зерттеумен дәлелденген.
Екінші бағыт – проблемаларды шешу және NEET үлесін төмен деңгейде ұстап қалу шаралары. Осы орайда Жапония, Люксембург, Норвегия сияқты елдердің тиімді тәжірибесін енгізе аламыз. Бұл елдерде жастардың бұл санатта неге тап болғаны ғылыми әдістерді пайдалану арқылы анықталған. Соның нәтижесінде жекелей бағдарламалар жасалып, шаралар қолданылған. Жапонияда «жұмсақ қабілеттерге» (soft skills), әлеуметтенуге, өзін өзі дамыту бағдарламаларына ден қойылған.
Нидерландта мектепке дейінгі және орта білімге құйылған инвестицияның нәтижесі сәтті болды. Статистика бойынша елдегі үш балдырғанның екеуі мектепке дейінгі мекемелерге барады. Сонымен қатар мемлекет жұмысбасты аналарға түрлі мүмкіндік береді. Мысалы, жұмыс істеу сағаттары қарастырылған. Жарты күн жұмыс істеп, қалған уақытын баласына бөлгісі келетін аналарға ортақ жүйе енгізілген.
Норвегия NEET санатын азайту мақсатында жастармен ғана емес, сонымен қатар жұмыс берушілермен де тікелей келіссөз жүргізеді. Бұндай кешенді шаралар Норвегия билігіне еңбек нарығын реттеуге және жастарға қолайлы жағдай жасауға мүмкіндік береді. Қазақстан халықаралық тәжірибені ескеріп, сәтті кейстерді қолданса, жақсы нәтиже болары сөзсіз.
– Азаматтардың белсенділігін арттырып, қоғамдық бақылауды күшейту үшін қандай шаралар атқарылғаны дұрыс?
Серік Бейсембаев:
– Бізде азаматтық белсенділік артқан. Оны мемлекет арнайы заңмен, шешіммен, қаулымен күшейте алмайды. Бұл – өздігінен жүріп жатқан процесс. Ең бастысы, билік бұған кедергі келтірмеу керек. Мұның ішінде қазіргі таңда қандай заңдар, қандай қаулылар азаматтық белсенділікке кедергі болып жатқанын арнайы қарау керек. Екі мысал келтірейін.
Біріншісі, тәуелсіз бақылаушылар жұмысына қатысты былтыр шектеулер енгізілді. Мәселен, сайлауда бақылаушы болу үшін белгілі бір ұйым атынан тіркелу қажет. Қоғамдық тәуелсіз бақылауды жүзеге асыру үшін бұрынғыға қарағанда қиындай түсті.
Заң аясында қарастырылған екінші шектеу – сайлау кезіндегі экзит-пол жүргізуге байланысты. Сайлау өтіп жатқанда сауалнама жасау үшін міндетті түрде сайлау комиссиясының атына өтініш жазу керек. Сосын мақұлдаған жауабынан кейін олардың рұқсатымен ғана сауалнама жүргізе алады. Бұл – абсурд нәрсе. Мұндай шектеу біздің елде және санаулы дамымаған елде ғана бар шығар.
Батыста кез келген жекеменшік ұйым өзінің қаражатына сауалнаманы жүргізе береді. Ал бізде дәл сайлау тақырыбына келгенде ғана осындай шектеуді енгізіп қойған. Бұл – бақылауды, ақпаратты бақылауды, саясатқа қатысты ақпараттық монополияны қамтамасыз ету үшін жасалған қадам. Бұл халықаралық нормаларға қайшы. Заңның осы тұсын өзгертсек, Президент айтқан жаңа Қазақстан құруға арналған үлкен қадамды көре алатын едік.
Дөңгелек үстелді жүргізгендер
Абай АСАНКЕЛДІҰЛЫ,
Меруерт БҮРКІТБАЙ,
Светлана ҒАЛЫМЖАНҚЫЗЫ,
«Egemen Qazaqstan»