Конференцияға биыл 35 ел мен үкімет басшылары, жүзге жуық министр, халықаралық ұйымдардың басшылары қатысты. Олардың қатарында БҰҰ, НАТО, Еуропалық одақ басшылары да бар. Биылғы конференцияның күн тәртібіндегі басты тақырып – Украина мәселесі болды. Одан бөлек «Бавария сарайында» Ресей мен Еуропа мәселесі де талқыланды. Сарапшылар қырғиқабақ соғыс аяқталғаннан бері мұндай форумдар үлкен маңызға ие болды деген пікір айтады. Сондықтан бұл Батыстық форум көптің назарын аударды.
14 жыл бойы «Мюнхен қауіпсіздік конференциясының» төрағасы болып келген Вольфганг Ишингер конференция төрағалығын Ангела Меркельдің бұрынғы кеңесшісі Кристоф Хойсгенге табыстайтыны мәлім болды.
Алайда бұл конференцияда төраға өз пікірін жасырмай ашық айтып, бірқатар елдің басшыларына өз пікірін жеткізді. Бәрінен бұрын конференцияға қатысудан бас тартқан Ресей тарапын сынға алды. Бұған дейін Вольфганг Ишингер Ресей президенті Владимир Путин Мюнхенге шақырудан бас тартқанын, алайда онлайн режімде қатысатынын айтқанын жеткізген-ді. 2021 жылы конференция онлайн режімде өткізілді. Биыл төраға «омикрон» штамының таралуына қарамастан, бұрынғы форматқа оралуды ұсынып, саясаткерлер мен сарапшыларды Мюнхенге шақырды. Төраға саясаткерлер қауіпсіздік мәселесін жеке кездесулерде де талқылай алуы керек деп түсіндірді.
Дәстүрлі түрде Bayerischer Hof қонақүйінде өткізілетін жиында санитарлық шаралар қатаң бақылауда болды. Пандемияға дейін жиынға 2 000-нан астам адам қатыса алса, биыл тек 600 делегат шақырту алды. Ұйымдастырушылар қатысушы санын тағы да азайтуға ниетті болған. Шараға қатысушылардың барлығы коронавирусқа қатысты екпе салдыруы керек. Сонымен қатар күн сайын ПТР-тест тапсырып, вирус жұқтырғанын не жұқтырмағанын тексеріп тұруға міндетті.
НАТО бас хатшысы Йенс Столтенберг Ресей сыртқы істер министрі Сергей Лавровқа Украинамен шиеленісті шешу мақсатында диалогті кеңейту ұсынысын білдіргенін ортаға салды. АҚШ вице-президенті Камала Харрис Ресей Украинаға басып кірген жағдайда экономикалық санкциялар жариялайтынын ескертті.
Жиынды қорытындылаған Вольфганг Ишингер Ресейдің қатыспағаны жағдайды қиындата түскенін тағы бір ескертіп, «Мюнхен қауіпсіздік конференциясы» негізінен адамзатқа қауіп төндіретін жаһандық жылыну, климаттың өзгеруі, пандемиямен күрес сияқты мәселелерді талқылау керектігін, алайда күрмеуі шешілмей тұрған Ресей-Украина мәселесі биылғы жиынның негізгі тақырыбына айналғанын айтып өтті.
Жиыннан кейін жарияланған 2022 жылғы Мюнхен қауіпсіздік баяндамасында Батыс елдерінде «топтық әлсіздік» бары атап өтілген. Бұл COVID-19 пандемиясы, климаттың өзгеруі, геосаяси мәселелер салдарынан туындап отырса керек. Вольфганг Ишингер жиынның ашылуында әлем елдерінде бұл мәселені шешуге қажетті барлық тәсіл мен құрал болса да әлсіздік мәселесі белең алғанын атап өтті. Оның айтуынша, кейбір жағдайлар елдердің қол қусырып қарап отыруға да мәжбүр еткен.
Халықаралық басқосуға АҚШ вице-президенті Камала Харрис, АҚШ мемлекеттік хатшысы Энтони Блинкен, ГФР канцлері Олаф Шольц, ГФР Сыртқы істер министрі Анналена Бербок, ГФР Қорғаныс министрі Кристина Ламбрехт, Ұлыбритания премьер-министрі Борис Джонсон, Польшаның Үкімет басшысы Матеуш Моравецкий қатысты. Сондай-ақ жиынға Еуропа одағынан үш көшбасшы Шарль Мишель, Урсула фон дер Ляйен, Жозеп Боррель келді. БҰҰ Бас хатшысы Антониу Гутерриш те, НАТО Бас хатшысы Йенс Столтенберг те, Иран Сыртқы істер министрі Хоссейн Амир Абдоллахиан да жиында бой көрсетті.
