Аталған жұп Қазақстан чемпионатында үш мәрте топ жарғанымен, халықаралық аренада ауыз толтырып айтарлықтай табыстарға қол жеткізе алған жоқ. 2018 жылы Гауһар Наурызова мен Бойсангур Датиев Софияда өткен жастар арасындағы әлем біріншілігіне қатысып, 27-орынды қанағат тұтты. 2017 жылы Братислава Гран-Приінде бесінші және 2019 жылы Christmas Cup турнирінде төртінші сатыға табан тіреді. Ересектер дуына қосылғаннан кейін Будапешт пен Алматыда ұйымдастырылған екі бірдей халықаралық жарыста үздік сегіздіктің санатынан көрінді. Міне, жерлестеріміздің барлық табысы осы ғана. Ал Монпельеде кілең мықтылардың жиналғанын ескерсек, дуалы ауыз мамандар олардың үздіктер қатарына қосыла алмайтынын алдын ала жорамалдаған еді. Айтқандай-ақ, қысқа бағдарламада қорытындысы бойынша Гауһар мен Бойсангур соңғы орында қалып қойып, жарыстың финалдық бөлігіне шыға алмады.
Ерлер арасындағы бас жүлде үшін тартыс жапон жігіттері арасында өрбіді. Қысқа бағдарламада алғашқы үш орынды да солар иеленді. Үш дүркін Олимпия ойындарының және екі дүркін әлем чемпионатының күміс жүлдегері Сема Уно көш бастаса, Токио Олимпиадасының вице-чемпионы Юма Кагияма екінші сатыға жайғасты. Үшінші орынға бұған дейін көпшіліктің көзіне түспеген Томоно Кадзуки табан тіреді. Еркін бағдарламада алғашқы екеуі өз орындарын сақтап қалды. Нәтижесінде, 312,48 ұпай жиған Уно бас жүлдені олжаласа, 297,60 ұпайды еншілеген Кагияма күміске қол созды. Ал Кадзукиді жылы орнынан ысырған америкалық Винсент Чжоу осыдан үш жыл бұрынғы Сайтамадағы көрсеткішін қайталап, қола медальды иеленді. Оның еншісінде – 277,30 ұпай.
Әйелдер бәсекесінің бас жүлдесі де Жапонияның мәнерлеп сырғанаушыларына бұйырды. 21 жастағы Бейжің Олимпиадасының қола жүлдегері Каори Сакомото 236,09 ұпаймен алтыннан алқа тақты. Күміс медальды Луна Хендрикс мойнына ілді. Әзірге бұл – 22 жастағы бельгиялық бұрымдының спорттық мансабындағы ең зор табысы. Ол 217,70 ұпай жинады. Қола медальды Алиса Лю еншіледі. 16 жастағы америкалық бойжеткен 211,19 ұпайды қоржынға салды.
Спорттық жұптардың сайысында Алекса Книрим мен Брэндон Фрейзер алдарына жан салмады. Командалық бәсекеде Олимпия ойындарында екі мәрте жүлде алып, 2015 жылғы әлем чемпионы және 2021 жылғы дүниежүзілік доданың күміс жүлдегері деген атағы бар америкалық спортшылар бұл жолы ешкімге дес бермеді. Жапониялық Рику Миура мен Рюити Кихара күміспен күптелсе, канадалық Ванесса Джеймс пен Эрик Рэдфорд қолаға қол созды.
Естеріңізге сала кетейік, басты фавориттердің бірі әрі бірегейі саналған Ресей құрамасы Украинадағы жағдайға байланысты Монпельедегі жарыстан шеттетілді. Дәл сондай жаза Беларусь командасына да қолданылды.
