Аймақтар • 01 Сәуір, 2022

Алматы облысы қалай бөлінеді

Алматы облысының әкімі Қанат Бозымбаев облыс қалай бөлінетінін түсіндірді, деп хабарлайды Egemen.kz

Бүгін Талдықорғанда Алматы облыстық мәслихатының кезектен тыс XVI сессиясы өтті. Облыстық мәслихат хатшысы Жанболат Жоргенбаевтың төрағалығымен өткен отырыстың күн тәртібіне төрт мәселе қаралған. Оның ішінде бүгінде өзекті болып отырған мәселе - Жетісу облысын құру арқылы Алматы облысын бөлу. Осы мәселе бойынша облыс әкімі Қанат Бозымбаев депутаттар алдында сөз сөйледі.

«Алматы облысының орталығы Қонаев қаласы және Жетісу облысының орталығы Талдықорған қаласы болып бөлінуі екі өңір дамуына серпін береді. Құрылайын деп жатқан Жетісу облысының аймағына 8 аудан, 2 қала мен 352 ауылдық округ кіреді, ал Алматы облысының құрамына 9 аудан, 1 қала мен 380 елді мекен қарайды. Біз Президенттің әкімшілік-аумақтық құрылым туралы жарлығын қабылдау жөніндегі іс-қимыл алгоритмін дайындадық», деді облыс әкімі.

Бозымбаевтың сөзінше, облысты бөлу жөніндегі жұмыс комиссиясы құрылды, оған облыстық басқармалар мен аумақтық органдардың тиісті басшылары кірді.

Еске салайық, 16 наурызда Қазақстан халқына жолдауында Алматы облысын екіге бөлуді ұсынған болатын.

«Алматы агломерациясына қатысты түйткілдер көп. Облыс тұрғындары негізінен қала төңірегіне шоғырланған. Ұзынағаштағы немесе Талғардағы мәселені сонау Талдықорғанда отырып шешу оңай емес. Облыс орталығына бару үшін халықтың алысқа сабылуына тура келеді. Осы және басқа да жайттарды ескере отырып, Алматы облысын екіге бөлуді ұсынамын.

Бұл өңірде Жетісу және Алматы облыстары құрылады. Алматы облысының орталығы Қапшағайда болуы керек. Ал, Жетісу облысының орталығы Талдықорғанда орналасады. Бұл қадамдар аймақтарды дамыту ісіне тың серпін береді деп санаймын», деген еді Президент.

Күннің маңызды және өзекті жаңалықтарын «Егемен Қазақстан» телеграм каналынан оқыңыз