Ақтөбелік NIS түлегі әлемнің үздік университеттерінен шақырту алу үшін арнайы тест тапсырмаларын тапсырды. SAT Reasoning емтиханында 1 430 ұпай жинаса, ағылшын тілінен IELTS тестінен орташа ұпайы 7.5-ке тең болды. Көп таңдаудың ішінде бір таңдау ретінде Гүлназ әзірге АҚШ-тың Калифорния штатының Кларемонт қаласында орналасқан Pitzer College-ді таңдады. Питцер колледжі – Калифорния штатының Кларемонт қаласында орналасқан бес оқу орнының бірі, осы оқу орындарының өзара байланысқан жүйесі бар. Мәселен, Кларемонт қаласындағы бес университеттің біріне қабылданған студент қаладағы төрт университеттегі қалаған дәрістерге қатыса алады. Питцер колледжі Гүлназға тегін оқумен қатар бірнеше әлеуметтік пакет ұсынды. Осы оқу орны студент тұратын үйдің ақысына, тамақтануы мен медициналық сақтандыру шығындарына жылына 85 мың доллар көлемінде грант ұсынған.
Жүйелі білім мен тыңғылықты дайындығының арқасында Гүлназ Аманжоловаға осындай кең мүмкіндік ашылды. Ол өз құрдастарына мамандық таңдау кезінде асықпауға, қолда бар барлық мүмкіндікті жан-жақты таразылап қана әрекет етуге кеңес береді. Оның арманы – әлемдік үздік оқу орындарында білімін шыңдап келіп, өз Отанының білімді мамандарының қатарын толықтыру.
Ақтөбе облысы
