Үй шаруасында, жұмыста, мемлекеттік қызметтерде де өздерін табыскер, еңбекқор ретінде көрсетіп келе жатқан іскер әйелдер 5 маусымда өтетін референдумға белсене атсалысып, азаматтық позициясын білдірмек. Ширек ғасырдан астам уақыттан кейін өткелі отырған саяси науқаннан тыс қалу келешекке қиянат жасағанмен тең санайтынын білдірген іскер әйелдер Ата Заңдағы елеулі өзгеріске де өз үлесін қоспақшы. Бұл жөнінде Түркістан қаласында Конституцияға енгізілетін өзгерістерді түсіндіру және референдумды қолдау мақсатында өткен облыс әкімдігінің қолдауымен, Қазақстанның іскер әйелдер қауымдастығы ұйымдастырған «Еңбегі жанған арулар» іскер әйелдер форумында айтылды.
Мемлекеттік мекемелер, Шымкент қаласы және Түркістан облысы бизнес-қауымдастығының өкілдері, облыстық және қалалық мәслихат депутаттары қатысқан форум ұлттық киімдер мен іскер әйелдердің фотокөрмесінен басталды. Жиында Қазақстан Іскер әйелдер қауымдастығының президенті, Президент жанындағы Әйелдер істері және отбасылық-демографиялық саясат жөніндегі ұлттық комиссия мүшесі Раушан Сәрсембаева форумның мақсаты жөнінде айтып өтті. «Қауымдастық 27 жыл ішінде әйелдерді жұмысқа орналастыруға және олардың білімін, әлеуметтік мәртебесін арттыруға, сондай-ақ саламатты өмір салтын насихаттауға және оларды кәсіпкерлік пен саяси қызметте ілгерілетуге бағытталған 100-ден астам жобаны іске асырды. Елімізде іскер қыз-келіншектер өз кәсібімен экономикамызға үлкен үлес қосып келеді. Форумның мақсаты да сол, жұмыс істейтін әйелдердің мәртебесін көтеру, оларды жұмыспен қамту және кәсіпкерлік саласын дамыту саясатын іске асыру секілді міндеттерді көздейді», деді Р.Сәрсембаева. Ал Түркістан облыстық іскер әйелдер қауымдастығының төрағасы Инара Намазбаева форум арқылы іскер ханымдардың жетістіктерін кейінгі жастарға үлгі ету, жас кәсіпкерлерге бағыт-бағдар беру маңызды екенін атап өтті. «Қыз-келіншектер өте белсенді. Олар да ойларын айтып, мемлекеттік маңызы бар істерге үлес қоса алады. Референдум әрбір іскер әйел үшін аса маңызды. Нәзік жандардың әл-ауқатының артуы тек отбасы үшін емес, тұтас қоғам үшін пайдалы», дейді форум делегаттары.
Форум аясында «Кәсіпкер әйелдердің Қазақстанның тұрақты дамуын қалыптастырудағы рөлі» мен «Қоғамды трансформациялаудағы азаматтық сектордың рөлі және референдумға байланысты», «Түркістан облысы және Шымкент қаласы дамуындағы іскер әйелдер қауымдастығының рөлі» тақырыптарында сессия отырыстары өтті. Іс-шара соңында іскер әйелдер Enbegi jangan arylar медалімен және алғысхатпен марапатталды.
Айта кетелік, форум қарсаңында Шымкент қаласының әкімі Мұрат Әйтенов Қазақстан Іскер әйелдер қауымдастығының төрағасы Р.Сәрсембаевамен кездесіп, шаһардағы әйелдердің көшбасшылығын дамыту мәселесін талқылады. Үшінші мегаполисте бұған дейін кәсіпкер әйелдердің басын біріктіретін «Іскер әйелдер қауымдастығының» филиалы жұмыс істеп келген. Ал жаңадан жұмысын бастаған альянс әйелдер мен балалардың құқықтары мен денсаулығы және әлеуметтік бағыттағы білімін жетілдіруді көздейді. Әйелдердің жағдайын жақсартуға арналған ұйым 2022-2023 жылдарға арналған жол картасын бекітіп, 10 бағыт бойынша жұмыс жүргізбек.
ТҮРКІСТАН