Кәсіпкерлер конституциялық өзгерістерді қолдайды

Еліміздің Ата Заңына түзету­лер­ді офлайн және онлайн режимде талқылауға 400-ге жуық адам жиналды: 17 өңірлік кеңестің өкіл­дері, кәсіпкерлер, сондай-ақ бас­қар­ма мүшелері, «Атамекен» ҰКП де­партаменттерінің директорлары, өңірлік палаталардың директорлары және олардың орынбасарлары қатысты.

Жиын барысында Қоғамдық кеңестің мүшелері, Нұр-Сұлтан қа­ла­сының қаржы және бюджет жөніндегі комиссиясының төрағасы Бауыржан Смайылов пен BI Group директорлар кеңесінің мүшесі Бауыржан Исабаев өз пікірлерімен бөлісті.

«Мемлекет басшысы өзінің Қа­­зақ­стан халқына Жолдауында елі­­міз­ді жаң­ғыртудың ауқымды бағ­­­дарламасын­ ұсынды. ­Ре­фе­рен­дум 2022 жылғы 5 маусымда өтеді. Осыған байланысты экономикалық және сая­си реформалар бағытында биз­несті дамытудың жаңа перс­пек­тиваларын талқылаудың кезі ­келді», деді «Атамекен» ҰКП бас­қарма төрағасының орынбасары Ербол Өстеміров.

Шақырылған сарапшылар жал­пы­халықтық дауыс беруге шы­ға­рылатын Конституцияға ен­гі­зі­летін негізгі өзгерістер тура­лы айтты. Жалпы түзетулер 12 не­гізгі блокты қарастырады. Бірін­ші блок Президенттің лауазы­мына байланысты шектеуге қатысты.

«Бірінші кезекте Прези­дент­тің жа­қын туыстары үшін квази­мем­ле­кеттік секторда саяси және бас­шы­лық қызметтерді атқаруға шек­теу қойылады. Сондай-ақ Мем­лекет басшысының өз өкілеттігін жү­зеге асыру кезеңінде саяси партияда болуына шектеу қойылды», деді Бауыржан Смайылов.

Сонымен қатар Президенттің өңір әкімдері актілерінің күшін жою және тоқтата тұру, аудан, об­лыстық және аудандық ма­ңы­зы бар қалалардың, ауылдық округ­тер­дің әкімдерін қызметтен босату құқығын алып тастау ұсынылды. Тағы бір түзету тұңғыш Президент мәртебесіне байланысты барлық норманы алып тастауды көздейді.

Алматы қаласы өңірлік кеңе­сі­нің төрағасы Максим Барышев өзгерістер елдегі бизнес ахуалды жақсартуға ықпал ететінін атап өтті. «Парламенттің рөлі мен мәр­те­бесіне қатысты маңызды өз­ге­­ріске назар аудартқым келеді. Мен бухгалтерлік есеп саласында кәсіпкерлікпен айналысамын. Біз салық заңнамасына енгізіліп жатқан өзгерістер ауқымын көріп отырмыз. 2020 жылдың өзінде 406 түзету жасалған. Парламент рөлін өз­гер­ту бойынша жоспарланған жа­ңа­шылдықта заң актілеріне көз­қа­рас басқа болып, сапа артып, заң­нама жиі өзгеріске ұшыра­май­ды деп ойлаймын», деді М.Барышев.

Маңызды ұсыныстардың бірі – Конс­титуциялық сот, Жоғарғы сот өкілдері мен судьялар, сондай-ақ басқа да судьялар, Ор­талық сайлау комиссиясы, Жо­ға­ры аудиторлық палатаның төрағасы мен мүшелеріне саяси партияларға, кәсіподақтарда мүше болу, қандай да бір партияны қолдап сөз сөйлеуге тыйым салу.

Ұсынылған өзгерістер отан­дық кәсіпкерлер арасында қызу қолдау тапты. Өңірлердің өкілдері ұсы­ныл­ған тәсілдердің өзек­тілігін атап өтті. Сондай-ақ бастамаларды кейіннен тиімді іске асыруға өз ұсыныстарын жеткізді.

ҰКП кәсіпкерлер арасында Конституцияға ұсынылған түзе­ту­лер туралы түсіндіру жұмыс­та­рын жалғастырады. Алда­ғы уа­қыт­та елордалық компания­лар­дың еңбек ұжымдарымен бір­қатар кездесу жоспарланған.