Екінші дүниежүзілік соғыс кино, әдебиет және кескіндеме өнеріне тақырып жағынан орасан шабыт әкелді. Соғыстан кейінгі өмір өнер кеңістігінен өз бейнесін тапты. Сол үрдіс украин ұлтының даңқты суретшісі Григорий Васецкийдің шығармасынан да көрініс берген еді. Оның «1945 жылғы мамыр. Оралу» картинасы – жастық шағы соғыс жылдарына тура келген жаңа буынның туындысы. Бұл кезең олар үшін ең маңызды оқиға болды.
Суретші өз жұмысында сарбаздың соғыстан оралуын жеткізген. Ол осы композиция арқылы туған жеріне аман келген батырды күтіп алған жас арудың қуанышын әдемі суреттеген. Алайда олар соғыстың барлық ауыртпалығын бастарынан өткерген. Кеуделерінде қайсар рух қоныстанған және алдағы өміріне сеніммен қадам басады.
Қылқалам шебері кескіндемеде символдарға, аллегорияларға және метафораларға сүйенеді. Кенеп бетіне тұтас жазылған дөңнің үстіндегі композиция кейіпкерлері кеңістікті түгелдей алып жатыр, олар қол ұстасып, көрерменге қарай жылжып келеді. Суретші осы арқылы кеңес адамының фашизмді жеңу жолында жасаған ерлігінің маңызы мен мәнін көрсеткен, сол сияқты келешек те солардың қолында екенін байқатқандай. Олар жаңа дәуірге нық қадаммен адымдайды.
Суреткер кейіпкерлерді таудың баурайында жайқалып тұрған алма бағының аясында жазған. Сол арқылы табиғаттың жаңа өмір үшін оянып жатқанын көрсетіп тұр. Соғыс аяқталғалы ондаған жыл өтсе де, оның елесі халықтың жадынан өшпек емес. Өткен ғасырдың зұлмат оқиғаларымен байланысы бар ардагерлердің өлшеусіз ерлігі ұлт санасынан жойылмайды. Жеңістің бояуы екі ғашықтың алғаусыз махаббатындай қашанда ып-ыстық әрі мөп-мөлдір болып қала береді.
