Аймақтар • 01 Маусым, 2022

Тақымды жігіттер тартысты

198 рет
көрсетілді
2 мин
оқу үшін

Бұқар жырау ауданындағы Петровка ауылында көк­пардан 23 жасқа дейінгі жастар арасында Қарағанды облысының чемпионаты өтті. Аталған сайысқа Қар­қаралы, Жаңаарқа, Осакаров, Бұқар жырау, Ақтоғай, Шет және Нұра аудандарынан жеті команда қатысып, өзара шын мықтыны анықтады.

Тақымды жігіттер тартысты

Жүлде қоры 1 миллион 200 мың теңгені құраған төл спорт­тың дүбірлі додасында 100-ге жуық көкпаршы бақ сынады.

Екі күнге созылған сайы­с қо­рытындысында Шет ауда­нының көкпаршылары топ жарды. Екінші орын Жаңа­арқа ауданының коман­да­сына бұйырса, үшінші жүл­дені Бұқар жырау мен Нұ­ра аудандарының көкпаршылары өзара бөлісті. Ал чем­пио­нат­тың үздік шабуылшы­сы болып Шет ауданы коман­дасының 18 жастағы мүшесі Темірлан Тілеубек танылды.

Жеңімпаз команданы соңғы төрт жыл бойында жат­тық­ты­рып келе жатқан тәлімгер Жасұлан Боханов жастар ара­сындағы ұлттық спортқа деген қызығушылықтың артып келе жатқанына қуанышты екенін айтады.

– Команда мүшелерін таң­дау кезінде біз ең алдымен еп­тілік пен батылдыққа мән береміз. Сондай-ақ көкпаршы тек атқа отырып қана қой­май, жылқыны сезініп, ко­мандада ойнай білуі керек. Шабандоздар арасында толық түсінік болғаны жөн. Көкпарда кім­нің «салма» салатыны ма­ңызды емес, мәселе жал­пы­командалық есеп­тің нә­ти­же­сінде, – дейді Шет ауданы ұжымы­ның жаттықты­ру­шысы.

Ұлттық және ат спорты түрлері бойынша облыстық «Қайрат» спорт мектебінің директоры Нұржан Шайхин бұл чемпионаттың өңір құрама командасына лайықты үздіктерді іріктейтін турнирге жататынын айтады.

– Жарыс қорытындысында іріктелген көкпаршылар келе­сі жылдың наурыз айында өте­тін ел чемпионатында өнер көр­сететін болады. Жалпы, біз­­дің көк­­паршыларымыздың мүм­­кін­­дігі жоғары және олар­дың ке­­­лешегі зор, – дейді Н.Шай­­хин.

Айта кету керек, аталған көкпар додасына қазақтың бел­гілі кәсіпкері, меценат, Nәtige сүт фабрикасының басшысы Ерлан Әшім демеушілік етті. Ал ұйымдастырушылар болса, көкпардан облыс чемпионатын жыл сайын Петровка ауылында өткізуді ұйғарып отыр.

 

Қарағанды облысы,

Бұқар жырау ауданы