![Арқаның Ақберені](/media/2022/06/06/4512.jpg)
Ұлттық өнер қазақтың бой-тұмарына айналған ұлы дүниесі. Осы орайда һакім Абайдың да:
«Өзгеге, көңілім, тоярсың,
Өлеңді қайтіп қоярсың?
Оны айтқанда толғанып,
Іштегі дертті жоярсың.
Тыңдамаса еш адам,
Өз жүрегім қозғалсын» –
деуі халқымыздың ықылым заман, сан ғасырдан бергі ән құдіретіне деген сенімін нығайта түспек. Қай дәуірде болмасын бабамыздан қалған асыл мұраны келешек ұрпаққа қаймағын бұзбай жеткізушілеріміз баршылық. Кешегі аты аңызға айналған Арқаның атақты сал серілері Ақан, Біржан, Балуан Шолақ, Үкілі Ыбырай, Жаяу Мұса, Мәди, Иманжүсіптерден мұраны аманаттап қабылдаған, Қосымжан Бабақов, Қуан Лекеров, Қали Байжанов, Байғабыл Жылқыбаевтар әнді өз тұғырынан тайдырмай дәуірлете дәстүр сабақтастығын бергі ұрпаққа жеткізді. Осы Арқа дәстүріндегі үлкен мектептің жалғастырушылары Игілік Омаров, Гүлбаршын Ақпанова, Қайрат Байбосынов, Қарақойшы, Ғалым Мұхаммединдер еді.
Мен бүгін Қазақстанның еңбек сіңірген әртісі, Жезқазған қаласының және Жаңарқа ауданының құрметті азаматы Тайжан Қалмағамбетов атындағы Жезқазған филармониясының әншісі, Тайжан ақынның әндерін жинақтап насихаттаушы сырбаз да саңлақ әнші Ғалым Мұхамедин жайлы көңілдегі көркем дүниелерді сыр ғып шертуге қолыма қалам алып отырған жағдайым бар. 1977 жылы әскери міндетімді атқарып келгеннен кейін туған ауылымда бір жыл жұмыс жасап, келесі жылы күзде Алматы ауылшаруашылық институтының бірінші курсына түскен кезім. Гоголь-Мұратбаев көшесінің бойында жатақта тұрамыз. Бөлмемізде қабырғада ілулі Қазақ радиосы саңқылдап тұратын еді. Бала күнгі әдетім бойынша шамам келгенше радионы жібермей тыңдап жүремін. Көрші бөлмедегі менен екі курс жоғары, топырақ зерттеу факультетінде оқитын Жұмағали деген азамат та радио тыңдауға құштар екен. Екеуіміз кездескен сайын радиодан өткен әндер туралы әңгімеміз таусылмайды. Бірде Жүсіпбек Елебеков,бірде Ғарифолла Құманғалиев,бірде Дәнеш Рақышев, бірде Қайрат Байбосыновтардың әншілігі туралы айтып, ауызымыздың суы құрып жүргеніміз. Өйткені ол да, мен де, домбырамен өз әлімізше ән айтамыз. Бірде Жұмағали жерден жеті қоян тапқандай қуанып бөлмеме келді. «Қошан, бүгін мен радиодан бір керемет ән тыңдадым, дауысы өте ашық Кәкімбек Салықовтың «Жезкиік» әнін айтты» деп таң қалып отырды. Не керек ендігі жерде Жұмағали мақтауын жеткізген әншінің орындауындағы әнді күтумен жүрдік. Араға айлар сала бір күні түскі демалыс концертінен «Жезкиікті» жаңағы әншіңіз саңқылдатсын. Жұмағалиға барып, өткендегі әншіні мен де тыңдадым, есімі Ғалым екен дегенімше, ол да тыңдап, ата тегін жазып алған екен «Мұхамедин» деп қостай жөнелді. Ойымыз бір жерден шығып, ендігі жерде әлгі әншінің орындауындағы әндерін екіжақтап іздей бастадық. Кезі келсе тыңдап, өз тарапымыздан ризашылығымызды білдіріп жүретін болдық. Осылай жүргенімізде менің әскерде бірге болған жезқазғандық досым Алпысбай Тұрсынбеков консерваторияға күйші Мәлғаждар Әубәкіровтің класына оқуға түскен екен, мені жатаққа іздеп келді. «Жезкиік» әнін ендігі жерде құлпырта ол орындасын. Күйшімін дегені болмаса, ол да табиғатынан керемет әнші еді. Не деген әуелеген сұлу дауыс, ғажап ән. Әңгімеміз жарасып, одан ән үйрене бастадық. «Жезкиік» әнінің шығу тарихын сұрадық. Сөзін жерлесі Кәкімбек Салықов деген үлкен ақынның жазғанын, әнін Жақсыгелді Сейіловтің шығарғанын, бірінші орындаушысы әлгі біз іздеп жүрген Ғалым Мұхамедин екенін айтып берсін. 1978 жылы біздермен қатар Алматыға келіп, Эстрада цирк студиясына Жәнібек Кәрменовтің класына Ырымтай Бөдесов, Мейірхан Адамбеков деген қарағандылық жігіттердің түскенін айтқан Алпысбай, біздерді апарып, сол азаматтармен таныстырды. Алматының қақ төрінде орналасқан Эстрада цирк студиясында Қазақстанның халық әртістері Жүсіпбек Елебеков атындағы Арқа, Ғарифолла Құрманғалиев атындағы Батыс дәстүріндегі екі жылдық үлкен екі мектеп бар еді. Бұл оқу орнының абыройы Алматыда өте жоғары болатын. Енді біз, жатақты былай қойғанда Эстрада цирк студиясына барып, ән тыңдап, үйренуді әдетке айналдырып, небір әншілермен сыйласа бастадық. Дегенмен бірінші орындаушысынан естіген «Жезкиік» әні көп азаматтардың орындауында біздің көңілімізден шыға қоймағанын несіне жасырайын.
1980 жылдың күрең күзі болатын. Республика көлемінде тұңғыш рет Әміре Қашаубаев атындағы әншілер байқауы өтетінін теледидар, радиодан хабарлап, газеттер жарысып жазып жатты. Айтқан межелі уақыт жетіп, жан-жақтан жүзге тарта сен тұр мен атайын өнерпаздар Алматыға ат басын тіреді. Қазақ елінің аспанына қоңыр домбыраның күмбірімен әннен шашу шашты. Байқаудың қазылар алқасына Байғали Досымжанов, Бекен Жылысбаев, Дәнеш Рақышев, Жәнібек Кәрменов т.б. мүйізі қарағайдай өнер тарландары жайғасқан екен. Қазақстан ұлттық арнасы Әміре Қашаубаев атындағы бірінші республикалық әншілер байқауын арнайы түсірсе, Қазақ радиосы тікелей эфир арқылы барын сала насихаттады. Мұны сол кездегі жол бастар ағаларымыздың ұлт өнеріне жанашырлығы демей, қалай дейсіз. Ауылшаруашылық институтының студенті болсам да жанымда өнерге жақын Хамитов Түймебай, Нышанқұл Тілеуов деген достарым бар, консерваториядан Нұрлан Хамзин, Алпысбай Тұрсынбеков, Эстрада цирк студиясынан Ырымтай Бөдесов бәріміз үш күн сабақты тастап, осы байқауды тамашаладық. «Теңіздің тіліп толқынын,Торала қазын ұшырған» демекші, үш күндік жарыс мәресіне де жетті. Республикалық байқаудың бірінші орынын жаркенттік Мырзахмет Мүкәманов, Әміре Қашаубаев атындағы Семей филармониясының әншісі Бақыт Үдербаева иеленсе, екінші орынды алматылық Қасен Төпеев, семейлік Келденбай Өлмесеков, үшінші орынды павлодарлық Ожаев Төлеген, алматылық Мырқаев Жақсылық, Эстрада цирк студиясының екінші курс студенті Мейірхан Адамбековтер алды. Басқа да марапат жүлделерді саңлақтар бөлісіп жатты. Жезқазған облысы үкілеп бәйгеге қосқан, біздер жанында жанкүйер болып жүрген талаптың тұлпарын мінген Ғалым Мұхамедин ағамызға үздік орындаушы аталымы берілді. Осы сапар Ғалым ағамызды теледидар, радиодан журналистер таласа-тармаса, жапа-тармағай жазып алды. Қашанда орындаушысы келіскен әннің бағы жанады емес пе, сол кезде Жақсыгелді Сейілов ағамыздың «Жезкиік» әнінің де Ғалым Мұхамединнің де тасы өрге домалап, қазақ радиосынан ән жиі беріліп, сиқырлы дауысының бунақ-бунақ бүлкіліне қызыққан домбыра ұстаған өнерпаздар жапа тармағай осы әнді үйреніп айтатын болды. Қалай десек те, Ғалым орындаған небір әндер, ән сүйер қауымның жүрегінде тастағы жазудай әсем өрнегімен бүгінгі күнге дейін жаңғырып тұрғаны хақ. Ерекше сезімде болған біздер де Ғалым ағамыздың осы сапарында жанында жүріп, өзімізге ұнаған әнді өз аузынан есітіп үйрендік. 1982 жылы Жезқазған облысы, Ақтоғай ауданынан өзін Ғалекеңнің төл шәкірті санайтын Саламат Қазақбаев Эстрада цирк студиясына Жәнібек Кәрменовтің класына келіп түсті. Бірінен бірі асатын таңдайынан ән қоздаған азаматтар Арқаның ән дәстүрінің туын желбіретті.
«Өмірдің жолы сан тарау, кезі келсе біреуіне түсесің де кетесің» деп үлкендер айтқанда мұнысы қалай деп таңырқайтын едік. Замана өзгеріп, дәуір алмасып, басшылық елді нарық заманына ауыстырған кезде біздер де мамандықты өзгертіп, Әл-Фараби атындағы қазақ ұлттық университетінде он жылдай қызмет істеп, журналист мамандығын алып, Қазақ радиосының бас директоры Жүрсін Ерманның шақыруымен 2008 жылы Қазақ радиосына, қызметке келдім. Мақсатым қазақтың хандары, батыр, би, шешен, жырауларының өткен тарихын, сонымен қоса жастарымызға өсиет, насихат беретін «Толғау», «Термелерін» халыққа жеткізу.Әр өңірдің тарихи дүниелерін насихаттай келе Арқаға тірелгенде Ғалым ағама қалай тоқталмайын. Өйткені ол кісінің қоржынында тағылымды дүниелер баршылығы өзіме мәлім еді.
Алматыға сирек келетін, Ғалым ағамызбен телефон арқылы хабарласып тұратынмын. Концерттік сапармен Алматыға бір келгенінде арнайы іздеп барып, Қазақконцерт залында жолықтым. «Радиодан сенің жүргізетін жыршы жыраулар жайлы «Інжу-Маржан», «Терме», хабарыңды тыңдап тұрамын» деп ризашылығын білдірді. Арқа жері де, терме, толғаулардан кем емес еді ғой, сіздердің неге орындамайтындарыңызға таң қаламын, бабалар мұрасы осылай ұмыт болып қала бермек пе деп, Ғалым ағама наз білдіре, зілді сауал тастадым. «А, онда мен дайындалайын, тағы бір келгенде екеуіміз біраз дүниелер жазармыз» деп уәдесін берді. Бірер жылдан соң Ғалым ағам арнайы дайындалып, қазақ радиосына менің «Інжу-Маржан» хабарыма белін бекем буа арнайы келді. Әңгімеміз қыза-қыза Ғалекеңнің студенттік күндеріне келіп тірелдік. Небір қызықтарын айта келе ұстазы жөнінде былай толғанған еді.
Жүсекеңнің мен соңғы шәкіртімін. Өйткені жетпіс төртінші жылы біз оқуға түскенде Жүсекең жетпіске келді. Сол 70 жасындағы оқытқан шәкіртімін мен. Содан, екі жылдан кейін қайтыс болды. Кезінде өзімен бірге біраз гастрольдерге алып жүрді. Талдықорған, Алматы облыстарын араладық. Сол кезде Жүсекеңнің концерттердегі айтқан әуендері әлі күнге құлағымда жаңғырып тұр. Ол кісінің кереметтілігі сол, ауданнан өтіп, екінші совхозға келгенде репертуарындағы әндерін жиі ауыстырып отыратын. Үніне адам таңғаларлық керемет еді, сиқырлы әншілігі болатын. Бұл қалай десем, сонда әндерді есте сақтап, ұмытпау үшін қайталап айтады екен ғой. Маған: «Ғалым, сен де, айтатын әндеріңді көбірек ауыстырып отыр, бір жерде бір әнге қақалып тұрып қалмаңдар,оған да адам үйреніп алады да содан шықпай қояды дейтін еді» – деп Ғалекең ойланып, біраз отырып қалды.
Бұрынғы Жезқазған облысы, Жаңарқа ауданына жолыңыз түсіп бара қалсаңыз, көлденең жатқан Көктал өзеніне бет шайып, Ақтау, Сарытау, Қаратұмсық деп аталатын, жан-жағын жалтыраған шағын бұлақтар көмкерген, жатаған тауларға, салқыншақ жүлгелерге неше өнерпаздың табаны тиген, сусып көшкен шағылдың бетіндей селеулі далаға, өсиеті мен қасиеті мәшһүр жерге тап боласыз.Әрине бұл өлкеде әнші де күйші де көп.Соның бірі Ғалекеңмен Жезқазған филармониясында бірге қызмет еткен концерттік сапарларда бірге жүрген жолдасы Ахат Байбосынов.Ол кісінің де досы жайлы пікірін білген едім.
«Ғалым Мұхамедин туралы айтатын болсақ, бір күннің уақыты жетпейтін шығар. Оны, олай деп айтатын себебім, бала кезімізден бірге жүрген доспыз.Тұрмысымыз ол бөлек әңгіме, ал енді үлкен сахнада 76 жылдан бастап, 2005 жылға дейін отыз жылдың отарында бірге қызметтес болдым. Ғалымның дауысының диапазонының кеңдігі, әншілік шеберлігі, оны айтатыны жоқ, ол өзінше бөлек әнші. Сондай баритон дауысты әншілер баршылық қой, бірақ алғашқы шыққан кезінде Жүсекеңнің шәкірттерінің ішінен Ғалымды көбінесе, Қали Байжановқа телитін. Сөйтіп жүргенде Ғалым өзіне тән стилін тауып алды. Қазір өзіндік нұсқасы бар,өзінің жолы бар бірегей әнші. Ол өзінше, жеке мектеп, көптеген шәкірттерін тәрбиелеп жатқан азамат қазір. Енді оның бір таңқалатын да жерлері бар, Ғалекең ешкім білмейтін ән-
дерді нұсқаға келтіріп отырады. Мысалға, кейбір әндердің бірінші,екінші нұсқалары болады ғой, сәтін Құдай солай қып сала ма, бірінші нұсқасын ылғи Ғалым орындап қалатын. «Жезкиікті» бірінші айтқаны сияқты. Қасым Аманжоловтың «Өзім туралы» деген толғауын білесіз, оның бірінші нұсқасын да, Ғалым орындаған.
Баяғыда Жүсіпбек Елебековтің 70 жылдық мерейтойында, Ғабиден Мұстафин, Әлкей Марғұлан, Ғазиза Жұбановалар көздері тірі кезінде осы әнді тамашалап, қатты риза болған. Сондықтан Ғалымның бұл жердегі еңбегі өте зор. Өкінішке қарай, бұл әнді ешкім жеткізіп айта алмады, мүмкін естімеген де шығар, естісе де, ала алмаған шығар деп ойлаймын. Дегенмен ол нұсқа, сол нұсқа боп қалады-ау. Менің естуімше шәкірттері, осыны әрі қарай жалғастырғанға ұқсайды», – деп Ахат мырза да досына деген жақсы лебізін білдірген еді.
«Әндердің ұлы атасы Қанат талды, Арқада аңыратып Сейітжан салды» десек, Үкілі Ыбырайдың ізін жалғастырушы шәкірті, Тайжан екендігі де белгілі, одан ән үйренген Нартайлар Сыр, Арқа, оңтүстік өңірді аралап, талай ән салды.Сынаптай сырғыған уақытқа дауаңыз бар ма. Қаншама күміс көмей әншілер өмір көшінен өтсе де олардың ізбасарлары мұраларын жалғастыруда. Кешегі жас өрен Ғалымыңыз да бүгінде жетпіс деген жасыңызды алқымдап, сексеніңіздің ауылына қарай беттегелі отыр. Өз мамандығын жанымен сүйгендігі емес пе, жалаңаяқ жар кешіп, қызылаяқ қыр кешіп, бар ғұмырында қоңыр домбырасын белінен тастамай, бүгінде ұмытылған немесе сирек орындалатын әндер жинап, халқымыздың мәдени игілігіне айналдыруда. Кезінде «Ұлытау» ансамблімен ФРГ, Москва, Литва, Грузия, Өзбекстан, Қарақалпақстан, Қырғызстанға сапар шексе, «Жез киік» ансамблімен Қазақстанның барлық өңірлерін аралап, киелі сахналарында қазақтың әнінің құдіретін таныта білді. «Алтын кесе», «Қос апаның әні», «Көк айдай», «Ертөлеудің әні» және Үкілі Ыбырай,Тайжан Қалмағамбетовтың ұмыт болған әндерін халық арасынан жинап, Сәтбаев қаласында Тайжан Қалмағамбетов атындағы Республикалық әншілер байқауын екі дүркін өтуіне себепкер болды. Халық жауы болып атылып кеткен Тайжан ақынның әндерін халыққа жеткізуін өтінген ұстазы Жүсіпбек Елебековтің аманатын орындап, он алты әнін жинақтап, қазақ музыкасының алтын қорына енгізді. 2011 жылы «Жезкиік», 2013 жылы «Алтын кесе» күйтабағы жарық көрді.
1952 жылы Қарағанды облысы, Жаңаарқа ауданы, Ескене ауылында дүниеге келген Ғалекең, 1969 жылы орта мектепті бітіргеннен кейін туған ауылында ауылшаруашылығының әртүрлі саласында еңбек етті.Табиғи талантының арқасында 1971 жылы Жаңарқа аудандық мәдениет бөлімінде автоклуб меңгерушісі,1973 жылы Жезқазған облыстық көркемөнерпаздар байқауының жүлдегірі атанды. 1985 жылы жастардың Республикалық «Жігер» фестивалінің, 1988 жылы Республикалық Әміре Қашаубаев атындағы байқаудың жүлдегері атанды.
1993 жылдан бастап Жезқазған музыкалық колледжінде домбырамен ән салу мамандығы бойынша Жүсіпбек Елебеков дәстүрін насихаттап, дәріс беруде. Ғалым Мұхамедин 1999 жылы академик Қ.И.Сәтбаевтың сүйіп орындайтын әндер байқауының бірінші жүлдесін иеленді. Қазақстан Республикасының Тәуелсіздігінің 10 жылдық мерейтойы қарсаңында Қазақстанның Тұңғыш Президенті Н.Ә.Назарбаевтың «Алғысхатымен» және 2002 жылы Мәдениет министрлігінің «Құрмет грамотасымен», 2002 жылы «Жезқазған қаласының Құрметті азаматы» атағымен, 2006 жылы Қарағанды облысы әкімінің сыйлығы «Халық әндерін үздік орындаушы» аталымының иегірі, 2011 жылы Қазақстан Республикасы Тәуелсіздігіне 20 жыл мерекелік медалімен марапатталды. 2012 жылы «Жаңаарқа ауданының құрметті азаматы» атағы берілді. 2014 жылы «Еңбек ардагері» медалімен, 2016 жылы Тәуелсіздіктің 25 жылдығына байланысты «Ерен еңбегі үшін» медалімен марапатталған. 2018 жылы Қарағанды облысы әкімінің сыйлығы «Мамандығына адалдығы үшін» аталымы бойынша марапатталды. 2021 жылы Қазақстан Республикасы Тәуелсіздігіне 30 жыл мерекелік медалімен марапатталды. Ғалекеңе зор денсаулық, шығармашылық табыстар тілейміз!
Қошан МҰСТАФАҰЛЫ,
Қазақстанның еңбек сіңірген қайраткері, журналист