Ел Президентінің 2022 жылғы 3 мамырдағы №887 Жарлығына сәйкес Алматы облысының құрамынан Жетісу облысы бөлініп шықты. Осыған байланысты Алматы облыстық мәслихаты да Алматы және Жетісу облыстарының мәслихаттары болып екіге бөлінді. Облыстық мәслихат бұған дейін 45 депутаттық мандат бойынша өз өкілеттілігін жүзеге асырып келген болса, енді құзырлы орган Amanat партиясы, Қазақстанның Халық партиясы және «Ауыл» партиясынан құралған депуттық фракциялардың келісімімен және сайлаушылар санын ескере отырып, қайта жасақталды. Яғни енді Алматы облысының мәслихатында 26 депутат, Жетісу облысының мәслихатында 19 депутат болады.
Мәслихат сессиясының жұмысын түйіндеген облыс әкімінің міндетін атқарушы Ләззат Тұрлашов бұл жиынды тарихи оқиға деп атап өтті. Ол қос облыстың депутаттарын құттықтап, ел игілігі жолындағы еңбектеріне сәттілік тіледі.
Ал сәл үзілістен кейін Жетісу облыстық мәслихатының алғашқы сессиясы да өтті. Жиында әріптестернің қолдауына ие болған депутат Гүлнар Тойлыбаева жаңа облыс мәслихатының хатшысы болып сайланды. Ол бұған дейін Amanat партиясының Алматы облыстық филиалының атқарушы хатшысы қызметін атқарған болатын. Депутаттар корпусы Г.Тойлыбаеваның кандидатурасына бірауыздан дауыс берді. Сондай-ақ, алғашқы сессия барысында депутаттар Жетісу облысы мәслихатының тұрақты комиссияларын құру, олардың құрамын бекіту, сол сияқты мәслихат аппаратының регламентін, құрылымын және штат кестесін бекітуге қатысты бірқатар мәселені талқылады.
Алматы облысы
