Облыстық ауыл шаруашылығы басқармасының мәліметіне сүйенсек, биыл егіс алқабы 1 554,7 мың гектарды құрап отыр. Өткен жылмен салыстырғанда дәнді дақылдар алқабы 19,2 мың гектарға, күнбағыс 6 мың гектарға, картоп 1,7 мың гектарға, сәбіз 0,2 мың гектарға, қырыққабат 0,1 мың гектарға және пияз 0,2 мың гектарға артқан. Сонымен қатар, мал азығы дақылдары жоспардағы көрсеткіштен жоғары тұр. Өңірдегі барлық жемшөп дақылдары 102,9 мың гектарға тең.
Егіс науқанына барлық модификациядағы 4 462 трактор және 245 егіс кешені жұмылдырылған. Көктемгі дала жұмыстарын жүргізуге 4,1 млрд теңге қаражат бөлініпті. Ал субсидиялау ісіне 1,8 млрд теңге қарастырылған.
Егіс жұмыстары аяқталды екен деп минералды тыңайтқыштарды қолдану тоқтап қалмайды. Осы ретте, жергілікті диқандар тыңайтқыштарды сатып алу бойынша 17,8 мың тоннаға келісімшарт жасасқан. Бүгінде «Минералды тыңайтқыштардың құнын субсидиялау» және «Тұқым шаруашылығын дамытуды қолдау» бағдарламалары шеңберінде өтінімдер қабылданып жатыр.
Биыл облыс әкімдігі қолдауымен азық-түлік қауіпсіздігін қамтамасыз ету және ауылшаруашылық дақылдарын өсірудің тиімділігін арттыруға қатысты бірқатар шараны қолға алған болатын. Сәйкесінше, көкөніс, бақша және дәнді дақылдар алқабы артып, егіншілікпен айналысатын шаруаларды субсидиялауға бөлінетін қаражат көлемі де ұлғайып келеді.
Павлодар облысы
