Әзербайжан суретшісі Сакыт Маммадовтың кураторлығымен өткен жиын аясында бірқатар іс-шара ұйымдастырылған. Көрмеге қатысушылар Түркияның жас суретшілеріне шеберлік сағаттарын өткізді. Одан бөлек галереяда үлкен көрме болып өтті. Мәдени іс-шараға Қазақстаннан барған суретші Сембіғали Смағұл «Ай ұстаған абадан» қасқыр мүсінін алып барған. Көрермендердің ерекше назарына іліккен өнер туындысы қала мэрі Икрам Имамоғлұның ұсынысымен Ыстамбұлдың көрікті бір жеріне қойылмақ.
Қазақстандық суретшінің айтуынша, аузына Ай тістеген қасқыр мүсін түркі халықтарының қайта жаңғыруының символы ретінде жасалған.
«Түркі халықтары тотемінің бірі қасқыр көп символдарда Айға қарап ұлып тұрады. Жалпы, шығармашылық адамдары яки билік өкілдері қоғамда бір өзгерістер жасап отырады. Мысалы, мен мұнда қасқырдың Айға қарап ұлымай, сол Айды ұстаған заман келетінін меңзедім. Бұл ғасырда түркі халықтарының басы бірігіп, бірлігі артады деп сенемін. Түркияда өткен көрме де барша түркі халықтарына ортақ мәдениеттің қалыптасуына ықпал етіп отыр», дейді С.Смағұл.
Айта кетейік, қала мэрі әр қатысушының бір-бір жұмысын өз музейіне сатып алған. Оған қоса түркиялық кәсіпкерлерді көрмеге шақырып, туындылардың сатылуына ықпал еткен.
