Білім • 13 Шілде, 2022

Семейлік оқушының жеңісі

325 рет
көрсетілді
1 мин
оқу үшін

Семей қаласындағы физика-математика бағытындағы Назарбаев Зияткерлік мектебінің оқушысы Шыңғыс Тоқанов XXIX халықаралық «Туймаада» оқушылар олимпиадасында 1 орынды жеңіп алды.

Семейлік оқушының жеңісі

Ресей Федерациясының Якутск қаласында ұйымдастырылған олимпиада математика, физика, химия және информатика пәндері бойынша өтті. Жас ерек­шелік­тері­не қарай кіші және үлкен лигаға бөлінген олимпиадада Шыңғыс химия пәні бойынша бақ сынады.

«Олимпиадаға Шыңғыс тыңғылықты дайындалды. Түрлі есептерді шығарып, теориялық білімін толықтырды. Ресей, Сингапур, Индонезия, Румыния сынды көптеген алпауыт елдің өрендерімен білім жарыстырған шәкіртіміз алғашқы кезеңде күрделі теориялық есептерді шығарса, келесі практикалық кезеңде алдын ала жасалған эксперименттер бойынша қорытынды  жасады. Нәтижесінде, өзгелерден озып шықты», деді жеңімпаздың ғылыми жетекшісі, химия пәнінің мұғалімі Асылбек Оразбеков.

Ұйымдастырушылар биылғы олим­пиаданы іштей және қашық­тан аралас үлгіде өткізуді жөн көрген. Ресейлік жас дарындардан өз­ге шетелдік оқушыларға қашық­тан қатысуға мүмкіндік берілді. Десе де бұл олимпиада барысын қадағалауды жеңілдеткен жоқ. Өйт­кені әр қатысушы Прокто­ринг жүйесі бойынша қатаң бақыланды.

 

Абай облысы