Осылайша, «Астана Операның» бас дирижері, Қазақстанның еңбек сіңірген қайраткері, Мемлекеттік сыйлықтың лауреаты, әлемге әйгілі маэстро 14-15 шілде күндері өтетін керемет кешінде театрдың өткен маусым мен алдағы келе жатқан мерейтойлық маусымы арасындағы шығармашылық алтын көпірдің қайталанбас келбетін түзбек.
Бүгінде қазақстандық дирижер әлем бойынша сұранысқа ие музыканттардың бірі. Түрлі елдердің симфониялық оркестрлері онымен жұмыс істеуге асығады. Ол Еуропаның үздік сахналарында спектакльдер қояды. Ал оның әлемдік музыка қоғамында резонанс туғызатын авторлық жобаларын ұлы өнердің барлық табынушысы көруге ұмтылады. Бұл Қазақстан, Италия мен басқа да елдерден мыңнан астам музыкант орындаған Густав Малердің №8 симфониясына да, Карл Дженкинстің SHINE ASTANA салтанатты одасына да қатысты. Елорда өнерсүйер қауымының сүйікті жобаларының тізіміне, сондай-ақ «Италиядан келген хаттар», «Нибелунг жүзігі», «Мольер, Вольтер және Бомарше, немесе Француз комедиясының негізін қалаушылар» және тағы да басқа табысты, бірегей авторлық бағдарламалар көрік беріп келеді. «Парижден кәдесый» концертін де сол тізімнің жемісті жалғасы десек, артық айтқандығымыз емес. Өйткені қазақ өнері үшін Париждің орны да, рөлі де ерек.
Атап айтсақ, Қазақстан мен Францияны, әсіресе Парижді берік шығармашылық көпірлер байланыстырады. Әміре Қашаубаевтың 1925 жылы Париждегі өнер көрсетуін екі елдің мәдени қатынастарының бастауы деп есептеуге болады. Ол біздің өнерімізді еуропалық сахнада таныстырған алғашқы қазақстандық орындаушы атанды. Сонымен қатар Парижде ұлы қазақ ойшылы Абай Құнанбайұлы, Жамбыл Жабаев, Мұхтар Әуезовтің мерейтойлары атап өтіліп, ЮНЕСКО-ның штаб-пәтерінде қазақтың ұлы композиторы Ахмет Жұбановтың 100 жылдық мерейтойы да салтанатпен тойланған болатын. Ал 2014 жылы Алан Бөрібаевтің дирижерлігімен Париждегі атақты Champs-Élysées театрында А.Жұбанов пен Л.Хамиди жазған «Абай» операсының француздық премьерасы зор табыспен өтті.
Маэстроның әрбір жобасы бірегей, алайда оның өте ерекше бағдарламаларының барлық әралуандылығын да біріктіруші белгілері бар, ол – ұлы музыкалық мәнер мен тарихи оқиғаның үндестігі. Осынау концерт тыңдарманға бір гала-опера аясында бір уақытта жиырмадан көп танымал, сондай-ақ француз композиторларының өте сирек орындалатын жауһарларымен танысуға мүмкіндік береді. Оларды Алан Бөрібаев «Парижден кәдесый!» галасына ұқыптап жинақтап, екшеп ерекшелендіріпті.
Бас дирижердің ғұмырнамаларды, өмірбаяндарды, сол немесе басқа композиторлар өмір сүрген дәуірдің тарихи деректерін жете зерттейтіні белгілі. Бәлкім, оның концерттерінің жасалу логикасының мінсіз болуы және көрермендер аудиториясы үшін ағартушылық сипат арқалауы осынау терең танымның нәтижесінде шығар. Ол жөнінде дирижердің өзі былай дейді:
– Айтулы жоба – XIX ғасырдың француз романтикалық операсы секілді шоқтығы биік мәдени құбылысты бүкіл кеш бойы қамтуға жасаған шығармашылық талпыныс. Бұл ұғымның кеңдігі сонша, осынау жалпыланған терминнің ішінде ол көптеген бағытқа бөлінеді. Гуноның «Фауст», Бизенің «Кармен» немесе Делибтің «Лакме» секілді үш атақты француз операсын атасақ та, олардың романтизм, реализм және ориентализм секілді түрлі ағымдарды білдіретінін көреміз. Біздің концертімізде ұсынылған барлық композиторды не біріктіреді десек, ол жоғары талғамға, тапқырлыққа, кемелдікке, мәнер көркемдігіне, әуен әсемдігіне, драмалық көріністердің көзтартарлығына, әуенді әрі үйлесімді айналымдардың төл даралығына құштарлық. Мәселен, ұлы Жорж Бизе сөзге екпінді дұрыс түсірмегенде сөз өзі шығарған әуенге «қонып» тұрса, ол әуен үшін екпінді солай қате күйінде қалдыра салады. Бірақ жоғарыда айтып өткенімдей, үйреншікті болмау – француз операсы мәнерінің ең маңызды құраушы тұстарының бірі болып табылады, – деп мазмұнды кешінің алдында маэстро Алан Бөрібаев пікірімен бөлісті.
Керемет концертке тамаша әншілер – Азамат Жылтыркөзов, Салтанат Ахметова, Жаннат Бақтай, Медет Шотабаев, Жәмила Жарқымбаева, Мейір Байнеш, Салтанат Мұратбекова бастаған таланттар тобы «Астана Опера» симфониялық оркестрі мен хорының сүйемелдеуінде өнер көрсетеді. Бас хормейстер – Қазақстанның еңбек сіңірген қайраткері Ержан Дәуітов, концерт режиссері – Еренбақ Тойкенов. Опера өнері өркендеген XIX ғасырдағы Францияның ғажайып атмосферасына бойлауға мүмкіндік беретін «Парижден тосынсый!» жаңа гала-кешін көрерменнің лайықты бағалайтынына еш күмән жоқ.
