Қайғылы оқиға суға түсу маусымы ашылғалы бері Қапшағай су қоймасының демалысы орындарында жиі қайталанады. Өткен бір айдың шамасында бірнеше мәрте дабыл қағылып, құтқарушылар көмегіне жүгінгендер саны артқан. Оның ішінде бірнеше оқиға адам өлімімен аяқталыпты.Төтенше жағдай қызметінің мамандары адам өліміне апарып соғатын жағдайлардың барлығы дерлік арнайы белгі қойылмаған, яғни суға түсуге рұқсат етілмеген айлақтарда болатынын айтады. Жағалаудың көзден таса жатқан бөліктерінде суға түсу өте қауіпті. Көбіне аяқ асты суға батып кеткен адамды құтқару үшін мамандар жетіп үлгермейді екен. Мәселен, жақында Қапшағайдағы «Голубой залив» аталатын демалыс орны маңында төрт адам бірдей суға батып кетті. Ажал айтып келмейді дегендей, оқыс жағдайдың салдарынан бір отбасы түгелімен су астында тұншығып, құтқарушылар көмек қолын соза алмаған.
– Су қоймасында шомылу барысында толқын көтеріліп, екі ағайынды бала бата бастаған. Оларды ағасы, тәтесі және апасы құтқаруға ұмтылған. Бірақ өкінішке қарай, тек апасы ғана аман қалды. Құтқарушылар екі бала мен ер адамның денесін судан алып шықты. Біз үнемі азаматтардан арнайы жабдықталған орындарда ғана суға шомылуды, жүзе алмайтын адамдарды белден жоғары тереңдіктегі суға түспеуді, балаларды су жанында қараусыз қалдырмауды, су жанында демалу кезінде спирттік ішімдіктерді ішпеуді және толқындар мен дауылды ауа райында суға шомылмауды сұраймыз. Өкінішке қарай, адамдар бұл қауіпті ескере бермейді, – дейді облыстық Төтенше жағдайлар департаментінің өкілі.
Жалпы, Қонаев қаласында құтқарушылар кезекшілігі ұйымдастырылған 7 қалалық жағажай бар. Олар құтқару мұнараларымен және шомылу кезінде адамдардың қауіпсіздігін қамтамасыз ету үшін басқа да қажетті құралдармен жабдықталған. Ал көл жағалауында 140 шамасында жеке демалыс орны бар.
Қазір құтқарушылардан маза кетті десе де болады. Олардың қырағылығының арқасында ажалдан аман қалғандар да жетерлік. Таяуда ғана Қапшағайда үрлемелі матраспен жағадан 250 метр алысқа жүзіп кеткен 1997 жылғы ер адам құтқарылды. Дәл осы сәтте жағадан 400 метр қашықтыққа алыстап, суға бату қаупі төнген тағы екі ер адамға көмек көрсетілген екен. Өкінішке қарай, тағы бір күні құтқарушылар Қапшағай көлінен 2004 жылы туған жасөспірімнің денесін алып шықты. Жасөспірімге алғашқы медициналық көмек көрсетілгенімен еш нәтиже болмаған.
Айтпақшы, жыл басынан бері елімізде 134 адам суға кетіп қайтыс болса, оның ішінде 51 бала бар. Ал бірінші маусымнан бері 91 адамның ажалы судан келсе, оның да отыз сегізі жасөспірім екен. Осы аралықта құтқарушылар 98 ересек адам мен 29 баланы құтқарып, ажалдан аман алып қалған көрінеді.
Алматы облысы
