2030 жылға дейін «үштіктің» жалпы ішкі өнімі 900 млрд. долларды құрауы мүмкін

АСТАНА. 1 мамыр. 2030 жылға қарай Еуразиялық экономикалық одаққа мүше елдердің жалпы ішкі өнімі 900 млрд. долларды құрайды. М.В.Ломоносов атындағы Мәскеу мемлекеттік университетінде жүргізген дәрісі барысында Нұрсұлтан Назарбаев осылай деді. Бұл туралы egemen.kz тілшісі хабарлады. Нұрсұлтан Назарбаев еуразиялық интеграцияның көптеген пайдасы бар екенін айта келе: «Еуразиялық идея ХХІ ғасырдың екінші онжылдығының ортасына қарай нақты саяси, экономикалық геосаяси маңызға ие бола бастады. Жоғарғы еуразиялық кеңес, Еуразиялық экономикалық комиссия көңілге қонымды жұмыс істеп келеді. Қазақстан, Беларусь, Ресей үштігі бірыңғай Кедендік кодексті пайдалана отырып, макроэкономикалық саясатын үйлестіруде. Еуразиялық экономикалық одақ идеясының туындағанына 20 жыл толуы қарсаңында аталған интеграциялық бірлестікті құру туралы тариха келісімге Астанада қол қойылуы үлкен маңызға ие», – деді. Қазіргі таңда осы құрылғалы отырған Одаққа көптеген мемлекеттердің қызығушылық танытып отырғанын алға тартқан Нұрсұлтан Назарбаев: «Еуразиялық ықпалдастықтың экономикалық әлеуеті мықты деп есептейміз. Үш ел экономикасының жиынтығы 0,2 триллион долларды құрайды. Өнеркәсіптік өнім өндірісінің жиынтық көрсеткіші 1,5 триллион АҚШ долларын құрады. 2030 жылға қарай осы ықпалдастықтың тиімді сипаты ретінде жалпы ішкі өнімнің жиынтық өсімі 900 миллиард долларды құрауы мүмкін. Бұл көрсеткіштерді мамандар есептеп шыққан. Осылайша, еуразиялық өзара ықпалдастық оның барлық қатысушылары үшін қолайлы стратегиялық мүмкіндік беріп отыр», – деді. Жолдыбай Базар. Дереккөз: egemen.kz. Фото: «24kz».