21 шілдедегі жағдайға сәйкес Абай облысындағы бензин қоры келесідей. Айталық, АИ-92 бензині мұнай базаларында 7,16 мың тонна және 5,6 мың тоннасы жолда келе жатыр (жолды есепке алғанда 16 күнге жеткілікті). АИ-95 бензині 0,77 мың тонна және жолдағысы 1,82 мың тонна (жолды есепке алғанда 16 күнге жеткілікті). Дизель отыны 15,08 мың тонна және жолда келе жатқаны 1,91 мың тонна (жолды есепке алғанда 16 күнге жеткілікті).
Қазір мұнай өңдеу зауытынан АИ-92 мен АИ-95 бензинін өңірлерге қарай жөнелту жұмыстары күшейтілді.
Алакөлдегі жағдайға тоқталсақ, Қабанбай ауылындағы екі жекеменшік жағармай құю стансасына Petro retail ЖШС (QazaqOil ЖҚС желісі) 60 тоннадай сұйық отынды бөліп берді. Ақсуат ауданындағы 4 жекеменшік ЖҚС-да қажетті жағармай көлемі берілді.
Аягөзге «ҚазМұнайГаз» «ПетроКазахстан Ойл Продактс» кәсіпорнынан 625 тонна бензинді жеткізу жоспарланып отыр. Сондай-ақ Petro retail ЖШС жедел тәртіпте Ақсуат ауданының 4 ЖҚС-на жағармайды сата бастады. Осыған дейін аталған 4 ЖҚС сұйық отынды «Парнас» ЖШС-нан сатып алып келген. Алайда бұл компаниямен байланысқа шығу қиындағандықтан жағармай стансаларын энергия тасығыштармен қамтуға байланысты проблемалар туындаса керек.
Осындай жағдайларға тап болмас үшін аталған жағармай стансаларының иелеріне биржада тіркеліп, сұйық отынның саудасына қатысуға кеңес берілді. Бұл өз кезегінде қажетті ресурсты тікелей өндірушілерден алуға жол ашады. Аталған мәселені өңір басшысы Нұрлан Ұранхаев тікелей бақылауында ұстап отырғанын жеткізді.
Абай облысы
