Халықаралық маңызды ынтымақтастық

Кеше, Ақордада Қазақстан Рес­­пуб­­ли­касының Президенті Нұр­сұлтан Назарбаев Дүниежүзілік банк басшылығымен кездесті. Кездесуге Қазақстан Респуб­ликасының Премьер-Министрі Кәрім Мәсімов, Дүниежүзілік банктің Еуропа және Орталық Азия елдері бойынша вице-пре­зи­денті Лора Так, Халықаралық қар­жы корпорациясының Азия-Тынық мұхиты өңірлері жө­ніндегі вице-президенті Карин Ф.Финкельстон, Дүниежүзілік банктің Орталық Азия бойынша Өңірлік директоры Сародж Кумар Джа, Дүниежүзілік банктің Инвестицияға кепілдік беру жөніндегі көптарапты агенттігінің атқарушы вице-президенті Кейко Хонда, Дүниежүзілік банктің Қазақ­стандағы Тұрақты өкілі Шебнем Аккая қатысты. Мемлекет басшысы бұл кез­десудің Қазақстан халқының бір­лігі күніне тұспа-тұс келуінің ны­шандық мәнін атап өтіп, маңызды әлеуметтік және инфрақұрылымдық жобаларды іс жүзіне асыруға және Қазақстан экономикасын дамытуға белсенді көмек көрсетіп отырғаны үшін Дүниежүзілік банк тарапына алғыс сезімін білдірді. Президент Дүниежүзілік банк Қазақстан үшін маңызды халық­аралық экономикалық әріптес екендігін, ал оның қызметі мемлекет тарапынан да, іскерлік қауымдастық тарапынан да тұрақты түрде жоғары бағаға ие болып отырғандығын атап көрсетті. Кездесу барысында Қазақстан Республикасының тұрақты дамуын және өсуін қамтамасыз ету мақ­сатындағы ынтымақтастықты күшейту жөнінде Қазақстан Респуб­ликасы Үкіметі және Халық­ара­лық Қайта құру және даму бан­­кінің, Халықаралық қаржы кор­порациясының, Инвестицияға кепіл­дік беру жөніндегі көптарапты агент­тік арасында Серіктестік туралы шектелмелі келісімге қол қойылды. Шектелмелі келісімге сәйкес Дүниежүзілік банк Тобы Қазақ­станға экономиканың шикізаттық емес саласына инвестиция тар­туға басымдық бере отырып, Қазақстанның бәсекеге қабі­лет­тілігін арттыруға және экономиканы әртараптандыруға, кәсіпкерлікті дамыту және инновацияға, шағын және орта бизнесті дамытуды ынталандыруға, институттық және адам капиталын дамытуға, өңірлік тұрақты дамуды қамтамасыз ету бойынша мемлекеттік қызметтің және шаралардың қолжетімділігін және сапасын арттыруға 2,5 млрд. доллар қаржы бөлетін болады. Мемлекет басшысы ынты­мақ­тас­тық 7 бағыт бойынша іс жүзіне асырылатындығын, олар­дың әрқайсысы бойынша жеке бағдар­лама белгіленетіндігін атап өтті. Ынтымақтастық ауқымы қар­жы секторын, шағын және орта бизнесті, инновацияны ынталан­дыруды және іскерлік ахуалды жетілдіруді, мемлекеттік-жеке­меншіктік серіктестікті дамытуды және экономикаға инвестиция тартуды, кәсіптік техникалық білім беру жүйесін әртараптандыруды және кәсіптік-техникалық кадрлар даярлауды, өңірлердің тұрақты және экологиялық дамуын қамтитын болады. Елбасы Шектелмелі келісімді іс жүзіне асыру үшін қысқа мерзімнің ішінде барлық мүдделі тараптардың өкілдері кіретін Үйлестіру кеңесі құрылатындығын атап көрсетті. Жобаға басшылық жасау және оны іс жүзіне асыруды үйлестіру Премьер-Министр Кәрім Мәсімовке жүктелді. Суреттерді түсіргендер С.БОНДАРЕНКО, Б.ОТАРБАЕВ.